ފ.ފީއައްޔަށް އުފަން ޢަލީ ނާޞިރު މިއީ މިޒަމާނުގައި ވަރަށް މަދުން ޒުވާނުންކޮށް އުޅޭ މަސައްކަތެއް ކަމުގައިވާ ރާއެރުމުގެ މަސައްކަތް މީގެ 10 އަހަރުކުރިން ފެށިގެން ކުރަމުން އަންނަ ދިވެހި މުދައްރިސެކެވެ.
ރާއެރުމުގެ މަސައްކަތް އެންމެ ފުރަތަމަ ޢަލީ އަށް ދަސްވީ، އެއީ ޢަލީގެ ބައްޕަ ދިރިއުޅުމަށްކުރި މަސައްކަތަށްވުމުން ބައްޕަ ނިޔާވުމުގެ ކުރިން އެމަސައްކަތް ދަސްކޮށް ދިނުމުންނެވެ. އާމްދަނީ ހޯދުމަށް ޢަލީ އެމަސައްކަތް ކުރަންފެށީ ދިރިއުޅުމުގެ ހާލަތަށްއައި ބަދަލަކާއިގުޅިގެން އާމްދަނީ އިތުރަށް ލިބޭނެ މަސައްކަތެއް ނުކޮށް ނުވެގެން ކަމަށް ޢަލީ ވަނީ ޒީޓައިމްސް އަށް މަޢުލޫމާތުދީފަ އެވެ.
" މިމަސައްކަތް ފެށިއިރު 4 ރުކަށް އަރަން. ދުވާލަކު 20 ލީޓަރު ރުކުރާ ބާލަން. އޭރު ހޮޓާތަކަށާއި ގޭގެއަށް ރުކުރާ ޑެލިވަރީކޮށްދެން. 500 އެމް.އެލް ފުޅިއެއް ވިއްކަނީ 20ރުފިޔާ އަށް. ދެން ނުވިކި ހުންނަ ރުކުރަލުން ދިވެހި ހަކުރު ތައްޔާރުކުރަނީ. ހަކުރު ލާއްސެއް ވިއްކަނީ 100ރުފިޔާ އަށް" ޢަލީ ބުންޏެވެ.
އަމިއްލަގޭގައި ކުޑަ ދެކުދިން ގޮވައިގެން ޢަލީ މިމަސައްކަތް ކުރަނީ ވަރަށް ރޭވުންތެރިކަމާއިއެކު ވަގުތު ބަހާލައިގެންނެވެ. މިހާރު އަރަނީ އެންމެ ރުކަކަށް ކަމަށާއި، އެއީ ވަޒީފާއާއި ދަރިން ބެލުމުގެ މަސްއޫލިއްޔަތު ކޮޑުގައި އެޅިފައިވުމުގެ ސަބަބުން އިތުރަށް ވަގުތު ދެވެން ނެތުމުން ކަމަށް ޢަލީ ބުންޏެވެ. އަދި މިދުވަސްވަރު ލިބޭ ރުކުރާ އައިސްއަލަމާރީގައި ބެހެއްޓުމަށްފަހު ހަފްތާ ބަންދުގަ ހަކުރު ތައްޔާރުކުރަނީ ކަމަށް ބުންޏެވެ.
ފީއަލީ ރައްޔިތުން ބޭނުންވާ ވަރަށް ދިވެހިހަކުރު އޮންނަނީ ތައްޔާރު ނުކުރެވިފައި ކަމަށާއި، މިއީ އެހާވެސް ޑިމާންޑް އޮންނަ، ވިޔަފާރިއެއްގެ ގޮތުގައި ކުރުމަށް ރަނގަޅު މަސައްކަތެއްކަން ޢަލީގެ ވާހަކައިން ވަނީ އެނގިފައެވެ.
މިމަސައްކަތުން ލިބޭ އާމްދަނީ ހާމަކުރަމުން ޢަލީ ބުނީ "ވަޒީފާ އަދާކުރަމުން އަންބަކާ ނުލާ ދެކުދިން ބަލަމުން މިމަސައްކަތް ކުރާއިރުވެސް މަހެއްގެމައްޗަށް އެވްރެޖްކޮށް 6000 ރުފިޔާއާއި 8000 ރުފިޔާއާއި ދެމެދުގެ މިންވަރަކަށް ލިބޭ. އަޅުގަނޑުގެ ދިރިއުޅުން ބަލަހައްޓާނެ އަންބަކު ހުންނަނަމަ ވަޒީފާއިން ލިބޭ އާމްދަނީއަށްވުރެ އިތުރަށް މިމަސައްކަތުން ރުފިޔާ ހޯދޭނެ" ކަމަށެވެ.
ފީއަލީގައި ޢަލީ ނޫން އިތުރު ރާވެރިއަކު ހުންނައިރު، ރަށުން ބޭރަށް ދާއިރު ޢަލީ ދަނީ އެމީހާއާއި ރުއްތައް ޙަވާލުކޮށްފަ އެވެ. އަދި އެމީހާ ރަށުން ބޭރަށްދާން ޖެހިއްޖިއްޔާ އެމީހާ ބަލަހައްޓަމުންދާ ރުއްތައް ޙަވާލުކުރަނީ ޢަލީ އާއި އެވެ. މިއީ ވަރަށްގުޅިގެން ކުރާހިތުން ކުރާ މަސައްކަތެއްކަން ޢަލީގެ ވާހަކައިގައި ފާހަގަކުރެވުނުއިރު ރާވެރިކަމުގެ މަސައްކަތް ޒުވާން ޖީލަށް ދަސްކޮށްދިނުމަށް ކުރެވުނީ ކޮންކަމެއްތޯ ސުވާލުކުރުން ޢަލީ ދިނީ މިޖަވާބެވެ.
" މިމަސައްކަތް ސުކޫލުގެ 15 ދަރިވަރަކަށް ވަރަށް ރަނގަޅަށް ދަސްކޮށްދިނިން. އަދި އެކުދިން އެކަން ތަޖުރިބާކޮށް ނަތީޖާވެސް ރަނގަޅު. މިހާރުވެސް އޭގެތެރެއިން ބައެއްކުދިން މިމަސައްކަތް ކުރޭ"
ދިވެހި މުދައްރިސެއްގެ ގޮތުގައި ހަރަކާތްތެރިވާތާ 24 އަހަރުވެފައިވާ ޢަލީ މިހާރު ކިޔަވައިދެނީ ފ.އަތޮޅު މަދަރުސާގަ އެވެ. ހެދުނު ގަޑީގައި ސުކޫލަށް ދިއުމުގެ ކުރިން ފަތިސް ނަމާދު ކޮށްގެން ރުކުން ރާ ބާލަނީއެވެ. އަދި މެންދުރު ސުކޫލު ގަޑި ނިމުމުން އަނެއްކާ އެމަސައްކަތް ކުރަނީ އެވެ. މިއީ ދުވާލަކު 3ފަހަރު ކުރަންޖެހޭ މަސައްކަތަކަށްވާއިރު ހަވީރު އަނެއްކާވެސް ރުކުން ރާ ބާލަނީ ކަމަށް ޢަލީ ވަނީ ބުނެފައެވެ.
އިންޓަވިއު ނިންމާލަމުން ޢަލީ ބުނީ ރާވެރިކަމުގެ މަސައްކަތަކީ އާމްދަނީ ހޯދުމަށް ވަރަށް ރަނގަޅު މަސައްކަތެއްކަމަށާއި، ދެވަނަ ބޮޑު ހަނގުރާމައިގެ ތަދުމަޑުކަމާއި، ހައިހޫނުކަމުން ދިވެހި ޖީލު ސަލާމަތްކޮށްދިނުމަށް ދިވެހި ކާބަފައިން މިކުރި ދިވެހިވަންތަ މަސައްކަތަކީ ޒުވާނުން ކުރަން ވަރަށްރަނގަޅު މަސައްކަތެއްކަމަށެވެ.
