އަނިލްގެ މައިންބަފައިން މިހާރަކަށް އައިސް އަބަދުވެސް ތިބެނީ ހާސްވެ ކަންބޮޑުވެފައެވެ. އެއީ އެ ދެމަފިރިންގެ ހުރި ހަމައެކަނި ދަރިފުޅު އަނިލްގެ އުޅުމާމެދު ފިކުރުކޮށްކޮށެވެ. ފަހަކަށް އައިސް އަނިލްގެ މިޒާޖަށް އައިސްފައިވަނީ ވަރަށް ބޮޑު ބަދަލެކެވެ. އަނިލްގެ އުޅުން މިހާރު ކުރިއާ ބަލާފައި ހާސްބައި ތަފާތެވެ. އަނިލްގެ ބައްޕައާއި މަންމަ ލޮލުފިޔަ ނުޖަހާ ހޭލާތިބޭ ރޭތައް ތަކުރާރުވަމުންދާ ސަބަބަކީ އެއީއެވެ.
އަނިލްގެ އާއިލާއަކީ ރަށުގައި ތަނަވަސް ދިރިއުޅުމެއް އުޅެމުންދާ ފުދުންތެރި އާއިލާއެކެވެ. އަދި އަނިލްގެ އާއިލާއަކީ ކުޑަކުޑަ އާއިލާއެއް ވެސްމެއެވެ. އެ އާއިލާގައި ހިމެނެނީ އަނިލްގެ މަންމައާއި ބައްޕަ، އަދި އަނިލްގެ ބައްޕަގެ ބައްޕަ (އަނިލްގެ ކާފަ) އެވެ.
އަނިލްއަކީ ވަރަށް ރަނގަޅު، ބަސްއަހާ ކިޔަމަންތެރި، ވިސްނުންތެރި އަދި ތޫނުފިލި ކުއްޖެކެވެ. އަނިލް ބޮޑުވަމުންއައި ދުވަސްވަރު އޭނާއަކީ ހިތްވަރުގަދަ ކަމުގެ ވެސް ލާމަސީލު ކުއްޖެކެވެ. ގާތްތިމާގެ މީހުންނާއި އަވައްޓެރިން ވެސް އެކަން ރަނގަޅަށް ދަނެއެވެ. އޭނާއަށް ތަޢުރީފުކުރެއެވެ. އެހެންކަމުން ކުޑައިރުއްސުރެ އަނިލްގެ މައިންބަފައިން އަނިލްއާއި މެދު ފަޚުރުވެރިވެއެވެ. އަނިލް ކުރިމަތީ ބަހައްޓައިގެން އޭނާގެ އެ ހުނަރުވެރިކަމާއި މޮޅުކަމުގެ ވާހަކަ އެހެން މީހުންގެ ގާތުގައި ވަރަށް ފަޚުރުވެރިކަމާއެކު މައިންބަފައިން އަބަދު ދައްކާތީ ޚުދު އަނިލް ވެސް އޭނާގެ ނަފުސާމެދު ފަޚުރުވެރިވަމުން ދިޔައެވެ.
ނަމަވެސް، އަނިލްގެ ކާފަ އެއްގޮތަކަށް ވެސް މައިންބަފައިންގެ އެ ސިފައާއި މެދު ހިތްހަމައެއް ނުޖެހެއެވެ. އެހެން މީހުނަށް އަނިލްގެ ވިސްނުންތެރިކަމާއި މޮޅުކަން އަންގަން މަސައްކަތްކުރުމަކީ ރަނގަޅުކަމެއް ނޫންކަން ކާފަ އަބަދުވެސް އެ ދެމަފިރިންނަށް ވިސްނައިދެއެވެ. ސަބަބަކީ މީހުންގެ އެސްފީނާއާ މެދު ވެސް ވިސްނަންޖެހޭކަމެވެ. އެންމެންނަކީ ހިތްހެޔޮވާނެ ބަޔެއްނޫންކަމެވެ. އެންމެ ގާތް މީހުންގެ ތެރޭގައި ވެސް ޙަސަދަވެރިން އުޅެފާނެކަމެވެ. އަދި އޭގެއިތުރުން، އެކަމުގެ ސަބަބުން ކުއްޖާގެ ހިތަށް ކިބުރުވެރިކަމާއި ބޮޑާކަން ވަނުމަކީ ވެސް އެކަށީގެންވާކަމެއްކަމުގައި ކާފަ ޤަބޫކުކުރެއެވެ. މި ސަބަބުތަކާ ހުރެ ކާފަ ދެކޭ ގޮތުގައި އަނިލްގެ މައިން ބަފައިންނަށް އެ ކުރެވެނީ ރަނގަޅު ކަމެއް ނޫނެވެ. ނަމަވެސް އަނިލްގެ މައިންބަފައިން އެ މުސްކުޅި ކާފަ ދެމުންދިޔަ ހެޔޮ ނަސޭހަތަށް ދެމުންދިޔައީ ބީރު ކަންފަތެކެވެ.
ދުވަސްތައް ފާއިތުވަމުން ދިޔައެވެ. ދުވަސްތައް މަސްތަކަށް، މަސްތައް އަހަރުތަކަށް، ބަދަލުވަމުން ދިޔައެވެ. އަނިލް ބޮޑުވަމުން ދިޔަވަރަކަށް އަނިލްގެ މިޒާޖަށް ވެސް ދިޔައީ ބަދަލު އަންނަމުންނެވެ. އަދި އަނިލްގެ މައިންބަފައިން ވެސް އުޅެމުން ދިޔައީ ވިޔަފާރީގެ މަސައްކަތުގައި އަވަދިނެތި ދިރިއުޅުމެއްގައެވެ. އޭގެ ސަބަބުން އަނިލްއާއެކު ހޭދަކުރެވޭ ވަގުތު ވެސް އެއްދުވަހުން އަނެއްދުވަހުން ދިޔައީ މަދުވަމުންނެވެ.
ކުރީގައި އަނިލް ސްކޫލުން ގެއަށް އައިސް ކިޔަވަން އިންނަ ވަގުތު ގިނަ ނަމަވެސް މިހާރު އެކަން ވެސް ބަދަލުވެއްޖެއެވެ. މިހާރު ގޭތެރޭގައި އުޅޭނަމަ އުޅެނީ ވަރަށް ބޮޑަށް ފޫހިވެގެންނެވެ. އެހެންކަމުން އަނިލް ފޫހިފިލުވުމަށްޓަކައި ކުރާ ކަމަކީ މުޅިން ވެސް ގޭމުކުޅުންކަމުގައިި ވެއްޖެއެވެ. އަނިލްގެ ކާފަ ގިނަ ވަގުތު ހޭދަކުރަނީ ގޭތެރޭގައެވެ. ކާފަ ގޭތެރޭގައި އުޅޭއިރު އަނިލްގެ މިޒާޖަށް އަންނަމުންދާ މި ބަދަލުތައް ދަނީ ގާތުން ބަލަމުންނެވެ. އަދި އެ ކަންކަމާމެދު ވިސްނާ ފިކުރުކޮށް ހިތާމަކުރަމުންނެވެ. އަނިލްގެ އުޅުމާމެދު ކާފަގެ ޚިޔާލާއި ވިސްނުން އަނިލްގެ މައިންބަފައިންނާ ހިއްސާކޮށް ވާހަކަދައްކައިލުމުގެ ފުރުސަތެއްގެ އިންތިޒާރުގައި ކާފަ ބަލަބަލާ ހުރެއެވެ.
އެއް ދުވަހަކު އަނިލްގެ ސްކޫލުން އަނިލްގެ ބައްޕައަށް ކޯލެއް އައެވެ. އެއީ ޕްރިންސިޕަލް ބައްދަލުކޮށްލަން ބޭނުންފުޅުވާތީ އެ ވާހަކައެވެ. އަނިލްގެ ބައްޕަ އެކަމާ ވަރަށް ކަންބޮޑުވެއްޖެއެވެ. އަނެއްކާ ކޮންކަމެއް ޖެހުނީ ބާވައޭ އޭނާގެ ހިތަށް އެރިއެވެ. އެހެން ހިތަށްއެރީ ވެސް ސަބަބެއް އޮވެގެންނެވެ. މިހާރަކަށް އައިސް އަނިލްއާ މެދު މީހުން ދެކޭގޮތް ކޮންމެވެސް ވަރަކަށް ބަދަލު އަންނަމުންދާކަމުގެ އިޙްސާސް އެ ދެމަފިރިންނަށް ވެސް ކުރެވޭތާ ދުވަސްކޮޅެއް ވެއްޖެއެވެ. ކުރިން ގާތްތިމާގެ މީހުން ގެއަށް އައިސް، އަދި އެ މީހުން ގާތްތިމާގެ މީހުންގެ ގޭގެއަށް، އާއިލާގެ ބައްދަލުވުންތަކަށް ގޮސް އުޅޭއިރު ކުރިން މީހުން އަނިލް ފެނުމުން އެ ހުންނަގޮތް، އެވާ ލޯބި މިހާރު އެ މީހުންނަށް ފެންނަމަކުން ނުދެއެވެ. އެއީ އަނިލްއާ މެދު މިހާރަކަށް އައިސް ފާހަގަކޮށްލެވޭ ސިފައެކެވެ. އެކަމާ އެ ދެމަފިރިން ވެސް ވަނީ އެއް ދުވަހަކު ވާހަކަދައްކާފައެވެ.
ޖެހިގެން އައި ދުވަހު އަނިލްގެ ބައްޕަ ސްކޫލްގެ ޕްރިންސިޕަލާ ބައްދަލުކޮށްފިއެވެ. ޕްރިންސިޕަލް ވިދާޅުވީ އަނިލްއަކީ ކިޔެވުމަށް ވަރަށް މޮޅު ވިސްނުން ތޫނު ކުއްޖެއްކަމަށެވެ. އެކަމަކު މިހާރަކަށް އައިސް ސްކޫލް ތެރޭގައި އަނިލްގެ އުޅުން ގޯސްކަމުގެ ޝަކުވާތައް ހުށަހެޅެމުން ދާކަމަށެވެ. ކުލާހުގައި އުޅޭއިރު އަވަސްއަވަހަށް ރުޅިއައުމާއި ހުތުރު ބަހުން ޓީޗަރުންނާއި އަދި ކުދިންނާއި މުޚާޠަބުކުރުން އިތުރުވަމުންދާކަމުގެ ޝަކުވާތައް ހުށަހަޅަމުންދާކަމަށެވެ. އަނިލްގެ އުޅުން ހުންނަގޮތުން، ކުލާހުގައި ހަދާ ގްރޫޕްތަކުގައި ވެސް އަނިލްއާއެކު ކުދިން ބައިވެރިވެ މަސައްކަތްކުރަން ކުދިން ބޭނުން ނުވެގެން އުޅޭ ވާހަކައެވެ. އަދިވެސް ޕްރިންސިޕަލް ވިދާޅުވިއެވެ. މިހާރު އެކިއެކި ޓީޗަރުން އަނިލްއާ އެކަހެރިކޮށް އެތައް ފަހަރަކު ބައްދަލުކޮށް ނަސޭހަތް ދެއްވާފައިވެއެވެ. އަދި ޕްރިންސިޕަލް ވެސް އަނިލްއާ ބައްދަލުކުރައްވައި ނަސޭހަތް ދެއްވިކަމަށް ވިދާޅުވިއެވެ. ނަމަވެސް އަދިވެސް އޭނާގެ އުޅުމަކަށް އެއްވެސް ހެޔޮ ބަދަލެއް ނާންނަކަން ޕުރިންސިޕަލް ތަކުރާރުކޮށް ވިދާޅުވިއެވެ.
ޕުރިންސިޕަލް އެ ހުރިހާ ވާހަކައެއް ދެއްކެވިއިރު އަނިލްގެ ބައްޕަ ލަދުވެތިކަމާއެކު އިސްޖެހިފައި އިނެވެ. އަނިލްގެ ބައްޕަ އެއްޗެއް ނުބުނެ އިންތަން ފެނިވަޑައިގެން ޕްރިންސިޕަލް ވިދާޅުވިއެވެ. ކުރިން އަނިލްއަކީ އާދަޔާ ޚިލާފަށް ރަނގަޅު ބަސްއަހާ ކުއްޖެކެވެ. ސްކޫލުން ވެސް އަނިލްއާ މެދު ފަޚުރުވެރިވެއެވެ. ސްކޫލުގެ އެދުމަކީ ވެސް އަނިލްއަކީ ރަނގަޅު، ޤައުމަށް ފައިދާ ހުރި ކުއްޖެއްގެ ގޮތުގައި މުޖުތަމަޢަށް ނެރެދިނުމެވެ. އަޅުގަނޑުމެން އެންމެން ގުޅިގެން ކުރިޔަށް އޮތްތާނގައި އަނިލްގެ ކުރިމަގަށްޓަކައި އެކުގައި މަސައްކަތް ކުރަމާ ހިނގާށެވެ. ސްކޫލުން ވެސް ކުރެވެން ހުރި ހުރިހާކަމެއް ކުރާނަމެވެ. ތިޔަބޭފުޅުން ވެސް ކުރައްވާށެވެ. ދެފަރާތުން ވާހަކަދައްކައިގެން ގުޅިގެން މިކަމުގައި ކުރިޔަށް ގެންދެވުން ރަނގަޅުވާނެކަމަށް ފެންނާތީ މި ވާހަކަތައް ދަންވައިލުމަށްޓަކައި އަނިލްގެ ބައްޕައާ މިއަދު ބަދަލުކޮށްލީއެވެ. އިރާދަކުރެއްވިއްޔާ ރަނގަޅުވާނެއެވެ. އިންޝާﷲ.
އަނިލްގެ ބައްޕަ އެ ދުވަހު އެވީ ފަދަ ދެރައެއް ދުވަހަކު ވެސް ނުވެއެވެ. ޕްރިންސިޕަލް އަރިހުން އެނބުރި ގެއަށް އައިފަހުން އެއްވެސް މީހަކާ އަނގައިން ނުބުނެ އިސްޖެހިފައި އިނެވެ. ކާފައަށް ވެސް އޮތީ ޕްރިންސިޕަލާ ބައްދަލުކުރަން ދިޔަކަން އެނގިފައެވެ. ޕްރިންސިޕލް އަރިހުން އައުމަށްފަހު އަނިލްގެ ބައްޕަ އިސްޖެހިފައި އިންގޮތް ފެނިފައި ކާފަ ސުވާލުކުރެއްވިއެވެ. ދެން ޕްރިންސިޕަލާއެކު ދެކެވުނު ވާހަކަތައް އަނިލްގެ ބައްޕަ ކާފައަށް ކިޔައިދީފިއެވެ. ދެން ހަދަންވީ ކިހިނެއް ކަމާމެދު ކާފަޔާ އަނިލްގެ ބައްޕަ ސުވާލުކުރިއެވެ. އެ ވަގުތު ކާފަ ބުންޏެވެ. އަނިލްއަށް ތިޔަ ދެމަފިރިން އަދިވެސް މަޑުމައިތިކަމާއެކު ނަސޭހަތް ދޭށެވެ. އަދި ގިނަ ވަގުތު އޭނާއާއެކު ހޭދަކުރެވޭތޯ ވެސް ބަލާށެވެ. އެއީ ދަރިންނަށް ވަރަށް މުހިންމުކަމެކެވެ. މައިންބަފައިން ދަރިންނާ އެކު ހެޔޮގޮތުގައި ހޭދަ ކުރާ ވަގުތަކީ ދަރިންނަށް ވަރަށް ބޭނުންތެރި އަގުހުރި އެއްޗެކެވެ. އިރާދަކުރެއްވިއްޔާ އަދި ވަގުތު އެބައޮތެވެ. އަދި އަނިލްގެ އުމުރަކީ އެންމެ 12 އަހަރެވެ. ޕްރިންސިޕަލް ވިދާޅުވި ފަދައިން އެންމެން އެކުގައި މަސައްކަތް ކޮށްގެން އަނިލްގެ އަޚުލާޤު އަދި ރަނގަޅުކުރެވޭނެއެވެ. އިންޝާﷲ.
އެ ދުވަހު އަނިލްގެ ބައްޕައާއި މަންމަ އަނިލް ގެނެސް އެ ދެމަފިރިންގެ ކުރިމަތީ ބައިންދައިގެން ނަސޭޙަތް ދޭން ފެށިއެވެ.
އަނިލް: (ރުޅިއައިއްސަ) ތިޔަ އައީ ސްކޫލް މީހުން ބުނާއެއްޗެހި ގަބޫލުކޮށްގެން ދޯ؟ އެއީ ކޮންބައެއްތަ. އެއީ
މާރަނގަޅު ބައެއްތަ. މީހުންގެ ވާހަކަދައްކަން؟
އެ ޖަވާބުތައް އަޑުއަހަން ތިބި އަނިލްގެ މައިންބަފައިން ތިބީ ކޮސްވެފައެވެ. މިހާ ހިސާބަށް އަނިލްގެ ކަންތައް ދިޔަކަން އެމީހުނަށް ކުރިން އިޙްސާސެއް ނުކުރެވެއެވެ. އަނިލްގެ މައިންބަފައިން އަނިލްގެ މި މިޒާޖަށް އައި މި ބޮޑު ބަދަލާމެދު ވަރަށް ކަންބޮޑުވެއްޖެއެވެ. އެ ދެމީހުނަށް ރޮވިއްޖެއެވެ. އެކަމަކު ވެސް އެމީހުން ދޭ ނަސޭހަތެއް އަނިލް މިހާރު އަހާކަށް އެއްގޮތަކަށް ވެސް ބޭނުމެއް ނުވިއެވެ. މިހާރު މައިންބަފައިންނާ ވެސް ޒުވާބުކުރަން އަނިލް އެ ހުރީީ ތައްޔާރަށްކަން އެ ދެމަފިރިންނަށް ޔަޤީންވެއްޖެއެވެ. އެ ދެ މީހުނަށް އަނިލް ދެނީ ބޭނުން ޖަވާބެކެވެ. ކިޔަނީ ކިޔާނެ އެއްޗެކެވެ. އެއްޗެއް ބުނެފިއްޔާ ދޭތި ތިނެތި ބުނެއެވެ. އެއަށް ފަހު ގެއިން ނިކުމެގެން ވެސް ދަނީއެވެ. އަނިލްގެ ކާފަ މި މަންޒަރުތައް ގާތުން ބަލަމުންދިޔައެވެ. އެ ދެމަފިރިން އުޅޭޙާލު ފެނިފައި ކާފަގެ ހިތް ކުދިކުދިވާވަރުވެއެވެ. މިކަމަށް ތިމަންނާއަށް ވެދެވޭނީ ކޮން އެހީއެއް ބާވައޭ ކާފަ ހިތާހިތާ ސުވާލުކުރަމުންދިޔައެވެ.
އެއް ދުވަހަކު އަނިލްގެ ކާފައަށް ރަނގަޅު ވިސްނުމެއް އަތުވެއްޖެއެވެ. ދެން ބާޒާރަށް ގޮސް މޮހޮރުތަކަކާ މަރުތޭލައެއް ގަނެގެން އައިސް، އަނިލްގެ އިންތިޒާރުގައި އިނެވެ. އާދައިގެ މަތިން މިހާރު އަނިލް ސްކޫލުން އައިސް ގެއަށް ވަނުމާއެކު އަޑުގަދަކޮށް ހަޅޭއްލަވަން ފަށައިފިއެވެ. ދެން އެ ދުވަހު އަނިލްގެ ކާފަ އަނިލް ގޮވައިގެން އެ ގޭ ބަގީޗާ ތެރެއަށް ނިކުމެ ބަގީޗާ ވަށައިގެން ޖަހާފައިވާ ފިލާ ފުޅައް ކައިރީގައި އެ މީހުން މަޑުކޮށްލައިފިއެވެ. ދެން އެ ވަގުތު ކާފަގެ އަތުގައި އޮތް މަރުތޭލައާއި މޮހޮރުތައް އަނިލްގެ އަތަށް ދެމުން ކާފަ ބުންޏެވެ. ކޮންމެ ފަހަރަކު ދަރިފުޅު ތިޔަ ގޮތަށް ރުޅި އައުމުން މިތަނުން ފިލައަކަށް މިއިން މޮހޮރެއް ޖަހާށެވެ. އޭރުން ދަރިފުޅުގެ ރުޅިގަނޑު މައިތިރި ވާނެއެވެ. އަނިލްއަށް އެ ވާހަކަ ވީ ވަރަށް އަޖައިބު ކުރުވި ހެއްވާ ވާހަކަ އަކަށެވެ. ނަމަވެސް ކާފަ ބުނީތީ އޭނާ އެކަން ކުރަން އެއްބަސްވެއްޖެއެވެ. ދެން އަނިލް ރުޅިއަންނަ ކޮންމެ ފަހަރަކު ބޭރަށް ނިކުމެ އެ ތަނުން ފިލަޔަކަށް މޮހޮރެއް ޖަހައެވެ.
އަނިލް ފިލާތަކަށް މޮހޮރު ޖަހާތާ އެތައް ދުވަހެއް ފާއިތުވީއިރު ވެސް އަނިލްގެ މިޒާޖަކަށް އެއްވެސް ބަދަލެއް ނައެވެ. މިހާރު އަތުގައި ހުރި މޮހޮރުތައް ވެސް ހުސްވެއްޖެއެވެ. ދެން އަނިލް ކާފަ ގާތުގައި މޮހޮރުތައް ހުސްވި ވާހަކަ ބުނެފިއެވެ. އޭރު އަނިލް ހުރީ ފިލަޔަށް މުހޮރު ޖަހާހިތްވެ އެކަމަށް ގަޔާވެފައެވެ. އެކަމަކު ކާފަ އެންމެ މޮހޮރެއް ވެސް މިފަހަރު ނުދިނެވެ. އަދި ކާފަ ބުންޏެވެ. ދަރިފުޅު ދެން ރުޅިއަންނަ ކޮންމެ ފަހަރަކު ގޮސް، ފުޅަފަށް ޖަހާފައި ހުރި މޮހޮރުތަކުން މޮހޮރެއް މަރުތޭލައިން ނަގާށެވެ. އަނިލް މިފަހަރު ވެސް ކާފަގެ އިރުޝާދާ އެއްގޮތަށް ކަންތައް ކުރަން ފެށިއެވެ. ދުވަސް ކޮޅެއްވީއިރު، ފިލާތަކަށް ޖަހާފައި ހުރި ހުރިހާ މޮހޮރެއް އަނިލް ނަގައި ނިންމައިފިއެވެ. އެކަމަކު މިފަހަރު ވީގޮތަކީ، ކޮންމެ މޮހޮރެއް ނެގި ތަނުގައި ލޯވަޅެއް ހެދިފައި ހުރުމެވެ. މޮހޮރު ނެގުމުގެ ސަބަބުން ފިލާތައް ހަލާކުވެފައި ވާތީ އެކަމާ އަނިލް ވަރަށް ދެރަވެއްޖެއެވެ.
އަނިލް ކާފަ ގޮވައިގެން އެތަނަށް ގޮސް، އެ ފިލާތައް ދައްކައިފިއެވެ. އެ ވަގުތު ކާފަ ބުންޏެވެ.
ކާފަ: މީ މޮހޮރު ނެގުމުގެ ސަބަބުން މިތަންތަނުގައި ހެދުނު ލޯވަޅުތަކެއް ދޯ ދަރިފުޅާ؟
އަނިލް: ލައްބަ!
ކާފަ: "ދަރިފުޅަށް ވަރަށް ފަސޭހައިން އެ މޮހޮރުތައް ނެގިއްޖެ ދޯ؟ އެކަމަކު އެ މޮހޮރުތައް ނެގުމުން
އުފެދުނު ލޯވަޅުތައް ނައްތައިލަން (ބައްދައިލަން) ފަސޭހައެއް ނުވިދޯ؟ ދަރިފުޅު ނިކަން ވިސްނާލަބަލަ! އެ މޮހޮރު ތަކަކީ ދަރިފުޅުގެ ނުބައި އާދަތައް ކަމަށް. މޮހޮރުތައް ނެގިއިރު އެ އުފެދުނު ލޯވަޅުތަކަކީ ދަރިފުޅުގެ ނުބައި ބަސްތަކުން ހިތްތައް ޒަޚަމްވީ މީހުންގެ ހިތްތަކުގައި އުފެދުނު ލައްގަނޑުތައްކަމަށް. އެ މީހުންގެ ހިތްތަކުގައި އުފެދުނު ލޯވަލުތައް އެއީ. އެ ގޮތުން ގައިގެ އެއްވެސް ތަނެއް ޒަޚަމްވުމުގެ ސަބަބުން ލަފެއް (ލަކުނެއް) ލައިފިނަމަ އެ ލަކުނެއް ފަސޭހައިން ފިލުވައިލެވިދާނެހެން ނުވަތަ ނައްތައިލެވިދާނެހެން ހީވޭތަ؟
އަނިލް: ނޫން! އެއްވެސް ލަކުނު ފިލުވަން ފަސޭހައެއް ނުވާނެ!
ކާފަ: އެހެންވީމާ ދަރިފުޅު ވިސްނާލަބަލަ! ދަރިފުޅު އެބަޔަކާ ދިމާއަށް ތިޔަކިޔާ ހަޑިހުތުރު އެއްޗެހި ކިޔުމުން އެ މީހުންގެ ހިތްތަކުގައި ދަރިފުޅާމެދު ރުޅިވެރިކަން އުފެދި ހިތުގައި ނުބައި ލައްތަކެއް ޖެހޭނެ. ދަރިފުޅާ! މީހަކު ބުނާއެއްޗަކުން އަނެކާނެ ހިތުގައިޖެހި އުފެދޭ ޒަޚަމަކީ މާ ގިނަ ދުވަހަށް ދެމިހުންނަ ޒަޚަމެކޭ ބުނާތީ އަޑެއް ނާހަމުތަ؟
އަނިލް: އަޑުއަހަން.
ކާފަ: އެހެންވެ ކާފަ މި ބުނަނީ ކާފަ ކުރިން ބުނި ފަދައިން އެބައެއްގެ ހިތުގައި ޖައްސައި ޒަޚަމް
ކުރި މީހުންގެ ހިތްތައް ރަނގަޅު ކުރެވޭނީ ދަރިފުޅު އިސްލާޙުވެ އެމީހުންގެ ކިބައިން މާފަށް
އެދިގެން. ދަރިފުޅު ބޭނުންތަ އެކަން ކުރަން؟ ދަރިފުޅަށް އެކަން ކުރެވިދާނެތަ؟
އަނިލް: ލައްބަ ކާފާ! އަނިލް ބޭނުން ކުރިން އުޅުނުގޮތަށް ރަނގަޅު ކުއްޖަކަށްވާން. އަދި މީހުންގެ
ލޯބި ހޯދަން. މީހުން އަނިލްއަކީ ހާދަ ރަނގަޅު ކުއްޖެކޭ ބުނާ އަޑުއަހަން. މިއަދު އެންމެ ފުރަތަމަ މާފަށް އެދޭނީ މަންމައާއި ބައްޕަގެ ފަރާތުން. އަދި މާދަން ސްކޫލަށް ގޮސް އަނިލް ޒުވާބުކުރި ހުރިހާ ޓީޗަރުންނާ ކުދިންގެ ކިބައިން މައާފަށް އެދޭނަން. އަދި އަވައްޓެރިންގެ ކިބައިންވެސް މާފަށް އެދޭނަން.
ކާފަ: އަނިލްގެ ކާފަ އުފަލުން ފޮޅިފައި އަނިލްގެ ގައިގައި ބައްދައިލިއެވެ. އެއަށް ފަހު ބުންޏެވެ.
އިރާދަކުރެއްވިއްޔާ ދަރިފުޅަކީ ކިޔަމަންތެރި ބަސްއަހާ ވިސްނުންތެރި ކުއްޖެއްގެ ގޮތުގައި
ތާއަބަދު ލަހައްޓަވާށިއެވެ. އަދި މީހުން ދެކެ ލޯބިވާ އަދި އެހެން މީހުން ވެސް ދަރިފުޅުދެކެ
ލޯބިވާ ކުއްޖަކުކަމުގައި ލައްވާށިއެވެ. (ނިމުނީ)
ޢިބްރަތް: އިސް ރައްވެހިންގެ ތަޖުރިބާ ކަންކަމުގައި ބޭނުންކުރާށެވެ!
ނޯޓް ޙުސްނާ ފަހްމީ (ހުސްނާ މިސް) އަކީ، ރާއްޖޭގެ ތަޢުލީމީ ދާއިރާގައި 42 އަހަރަށް ވުރެ ގިނަ ދުވަހު އިޚުލާޞްތެރި ޚިދުމަތްތަކެއް ކުރައްވާފައިވާ ކަނބަލެކެވެ. އަދި މެދުނުކެނޑި 37 އަހަރަށް ވުރެ ގިނަ ދުވަހު ދިވެހި ދައުލަތައް ޚިދުމަތްކުރައްވާފައި ވާތީ، ރައިސުލްޖުމްހޫރިއްޔާ ދެއްވާ ދައުލަތަށް ގިނަ ދުވަހު ޚިދުމަތް ކުރުމުގެ އިނާމު 2021 ވަނަ ލިބިވަޑައިގަތުމާއެކު 2023 ވަނަ އަހަރު ރެހެންދި އެވޯޑް ލިބިވަޑައިގެންފައިވެއެވެ. ޙުސްނާ ފަހްމީ "އަރާކުރި" ސީރީސް ގެ ނަމުގައި ދިވެހިބަހުގެ ހަތަރު ހުނަރަށް އަމާޒުކުރައްވައިގެން ނާސަރީ ކުދިންނަށް ޚާއްޞަ ދިވެހިބަހުގެ އަކުރުތަކާއި ފިލިތަކާއި ސުކުންތައް ދަސްކޮށްދޭ ފޮތްތަކުން ފެށިގެން ޕްރައިމަރީ އަދި މެދުމަދަރުސީ ގްރޭޑްތަކުގެ ކުދިންނަށް ޚާއްޞަކޮށްގެން ޢިބްރަތްތެރި އަދި މަޖާ ކުރު ވާހަކަތަކާއި، މަސައްކަތު ފޮތްތަކާއި، ވާހަކަ ދޭހައާއި ކިޔުމުގެ ދޭހައިގެ ފޮތްތަކުގެ އިތުރުން އުފެއްދުންތެރި ލިޔުމުގެ ފޮތްތައް ހިމެނޭނޭހެން 40 ފޮތެއް މިހާތަނަށް ނެރެ އާންމުކުރައްވާފައިވެއެވެ.
