ބިންވެރިޔާ ސްކީމުގެ ދަށުން ގޯތި ނުލިބޭ ބަޔަކަށް އެޗްޑީސީއިން ގޯތިތަކެއް ދީފައިވާކަމަށް ބެލެވޭ މައްސަލައެއް ފެންމަތިވުމާއި ގުޅިގެން އެމައްސަލައިގެ ޖިނާއީ ތަހުގީގެއް ފުލުހުން ދަނީ ހިންގަމުން ކަމަށް ފުލުހުން ވަނީ މީޑިއާތަކަށް މައުލޫމާތު ދީފައެވެ.
ފުލުހުން ތަހުގީގު ހިންގާކަން އާންމުކޮށްފައިވަނީ 'ކުރުސީ' ނަމުގައި އެކްސްގައި ހިންގަމުން އަންނަ އެކައުންޓުން ސޯޝަލް މީޑިއާގައި މިއަދު މިމައުލޫމާތު ފަޅާއަރުވާލިފަހުންނެވެ. މި އެކައުންޓުން އާންމުކޮށްފައިވާ ހައުސިންގ މިނިސްޓްރީގެ ސިޓީގައި ވާގޮތުން ބިންވެރިޔާ ސްކީމުގެ ދަށުން ގޯއްޗަށް ޝަރުތު ހަމަނުވާ ބަޔަކަށް ހުޅުމާލެއިން ގޯތިތަކެއް ހައުސިންގ ޑިވެލޮޕްމެންޓް ކޯޕަރޭޝަން (އެޗްޑީސީ) އިން ދޫކޮށްފައިވަނިކޮށް މީގެތެރެއިން 2 ބިމެއްގެ އިންފާރު ރޭނުމުގެ ހުއްދައަށް ހައުސިންގ މިނިސްޓްރީގައި ވަނީ އެދިފައެވެ.
" 22 ޖުލައި އަދި 24 ޖުލައި 2024 ގެ ސިޓީއާއި ހަވާލާދީ ދަންނަވަން. މަތީގައި ހަވާލާދެވުނު ތިޔަ ކޯޕަރޭޝަންގެ ސިޓީގައި ބަޔާންކޮށްފައިވާ ފަރާތްތަކަކީ މި ސްކީމްއިން ގޯއްޗަށް އެދި އެޕްލިކޭޝަން ހުށަހަޅުއްވައިފައިވާ ފަރާތްތަކެއް ނޫންކަން މިސްކީމްގެ ޑާޓާބޭސްއިން ދައްކާ. އަދި އެ ސިޓީތަކުގައި ބަޔާންކޮށްފައިވާ 20821 އާއި 20768 ނަންބަރު ގޯތިތަކަކީ މިމިނިސްޓްރީން މިހާތަނަށް އެއްވެސް ފަރާތަކާއި ހަވާލުކޮށްފައިނުވާ ދެގޯތި ކަމުގައި ދެންނެވީމެވެ. މިއަހަރުގެ އޯގަސްޓް 15 ވަނަ ދުވަހު ހައުސިންގ މިނިސްޓްރީން އެޗްޑީސީއަށް ފޮނުވިކަމަށް ބުނާ މި ސިޓީގައި ބަޔާންކޮށްފައިވެއެވެ.
ސޯޝަލް މީޑިއާގައި އާންމުކޮށްފައިވާ، އެޗްޑީސީއިން ހައުސިންގ މިނިސްޓްރީއަށް މިއަހަރު ޖުލައިމަހު 24ވަނަ ދުވަހު ފޮނުވިކަމަށް ބުނާ ސިޓީގައި ވާގޮތުން ފާރު ރޭނުމުގެ ހުއްދައަށް އެދިފައިވަނީ އެޗްޑީސީގެ މެނޭޖިންގ ޑައިރެކްޓަރ ފަޒުލް ރަޝީދުގެ ބޭބެ މުހައްމަދު ފަޒީލް ރަޝީދު އާއި އަބްދުލް މާހިރު ކިޔާ މީހަކަށް ދޫކޮށްފައިވާ ދެގޯތީގައެވެ.
ކޮރަޕްޝަނަށް މަގުފަހިވާ ގޮތަށް އެޗްޑީސީއިން ދޫކޮށްފައިވަނީ ކިތައް ގޯތިކަމެއް އަދި ނޭނގެއެވެ. މިމައްސަލަ ބަލައި އަވަހަށް ފިޔަވަޅު އެޅުމަށް ސޯޝަލް މީޑިއާގައި ގިނަބަޔަކު ދަނީ ގޮވާލަމުންނެވެ. އަދި މިމައްސަލަ ސޯޝަލް މީޑިއާގައި އާންމުވުމުގެ ކުރިން މައްސަލަބަލާ އެޅި ފިޔަވަޅެއް އާންމުކޮށްފައިނުވާތީ އެކަމުގެ ކަންބޮޑުވުންވެސް ބައެއްފަރާތްތަކުން ދަނީ ފާޅުކުރަމުންނެވެ.
އަދި ރައްޔިތުންގެ މަޖިލީހަށް ވެސް ވަނީ ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް މިކަން ބަލައިދިނުމަށް އެދި ހުށަހަޅައިފައެވެ. " މިހާތަނަށް ހާމަވެފައިވާގޮތުގައި އުސޫލުން ބޭރުން 50 ގޯތި ވަނީ ދޫކޮށްފައި. އަދި އެގޯތިތަކުގެ ބިމުގެ ޖުމްލަ އަގު 400 މިލިއަނަށްވުރެ މަތިވާނެކަމަށް ލަފާކުރެވޭ. އަދި ހައުސިންގ މިނިސްޓްރީއަށް އެނގުނުތާ 5 މަސް ވަނީ ފާއިތުވެގެންގޮސްފައި. އެކަމާމެދު މިނިސްޓްރީން ނުވަތަ ސަރުކާރުން އެއްވެސް ފިޔަވަޅެއް އަޅާފައެއް ނުވޭ. ރައްޔިތުންގެ މަޖިލިސް މެދުވެރިކޮށް މިމައްސަލަ ބަލައިދިނުމަށް އެދި ހުށަހަޅަން" އެމްޑީޕީއަށް ނިސްބަތްވާ މެންބަރު މަޖިލީހަށް ހުށަހެޅުއްވި ކުއްލި މައްސަލައިގައިވެއެވެ. މިމައްސަލަ ބަލައި ފިޔަވަޅު އެޅުމަށް ސަރުކާރަށް ނިސްބަތްވާ ބައެއް މަޖިލިސް މެންބަރުންވެސް ވަނީ ގޮވާލާފައެވެ.
މިމައްސަލައާއި ގުޅޭގޮތުން އެޗްޑީސީއިން މިރޭ ބޭއްވި ނޫސްވެރިންގެ ބައްދަލުވުމުގައި މެނޭޖިންގ ޑައިރެކްޓަރ ފަޒުލް ރަޝީދު ވިދާޅުވީ " ޕޯޓަލް މެދުވެރިކޮށް ހުށަހަޅާނީ ރަޖިސްޓްރީ އޮންނަ ފަރާތެއްކަމަށް އަޅުގަނޑުމެން ބަލަނީ. މިއީ އަޅުގަނޑުމެން ޝާމިލުވެގެން ހަވާލުކުރި ސްލޮޓްތަކެއް ނޫން. މިނިސްޓްރީ އަށް އަޅުގަނޑުމެން ފޮނުވީ ވެރިފިކޭޝަން އަށް. މިނިސްޓްރީ އޮފް ހައުސިން އިން ނާންގާ ފަރާތަކަށް އަޅުގަނޑުމެން ބިމެއް ހަވާލެއް ނުކުރަން". އެޗްޑީސީގެ ފަރާތުން އަމަލުކޮށްފައިވަނީ ދެފުށްފެންނަ ސާފުގޮތަކަށް ކަމަށް ފަޒުލް ވަނީ ތަކުރާރުކޮށް ވިދާޅުވެފައެވެ. އެހެންނަމަވެސް މައްސަލަ އުޅޭކަން ހައުސިންގ މިނިސްޓްރީއިން ފާހަގަކުރިއަސް އެޗްޑީސީއިން ފުލުހަށް މައްސަލަ ހުށަހަޅާފައިނުވާކަމަށް ވަނީ ވިދާޅުވެފައެވެ.
އެޗްޑީސީ ކައިރީގައި މިމައްސަލައާއި ގުޅިގެން ހިތްހަމަނުޖެހުން ފާޅުކޮށް ބަޔަކުދަނީ މިރޭ މުޒާހަރާވެސް ކުރަމުންނެވެ.
