"90 ޕްލަސް ގޯލްޑް ކަޕް 2024" ފުޓްބޯޅަ މުބާރާތުގެ ފައިނަލުގައި ބ. އޭދަފުއްޓާއި އައްޑޫ ސިޓީ ބައްދަލުކުރި މެޗް އޮތީ ރޭ 9 ޖެހިއިރު ގަލޮޅު ދަނޑުގައެވެ. 0-2 ގެ ނަތީޖާއަކުން މެޗު ކާމިޔާބުކޮށް މުބާރާތުގެ ޗެމްޕިއަންކަން ހޯދީ ބ. އޭދަފުށީ ޓީމެވެ. ޗެމްޕިއަން ޓީމަށް މެޑެއްޔާއި ތަށި ހަވާލުކޮށްދެއްވީ ރައީސުލްޖުމްހޫރިއްޔާ ޑރ. މުހައްމަދު މުޢިއްޒެވެ.
ފައިނަލް މެޗުގެ ފުރަތަމަ ލަނޑު މެޗުގެ 39 ވަނަ މިނިޓުގައި ޖަހައިދިނީ ޖޯޒީ ނަންބަރު 10 ހަމްޒާ މުހައްމަދު (ހަމްޕު) ނަގައިދިން ކޯނަރަކުން ޖޯޒީ ނަންބަރު 11 މުހައްމަދު ފާސިރު އެވެ. ޒުވާން ކުޅުންތެރިންތަކެއް ހިމެނޭ އޭދަފުށީ ޓީމުން 2 ވަނަ ލަނޑު ޖަހާފައިވަނީ މެޗު ނިމެން ކައިރިވެފައިވަނިކޮށް ޖާޒީ ނަންބަރު 50 އަލީ ފާސިރު (ސެންޓޭ) އެވެ. ދެބެއިން ޖެހި 2 ލަނޑާއެކު އޭދަފުށީ މޮޅުވީއެވެ.
މި ރަސްމިއްޔާތުގައި ރައީސުލްޖުމްހޫރިއްޔާ ވަނީ ފައިނަލް މެޗުގައި ބ. އޭދަފުށި ޓީމުން މުބާރާތުގެ ޗެމްޕިއަންކަން ހޯދި ގޯލުޖެހި ބޯޅައިގައި ސޮއިކުރައްވާފައެވެ.
"90 ޕްލަސް ގޯލްޑް ކަޕް 2024" ފުޓްބޯޅަ މުބާރާތަކީ މުޅި ރާއްޖެއަށް ހުޅުވާލައިގެން އަމިއްލަ ފަރާތަކުން ކުރިއަށްގެންދިޔަ ފުޓްބޯޅަ މުބާރާތެކެވެ. މިދިޔަ މަހުގެ 20 ގައި ފެށި މި މުބާރާތުގައި ރާއްޖޭގެ އެކި ކަންކޮޅުތަކުން 17 ޓީމަކުން ވާދަކުރިއެވެ. ގޯލްޑް ކަޕްގެ ސަބަބުން ދިވެހި ފުޓުބޯޅައިގެ ފުރަތަމަ ޑިވިޝަނުގެ މޮޅު ކުޅުންތެރިންނާއެކު ކުޅުމުގެ ފުރުޞަތު، އައު ކުޅުންތެރިންތަކަކަށް ލިބިގެންދިޔައެވެ. އަދި ފުޓްބޯޅައިގެ ފޯރި އަލުން މުޅި ރާއްޖެއަށް ވަނީ އައިސްފައެވެ.
މި މުބާރާތުގެ ގިނަ މެޗުތައް ބަލާލުމަށް އެތައްބަޔަކު ދަނޑަށް ވަންއިރު ސަޕޯޓަރުންގެ ފަރާތުން ފެނިގެންދިޔައީ ޓީމްތަކަށް އޮތް ލޯތްބެވެ. ރޭގެ ފައިނަލް މެޗު ބަލާލުމަށް އެކަނިވެސް 1200 އެއްހާ މީހުން ދަނޑަށް ވަންކަމަށް ވަނީ މައުލޫމާތު ލިބިފައެވެ. މުޅި ދަނޑު ގުގުލާމާފައި އޮތީ ސަޕޯޓަރުންގެ ފޯރިގަދަ އަޑުންނެވެ.
