ރާއްޖެއަށް މިދުވަސްވަރު ކުރަމުންދާ ވިއްސާރައިގައި އުދައެރުމުގެ އިތުރަށް ބޯކޮށް ވާރޭވެހި ފެންބޮޑުވެ ބައެއް ރަށްރަށަށް ދަނީ ބޮޑެތި ގެއްލުންތަކެއް ވަމުންނެވެ. މިއަދު މެންދުރުފަހު 3 އިން ރޭގަނޑު 7 އަށް އޮރެންޖް އެލަރޓް ވަނީ ނެރެފައެވެ. މޫސުމާއި ބެހޭ ޤައުމީ އިދާރާއިން މައުލޫމާތު ދޭގޮތުގައި ގުގުރުމާއެކު ބޯކޮށް ވާރޭވެހި ފެންބޮޑުވާނެ ކަމަށް ލަފާކުރެވެއެވެ.
ނެޝަނަލް ޑިޒާސްޓަރ މެނޭޖްމަންޓް އޮތޯރިޓީއިން މައުލޫމާތު ދިންގޮތުގައި މިހާތަނަށް 6 ރަށެއްގައި ވަނީ ފެންބޮޑުވެފައެވެ. އެއީ އުދައަރައިގެން ށ. ނަރުދޫ އަދި ރ. އިނގުރައިދޫ އެވެ. ވާރޭ ވެހުމުގެ ސަބަބުން ފެންބޮޑުވެފައިވަނީ ދ. ކުޑަހުވަދޫ، ދ. މީދޫ، ފ. ނިލަންދޫ އަދި ފ. މަގޫދޫ އެވެ.
މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް) އިން މައުލޫމާތު ދިންގޮތުގައި އަތޮޅުތެރޭގެ 7 ރަށެއްގެ އިތުރަށް މާލޭގައި ފެންބޮޑުވުމުގެ ސަބަބުން ސިފައިން ދަނީ ފެން ހިންދުމުގެ މަސައްކަތް ކުރަމުންނެވެ. އެއީ ދ. ކުޑަހުވަދޫ، ދ. މީދޫ، އދ. މާމިގިލި، ށ. ނަރުދޫ، ފ. ނިލަންދޫ އަދި ކ. މާފުށީގެ އިތުރަށް ކ. ގުރައިދޫ އެވެ. އެންމެ ބޮޑަށް ގެއްލުން ލިބުނު އެއްރަށުގެ ގޮތުގައި ފާހަގަކުރެވެނީ ފ. ނިލަންދޫއެވެ.
ސަމާލުކަން ދިނުން މުހިންމު ކަންތައް:
ކަނޑުދަތުރުކުރާ ފަރާތްތަކުން މޫސުމަށް ސަމާލުވެގެން ދަތުރުކުރުން
ވައިގަދަވުމުގެ ސަބަބުން ގެއްލުން ލިބިދާނެ ކަމަށް ފުރާޅު، ގަސް، ގަސްމުށި ފަދަ ތަކެތި ރައްކާތެރިކުރުން
ގޭތެރޭގައި ފެންބޮޑުވެދާނެ ކަމަށް ވެލިބަސްތާ ޖެހުން
ބޭނުން ނުކުރާނަމަ ކަރަންޓުން ބޭނުންކުރާ ތަކެތި ނިއްވާލާފަ ބެހެއްޓުން
އުދައަރާފާނެ ކަމަށް ރައްކާތެރިކަމުގެ ފިޔަވަޅު އެޅުން
ކާޑުގެ ބާވަތްތަކާއި ޒަރޫރީ ތަކެއްޗަށް ދަތިނުވާނެ ގޮތަށް ދުރާލާ އިންތިޒާމްތައް ހަމަޖެއްސުން
ބޯކޮށް ވާރޭވެހި ރަށްރަށުގެ އިތުރަށް މާލޭގެ މަގުތަކުގައި ވަރަށް ބޮޑަށް ފެން ބޮޑުވެގެން ފެން ހިންދުމަަށް އެމްއެންޑީއެފް ފަޔަރ އެންޑް ރެސްކިޔު ސަރވިސްއިން މާލޭގެ 3 ސަރަހައްދެއްގައި 11 ޕަންޕު ބަހައްޓައިގެން ދަނީ މަސައްކަތް ކުރަމުންނެވެ.
