ފިޔަލަކީ އޭގައި ގިނަ އަދަދަކަށް ސިއްހީ ފައިދާތައް އެކުލެވޭ ތަރުކާރީގެ ބާވަތެކެވެ. ފިޔަަލަކީ ހިތުގެ ސިއްހަތު ރަނގަޅުކޮށްދިނުމާއި، ލޭ ދައުރުވުން ރަނގަޅުކޮށްދިނުމާއި، ކަށީގެ ޑެންސިޓީ އިތުރުކޮށްދޭ އެއްޗެކެވެ.
ދިވެހިންނަކީ ޒަމާނުއްސުރެ ދިވެހި ކެއުމުގައި ރޯ ފިޔާ ކައި އުޅުނު ބައެކެވެ. ނަމަވެސް މިއަދު ފެންނަނީ ކުޑަކުދިންނާ ބޮޑެތި މީހުންގެވެސް ކޮންމެވެސް ވަރަކަށް ފިޔަލާއި ދުރުވެފައިވާ މަންޒަރެކެވެ. ފިޔާ ކާހިތް ނުވުމާއި އަދި ކެއުމުގައި އެއްވެސް ވަރަކަށް ފިޔާ ނުހިމަނާވެސް ކުދިންގެ ކެއުންތައް ތައްޔާރުކޮށްދޭ މައިންބަފައިން އުޅެއެވެ.
މި ލިޔުމުގައި މި ބަލާލަނީ ފިޔާ ކެއުމުގެ މުހިންމު ކަމަށެވެ. ފިޔަލުން ލިބޭ ސިއްހީ ފައިދާތަކަށެވެ. ގަދީމީ ޒަމާނުގައި ގްރީސްގެ އެތްލީޓުން އެމީހުންގެ ހަށިގަނޑުން ލޭ ސާފުކުރުމަށް ފިޔާ ބޭނުން ކުރިއެވެ. އަދި ބޭސްވެރިންނާއި ޑޮކްޓަރުން ލަފާދޭ ގޮތުގައި ފިޔަލަކީ ބޮލުގެ ރިހުންތަކާއި، ހިތުގެ ބަލިތަކާއި، އަނގައިގެ ބަލިތަކުން ފަސޭހަކޮށްދިނުމަށް އެހީވެދޭ ތަރުކާރީއެކެވެ.
ނިއުޓްރްރިއަންޓްސް އިން މުއްސަނދިވެފައިވާ ބާވަތެއް
ހެޔޮ އަގުގައި ބާޒާރުން ލިބެން ހުންނަ ފިިޔަަލަކީ ވިޓަމިންސް އާއި ފައިބަރ އަދި މިނެރަލްސް އެކުލެވޭ އެއްޗެކެވެ. މެދު ސައިޒުގެ ފިޔަލެއްގައި ގާޓްގަނޑަކަށް އެކުލެވޭނީ 44 ކެލަރީއެވެ. ޕޮޓޭސިއަމް އާއި ވިޓަމިންސީ އަދި ޕްރޮޓީންސްވެސް އޭގައި ހިމެނެއެވެ.
ގިނަ އަދަދަކަށް ވިޓަމިން ސީ އެކުލެވިގެންވާތީ ފިޔަކަކީ އިމިއުން ސިސްޓަމް ރެގިއުލޭޓް ކުރުމާއި، ކޮލާޖެން އުފެއްދުމަށް އެހީތެރެވެދޭ ދަނގަނޑުގެ މާއްދާ ހަށިގަނޑަށް ފޯރުކޮށްދޭ އަދި އެންޓިއޮކްސިޑެންޓު ގިނަ އެއްޗެކެވެ.
ފިލަޔަލީ ވިޓަމިން ބީ އިން މުއްސަނދިވެފައިވާ، އޭގައި ފޮލޭޓް އަދި ވިޓަމިން ބީ 6 ވެސް ހިމެނޭ އެއްޗެކެވެ.
ފިލަޔަކީ ހަށިގަނޑަށް މުހިންމު މާއްދާއެއް ކަމަށްވާ ޕޮޓޭސިއަމް ލިއްބައިދޭ ވަރަށް ރަނގަޅު އެއްޗެކެވެ. މި މިނަރަލަކީ ސެލިއުލާ ފަންކްޝަނާއި، ފުލުއިޑް ބެލެންސް، ނާވް ޓްރާންސްމިޝަން، ކިޑްނީ ފަންކްޝަން އަދި މަސްގުޅަކެއުންފަދަ ކަންކަމުން ދުރުވުމަށް އެހީވެދޭ މިނަރަލެކެވެ. ސިއްހީ މާހިރުން އިރުޝާދުދޭ ގޮތުގައި ދުވާލަކަށް ހަށިގަނޑަށް ބޭނުންވާ މިންވަރަށް ޕޮޓޭސިއަމް ހޯދުމަށް ކޮންމެ ދުވަހެއްގެ ކެއުމުގައިވެސް ފިޔާ ހިމެނުން މުހިންމެވެ.
ފިޔަލަކީ ހިތުގެ ސިއްހަތު ރަނގަޅު ކުރުމަށްވެސް އެހީވެދިނުމަށް އެކަށީގެންވާ މާއްދާތައް އެކުލެވޭ އެއްޗެކެވެ. ފިޔަލުގައި ހިމެނޭ އެންޓިއޮކްސިޑެންޓްގެ ސަބަބުން ހިތުގެ ބަލިތަކާއި ދެކޮޅަށް ހަނގުރާމަ ކުރުމާއި، ލޭ ހޮޅިތަކުގައި ޖަހާފައިވާ ސަރުބީތައް ވިރުވާލަދީ ކޮލެސްޓްރޯލް ލެވެލް ދަށްކޮށްދިނުމަށްވެސް ފިޔާ އެހީވެދެއެވެ. އަދި ލޭ މައްޗަށްދާ ނަމަ އެކަން ދަށް ކުރުމަށްވެސް ފިޔާ އެހީވެދެއެވެ.
އެމެރިކާގައި 2016 ވަނަ އަހަރު ހަދާފައިވާ ދިރާސާއަކުން ފާހަގަވެފައިވާ ގޮތުގައި ޕޮލިސިސްޓިކް އޯވަރީ މައްސަލަ ހުންނަ 54 އަންހެނުން 80-120 ގްރާމާ ދެމެދުގެ ރޯ ފިޔާ ކޮންމެ ދުވަހަކު 8 ހަފްތާ ވަންދެން ބޭނުން ކުރުމުން އެމީހުންގެ ހަށިގަނޑުގައިވާ ގޯސް ކޮލެސްޓްރޯލޭ މި ކިޔާ އެލްޑީއެލް ކޮލެސްޓްރޯލް ލެވެލް ދަށްވިއެވެ. އެހެންނަމަވެސް މިކަމަށް ބާރު ލިބޭ އަދި އިތުރު އެހެން ދިރާސާތައްވެސް ބޭނުންވެއެވެ.
17 ވައްތަރެއްގެ އެންޓިއޮކްސިޑެންޓް ފިޔަލުގައި ހިމެނޭއިރު މިއީ ކެންސަރާއި، ހަކުރު ބައްޔާއި، ހިތުގެ ބަލިތަކުން ރައްކާތެރިވުމަށް އޮތް ފަރުވާއެކެވެ. ކެންސަރާއި ދުރުކޮށްދޭ މާއްދާތައް ފިޔަލުގައި ހިމެނެއެެވެ. އެހެންކަމުން ފިޔަލާއި ލޮނުމެދު ކަހަލަ ތަރުކާރީއަކީ ބަނޑާއި، ކޮލޮރެކްޓަލް ކެންސަރު އުފެދުމުގެ ނުރައްކާ ކުޑަކޮށްދޭ ބާވަތްތަކެވެ. އަދި ޓިއުމަރު އުފެދުންފަދަ ކަންކަމުންވެސް ދުރުކޮށްދެއެވެ.
ހަކުރުބަލީގެ މީހުންނާއި، ހަކުރުބައްޔަށް ހުށަހެޅުމުގެ ފުރުސަތު ބޮޑު މީހުންނަށް، ކެއުމުގައި ފިޔާ ހިމަނާނަމަ ބްލަޑް ޝުގާ ރެގިއުލޭޓްކޮށްދެއެވެ. މީގެ އިތުރުން ކަށިތައް ވަރުގަދަ ކުރުމަށްވެސް ފިޔާ އެހީވެދެއެވެ. އަދި ހަޖަމުގެ މައްސަލަތަކުން ދުރުކޮށްދިނުމަށްވެސް ފިޔާ އެހީވެދެއެވެ.
މައުލޫމާތު ނަގާފައިވަނީ: ހެލްތްލައިން
