އައްޑޫ ސިޓީ ފޭދޫ އަށް އުފަން މަރްޔަމް ސިވާ އަށް ދިމާވެފައިވަނީ ތަފާތު ހާލަތެކެވެ. ވަޒީފާއާއި ދިރިއުޅުމަށް ކުރާ ފޮނި އުންމީދުތަކަށް ހުރަސް އެޅިފައިވަނީ ސިވާގެ މިބައްޔެވެ. ތައްޔާރުވަމުން އެދަނީ އިތުރު ފަރުވާއަށް އިންޑިއާއަށް ފުރުމަށެވެ. ބަލީގެ ހާލަތު ހުރިގޮތުން ލޭގެ ކެންސަރ ހުރިކަން ނުވަތަ ނޫންކަން އިތުރަށް ޔަގީންވާން އޮތީވެސް އިންޑިއާއަށް ދެވިގެންނެވެ.
'ޒީޓައިމްސް' އަށް ސިވާ ވަނީ ވަރަށް ތަފްސީލުކޮށް އޭނާގެ ހާލަތު ކިޔައިދީފައެވެ. އެންމެ ފުރަތަމަ ރަށުގައި ދިރިއުޅުނުއިރު ހެދި ޓެސްޓްތަކުން ޕްލެޓްލެޓް ހުރި މިންވަރު މަތިވިއަސް އެއީ މައްސަލައެއް ނޫންކަމަށް އެއިރު ޑޮކްޓަރު ވިދާޅުވިކަމަށް ސިވާ ވަނީ ބުނެފައެވެ. އެކަމަކު އާއިލާއާއެކު އިންޑިއާއަށް ދިޔަ ފަހަރެއްގައި ހެދި ޓެސްޓްތަކުން ޕްލެޓްލެޓް މާމަތިވެފައި ހުރިކަމަށް ދެއްކުމުން ބޭސްކުރަން ފެށީއެވެ.
" ލޭގައި ޕްލެޓްލެޓް ހުންނަވަރު މާމަތިވަނީ. އެހެންވެ ތްރޮމްބޮސައިޓްސިސް އަށް ބޭސް ކުރަމުން އައީ. ޝައްކުވީ ލޭގެ ކެންސަރ ކަމަށް.. އެކަމަކު 2013 ވަނަ އަހަރު ހެދި ކެންސަރ ޔަގީންކުރާ ޓެސްޓުން ނެގެޓިވް. އެއިރު ބޭސްކައިފަ ރަނގަޅުވިތާ 3 އަހަރު ފަހުން ކުއްލިއަކަށް ބޮލުގައި ރިއްސާ ހޮޑުލާތީ އަނެއްކާވެސް އެ ޓެސްޓް ހެދިއިރު ހުރީ ދުވަހަކު މަތި ނުވާ ވަރަށް މަތިވެފަ. 1 މިލިއަނަށްވުރެ މަތީގައި ހުރީ".
އެއީ މިދިޔަ 2024 ވަނަ އަހަރުގެ ޖުލައިމަހެވެ. އަވަސް ފަރުވާއަށް އިންޑިއާ އަށް ގޮސް ފަރުވާ ހޯދުމަށްފަހު އަނބުރާއައީ ރާއްޖެއަށެވެ.
" ޑޮކްޓަރު ބުނީ އެއިރު ހުރިވަރަށްވުރެ މައްޗަށް ޕްލެޓްލެޓްސް ގޮއްސިއްޔާ ބްލަޑް ކެންސަރ އަށް ވާނެ ކަމަށް. ބޭސްދީފަ ފޮނުވީ. ރާއްޖެއައިސް މާގިނަ ދުވަހެއް ނުވަނީސް ހަމައެގޮތަށް ބޮލުގައިރިއްސާ ހޮޑުލެވެން ފެށީމަ މިދިޔަ ޑިސެންބަރުމަހު ޓެސްޓް ހެދިއިރު މިއިންނަނީ 1.8 މިލިއަނަށް ޕްލެޓްލެޓްސް މަތިވެފައި. އިންޑިއާއަށް ދާން ބުނީ އިތުރު ފަރުވާއަށް. އެކަމަކު އަޅުގަނޑުމެން ރާއްޖެއައިތާ އަދި 6 މަސްނުވޭ. ކިހިނެއްތޯ ކުއްލިއަކަށް އެހެންދާނީވެސް. އާސަންދަ އެންސްޕާގެ އެހީތެރިކަން ލިބުނަސް އަމިއްލައަށް ކުރަންޖެހޭ ޚަރަދުތައް ހުރޭ".
މިދިޔަ ޑިސެންބަރުމަހުގެ 15 ވަނަ ދުވަހު އައިޖީއެމްއެޗްއިން ސިވާ އަށް ދީފައިވާ ލިޔުމުގައިވާ ގޮތުން ޕްލެޓްލެޓް ކައުންޓް ހުރީ 1841000 ގައެވެ. އެއަށްފަހު ހެދި ޓެސްޓުން 2 މިލިއަނަށް ޕްލެޓްލެޓް ކައުންޓް އަރާފައިވާ ކަމަށް ސިވާ ވަނީ ބުނެފައެވެ. އަދި ވީހާވެސް އަވަހަކަށް ރާއްޖެއިން ބޭރަށް އިތުރު ފަރުވާއަށް ދިއުމަށް ޑޮކްޓަރު ވަނީ ލަފާދީފައެވެ.
" މިފަހަރު ޖެހެނީ އެންމެފުރަތަމަ ގޮއްސަ ޕްލެޓްލެޓް ނަގާފަ މަދުކުރަން. ފިރިމީހާގެ އިތުރުން މަންމަވެސް ގޮވައިގެން ދާންޖެހެނީ. ޑޮކްޓަރ ވިދާޅުވީ ނުނަގައިފިނަމަ ލޭ ގަނޑުވެ ސިކުނޑިއަށް ގޮއްސިއްޔާ ވަގުތުން މީހާ މަރުވުމުގެ ފުރުސަތު އެބައޮތޭ. ނުވަތަ ކިޑްނީ އަދި ލިވަރ ފެއިލްވުން ނޫނީ ހާރޓްއެޓޭކް ޖެހުމުގެ ފުރުސަތު އެބައޮތޭ. އެހެންވެ ނެގުމަށްފަހު ފަރުވާ އިތުރަށް ކުރިއަށްގެންދެވެން އޮތީ" ހިތްދަތިކަމާއެކު ހާލަތު ކިޔައިދެމުން ސިވާ ބުންޏެވެ.
ސިވާ ފުރަން ހަމަޖެހިފައިވަނީ މިހަފްތާގެ ބުދަ ދުވަހު (ޖެނުއަރީ 8 ވަނަ ދުވަހު)ގައެވެ. އިތުރު ފަރުވާއަށް އިންޑިއާގައި ހޭދަވާނެ ދުވަހެއްވެސް ނޭނގެއެވެ.
'ޒީޓައިމްސް'ގެ ކިޔުންތެރިންގެ ކިބައިން އެދެނީ ސިވާގެ ބޭސްފަރުވާ ފުރިހަމަކުރުމަށް އެހީތެރިކަން ފޯރުކޮށްދިނުމަށެވެ.
ދިވެހި ރުފިޔާގެ އެކައުންޓް ނަންބަރު: 7730000111349 (މަރްޔަމް ސިވާގެ އެކައުންޓް ނަންބަރު)
ޑޮލަރު އެކައުންޓް ނަންބަރު: 7730000608730 (ސިވާގެ ފިރިމީހާ މާޒިން އަބްދުއްލަތީފްގެ އެކައުންޓް ނަންބަރު)
އިތުރު މައުލޫމާތު ހޯދުމަށް ގުޅޭނެ ނަންބަރު: 7960272
ސިވާ އަށް އަވަސް ޝިފާއެއް މިންވަރު ކުރެއްވުން އެދެމެވެ. އާމީން!
ނޯޓް: މިއީ ޒީޓައިމްސް އިން ގެނެސްދިން މިފަދަ އެހީގެ 44 ވަނަ ރިޕޯޓެވެ. އިންސާނިއްޔަތަށްޓަކައި ކުރާ މިމަސައްކަތުގައި ކިޔުންތެރިން ދެއްވާ އެއްބާރުލުމަށް ޝުކުރު އަދާކުރަމެވެ. މިގޮތަށް ލިބޭ އެހީ ޖަމާވާނީ ބަލިމީހާގެ އެކައުންޓަށެވެ.
