ކައުންސިލްތަކަށް އާމްދަނީ ހޯދައިދިނުމަށް ރަށާ ކައިރި ފަޅުރަށްތަކުގައި އިންޓަރ ގްރޭޓެޑް ޓޫރިޒަމް ހިންގޭނެ ގޮތަށް ހަމަޖެއްސެވުމަށް މަސައްކަތް ކޮށްދެއްވާނެކަމުގައި ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވަނީ ވިދާޅުވެފައެވެ. ރައީސް މިގޮތަށް ވިދާޅުވީ މިއަދު ހޯނޑެއްދޫ ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުންނެވެ.
ރައީސް އިތުރަށް ވިދާޅުވީ ކައުންސިލްތަކަށް އާމްދަނީ ލިބޭނެ މަގު ފަހިކޮށްދެއްވުމަށް ސަރުކާރުން ކުރެވެންހުރި މަސައްކަތެއް ކުރާނެ ކަމަށެވެ. އަދި ހޯނޑެއްދޫއަށް ދިމާވެފައިވާ ރަށްގިރުމުގެ މައްސަލައަށާއި، އުދައެރުމުގެ މައްސަލައަށް މިއަހަރުގެ ބަޖެޓުގެ ތެރެއިން ދާއިމީ ގޮތަކަށް ހައްލު ހޯދައިދެއްވާނެކަމަށާއި، ތަޢުލީމާއި ސިއްހީ ދާއިރާ ކުރުއެރުވުމަށާއި، ކުޅިވަރުގެ އެކި ވަސީލަތްތައް ޤާއިމުކުރުމަށް މަސައްކަތް ކުރައްވާނެކަމަށް ވެސް ވިދާޅުވިއެވެ.
" ރަށްގިރުމުގެ އަދި އުދައެރުމުގެ މައްސަލައަކީ ގުދުރަތީގޮތުން ރަށަށް ދިމާވެފައިވާ ބޮޑު މައްސަލައެއް. އެކަން ހައްލުކޮށްދިނުމަކީ އިންތިޚާބުގެ ތެރޭގައި ވީވައުދެއް. މިއަހަރުގެ ބަޖެޓުގެ ތެރެއިން އިރާދަކުރެއްވިއްޔާ ދާއިމީގޮތަކަށް ރަނގަޅުހައްލެއް ގެނެސްދޭނެކަމުގެ ޔަގީންކަން އަރުވަން" ރައީސް ވިދާޅުވިއެވެ.
މިއަހަރުގެ ބަޖެޓަކީ ގެދޮރުވެރިކަމާއި ހައުސިންގ މަޝްރޫޢުތައް ފެށުމުގެ ބަޖެޓެއްކަން ފާހަގަކުރައްވައި ރަށްރަށުގައި ވެވަޑައިގެންފައިވާ ގެދޮރުވެރިކަމުގެ މަޝްރޫޢުތައްވެސް މިއަހަރު ކުރިއަށް ގެންދަވާނެކަމުގައި ރައީސް ވިދާޅުވިއެވެ. އެގޮތުން ހޯނޑެއްދޫގެ ހައުސިންގ މަޝްރޫޢުވެސް ކުރިއަށްގެންދަވާނެކަމުގެ ޔަގީންކަން ދެއްވިއެވެ.
ރައީސް ހޯނޑެއްދޫއަށް ވަޑައިގެންނެވި ދަތުރުފުޅުގައި އެރަށުގެ ފެނާއި ނަރުދަމާ ނިޒާމުގެ މަޝްރޫޢު، ރައީސުލްޖުމްހޫރިއްޔާ ވަނީ ރަސްމީކޮށް އިފުތިތާހުކޮށްދެއްވާފައެވެ. އަދި ބޭންކް އޮފް މޯލްޑިވްސް އިން ހޯނޑެއްދޫގައި އޭ.ޓީ.އެމް އެއް ބެހެއްޓުމުގެ މަސައްކަތް ފެށުމަށްޓަކައި، އެއްބަސްވުމުގައި ސޮއިކުރެއްވުންވެސް ވަނީ ކުރިއަށްގެންގޮސްފައެވެ.
