ހުޅުމާލޭގެ ދެވަނަ ފިޔަވަހީގައި ޤާއިމްކޮށްފައިވާ 132 ކޭ.ވީ ގެ ހައިވޯލްޓޭޖް ސަބްސްޓޭޝަން ގްރޭޓާމާލެ އިންޓަކެންކްޝަން ގްރިޑާއި ގުޅާލުމަށް ސްޓެލްކޯއިން ކުރި މަސައްކަތް ވަނީ ކާމިޔާބުކަމާއެކު ނިންމާލާފައެވެ. މިމަސައްކަތް ކުރިއަށްގެންދިއުމަށްޓަކައި މާލޭގެ 10 ސަރަހައްދަކުން ކަރަންޓްގެ ޚިދުމަތް މެދުކަނޑާލަން ޖެހޭނެކަމަށް ކުރިން އަންދާޒާ ކުރެވުނު ކަމުގައިވިއަސް މޫސުން ތަންދިނުމާއެކު ކަރަންޓް ކަނޑާލާފައިވަނީ މާލޭގެ 2 ސަރަހައްދަކުން 1 ގަޑިއިރަށްވުރެ މަދު ވަގުތުކޮޅަކަށެވެ.
ސްޓެލްކޯގެ ޖެނެރަލް މެނޭޖަރ އިބްރާހީމް ނާޝިދު މައުލޫމާތު ދެއްވިގޮތުގައި މިމަސައްކަތުގެ ފަހުގެ މަރުހަލާ ފެށީ އިއްޔެ ހެނދުނުގެ ވަގުތެއްގައެވެ.
" ސަބްސްޓޭޝަންގެ މެއިން ކޭބަލްތައް ޓެސްޓްކޮށް މިއަދަށް ވާންޖެހޭ ތައްޔާރީތައް ވެފަހުރީ. މިއަދު ހެނދުނު މަސައްކަތް ފެށީ 6 ޖެހިއިރު. ވަރަށް އޮމާންކަމާއެކު އެމަސައްކަތް ނިންމާލެވުނީ 7:35 ގައި. މި ސަބްސްޓޭޝަންގައި އިތުރަށް ކުރަން ހުރީ ދެވަނަ ފިޔަވަހީގައި ގާއިމްކޮށްފައި ހުރި ކޭބަލްތައް ސަބްސްޓޭޝަނަށް ބަދަލުކުރުން. ކާމިޔާބުކަމާއެކު މަސައްކަތް ނިންމާލެވުނީ އަޅުގަނޑުމެންގެ އިންޖިނޭރުންނާއި ކޮންޓެކްޓަރުންނާއި މިމަސައްކަތުގައި ބައިވެރިވި އެންމެންގެ ވަރަށްބޮޑު އެއްބާރުލުމާއެކު". ނާޝިދު ވިދާޅުވިއެވެ.
ސްޓެލްކޯގެ ޚިދުމަތް އިތުރަށް ފުރިހަމަ ކުރުމަށްޓަކައި ކުރާ މިފަދަ މަސައްކަތްތަކުގައި ކަސްޓަމަރުންގެ ފަރާތުން ދޭ އެއްބާރުލުމަށް އެކުންފުނިން ވަނީ ޝުކުރު އަދާކޮށްފައެވެ.
