ފަލަސްޠީނުގެ ބިމަކީ މުސްލިމުންގެ ހިތްތަކުގައި ޚާއްސަ ލޯތްބަކާއި ޤަދަރެއް ދެވިފައިވާ މާތް ބިމެކެވެ. ފަލަސްޠީނުގެ ބިމަކީ ނަބީ ބޭކަލުން އެތަނުގައި އުޅުއްވުމުގެ ޝަރަފް ލިބިފައިވާ ބިމެކެވެ. އުސްބިންތަކާއި ވާދީތަކުން ފުރިފައިވާ ބިމެކެވެ. ފަލަސްޠީނުގެ ބިމުން ބޮޑު ބައެއްގައި އިސްރާއީލުގެ ނަމުގައި ޔަހޫދީ ދައުލަތެއް ޤާއިމް ކުރީ 1948 ވަނަ އަހަރުގައެވެ.
ފަލަސްޠީނުގެ ރައްޔިތުން ވޭތުވެދިޔަ އަހަރުތަކުގައި ދިރިއުޅެމުން އައީ އިސްރާއީލުގެ އަނިޔާވެރިކަމަށް ކެތްކޮށްގެންނެވެ. 2023 ވަނަ އަހަރުގެ އޮކްޓޯބަރުމަހުގެ 7 ވަނަ ދުވަހު ފަލަސްޠީނުގެ ހަމާސްއިން އިސްރާއީލަށް ދިން ކުއްލި ހަމަލާއެއްގައި އިސްރާއީލުގެ 250 އަށް ވުރެ ގިނަ މީހުން ރަހީނު ކުރިއެވެ. އެހަމަލާތަކުގައި އިސްރާއީލުން ހާހެއްހާ މީހުން މަރުވެފައިވާ ކަމަށް ރިޕޯޓް ކޮށްފައިވެއެވެ.
ހަމާސްގެ މިހަމަލާއަށްފަހު އިސްރާއީލުން ވަރުގަދަ ހަމަލާތަކެއް ފަލަސްޠީނުގެ ޣާޒާ އަށް ވަނީ ދީފައެވެ. މިހާތަނަށް ފަލަސްޠީނުގެ 46000 މީހުން ޝަހީދުކޮށް އެއްލައްކައަށްވުރެ ގިނަ މީހުން ޒަޚަމްކޮށް އެތައްހާސް ބަޔަކު ދިރިއުޅެމުން އައި ގެތައް ބިމާއި ހަމަކޮށްފައިވެއެވެ. މިއީ ފަހުގެ ތާރީޚެއްގައި ފެނުނު ގިނަ ދުވަހަށް ދިގުދެމިގެންދިޔަ މިފަދަ ލާއިންސާނީ ހަމަލާތަކެވެ.
ފަލަސްޠީނުގެ ރައްޔިތުން އެއުޅޭ ދަތި ހާލަތުން ސަލާމަތްކުރުމަށް މުޅި ދުނިޔެ ވަނީ ނުކުޅެދިފައެވެ. އިސްރާއީލުން ދިޔައީ އެމީހުންގެ ބާރު ޣާޒާގައި ވަރުގަދަ ކުރަމުންނެވެ. އިންޓަނޭޝަނަލް ކޯޓް އޮފް ޖަސްޓިސްގެ އަމުރަކަށްވެސް ތަބާނުވިއެވެ.
އެމެރިކާ އަޑީގައި އޮވެގެން އިސްރާއީލުން ކުރިއަށްގެންދިޔަ ނަސްލު ނައްތާލުމުގެ މި ހަމަލާތައް ހުއްޓާލަން މިނިންމީ އެމެރިކާގެ ކެލިފޯނިއާގެ ލޮސް އެންޖެލިސް ސިޓީގެ 10،000 އަށްވުރެ ގިނަ އިމާރާތް އަނދާ ހުލިވެ އެތައްހާސް ބައެއްގެ ގެދޮރު ގެއްލި މި އަލިފާންގަނޑު ކޮންޓްރޯލުނުވެ ގެއްލުންތައް ލިބެމުންދާ ވަގުތެއްގައެވެ. ގުދުރަތީ ގޮތުން ރޯވި އަލިފާނަކީ ދުނިޔޭގެ އެންމެ ބޮޑު ބާރުކަމަށް ވަކާލާތުކުރާ އެމެރިކާ ފަހަތަށް ޖެހެން މެދުވެރިވި ބިރުވެރިކަމުގެ ސިގުނަލް ކަމަށް ގިނަބަޔަކު ދެކެއެވެ.
ފަލަސްޠީނުގެ ޣާޒާގައި ދެމުންއައި ހަމަލާތައް ހުއްޓާލާ އަދި ހަމާސްއިން ރަހީނު ކޮށްފައިވާ އިސްރާއީލު މީހުން މިނިވަން ކުރުމަށް ދެފަރާތުން އެއްބަސްވީ އިއްޔެގެ ވަގުތެއްގައި ކަމަށް މީޑިއާއިން ރިޕޯޓް ކޮށްފައިވެއެވެ. މި އެއްބަސްވުމުގެ ދަށުން އިސްރާއީލުން ރަހީނުކޮށްފައިވާ ފަލަސްޠީނުގެ ރައްޔިތުންވެސް މިނިވަން ކުރުމަށް ވަނީ އެއްބަސްވެފައެވެ.
އެއްބަސްވުމުގެ ފުރަތަމަ މަރުހަލާގައި އަމަލުކުރަން ބުނެފައިވާ ގޮތަށް ފަލަސްޠީނުގެ ރައްޔިތުން ދިރިއުޅެމުންދާ އާންމު ސަރަހައްދުތަކުން އިސްރާއީލު ސިފައިން ފޭބުމަށް ނިންމުމަކީ ވެސް އެރައްޔިތުންނަށް ލިބޭނެ އަމާންކަމެކެވެ. ފަލަސްޠީނުގެ ރައްޔިތުން ދަނީ މަގުތަކަށް އެއްވެ އުފާ ފާޅުކުރަމުންނެވެ. އަދި މުސްލިމް ޤައުމުތަކުން ދަނީ މަރުހަބާ ކިޔަމުންނެވެ.
މުސްލިމުންގެ ސަފުތައް އިތުރަށް ބަދަހި ކުރައްވައި ފަލަސްޠީނުގެ ލޮބުވެތި އަޚުންނާއި އުޚުތުންނަށް ކާމިޔާބާއި އަމާން ދުވަސްތަކެއް މިންވަރު ކުރައްވާށި. އާމީން!
ކިޔުންތެރިންގެ ހިޔާލު
ماشاءالله تبارك الله رب العالمين.امين الحمدلله