ފަލަސްޠީނުގެ ޣައްޒާ އާއި އިސްރާއީލާއި ދެމެދު ހަނގުރާމަ ހުއްޓާލުމަށް ވެފައިވާ އެއްބަސްވުމަށް އަމަލުކުރަން ފަށާނީ އާދީއްތަ ދުވަހުގެ ހެނދުނު 08:30 އިން ފެށިގެން ކަމަށް ޤަތަރުގެ ހާރިޖީ ވަޒީރުގެ ތަރުޖަމާނު އިއުލާން ކުރައްވައިފިއެވެ.
ވަގުތީގޮތުން ހަނގުރާމަ ހުއްޓާލުމުގެ އެއްބަސްވުން އެކުލަވާލުމުގައި ޤަތަރުވެސް ބައިވެރިވެފައިވާއިރު އެގައުމުގެ ހާރިޖީ ވަޒީރުގެ ތަރުޖަމާނު އެކްސްގައި ވިދާޅުވެފައިވަނީ އެ އެއްބަސްވުމަށް އަމަލު ކުރަން ފަށާނީ އާދިއްތަ ދުވަހުގެ ހެނދުނު ކަމަށާއި އެކަމަށް ސަމާލުވެ ރައްކަތެރިވެ ތިބުމަށް އިލްތިމާސް ކުރާ ކަމަށާއި އޮފިޝަލުންދޭ އިރުޝާދަށް ތައްޔާރުވެ ތިބުމަށް އެދޭ ކަމަށެވެ.
ވަގުތީ ގޮތުން އުދުވާންތައް ހުއްޓާލުމަށް މިއަދު އިސްރާއީލު ސަރުކާރުން އެއްބަސްވީ ބޮޑުވަޒީރު ނަތަންޔާހޫ އާއި އިސްވެރިންގެ މެދުގައި ބޭއްވި 6 ގަޑިއިރުގެ ދިގު ބައްދަލުވުމަކަށްފަހުގައެވެ.
އިސްރާއީލާއި ހަމާސް އިން ވަގުތީ ގޮތުން ހަނގުރާމަ ހުއްޓާލުމުގެ އެއްބަސްވުމަކާއި ހަމައަށް އައިސްފައިމިވަނީ 460 ދުވަހަށްވުރެ ގިނަ ދުވަހު ހަމަލާތައް ބަދަލުކުރުމަށްފަހު އިސްރާއީލުން ދިން ހަމަލާތަކުގައި 46،788 ފަލަސްތީނު ރައްޔިތުން ޝަހީދުކޮށް 110،453 ރައްޔިތުން ޒަހަމް ކޮށްލުމަށްފަހުގައެވެ.
ވަގުތީ ގޮތުން ހަމަލާ ބަދަލުކުރުމުގެ އެއްބަސްވުމާއިއެކު ކުރިޔަށް އޮތް ހައެއްކަ ހަފްތާގެ ތެރޭގައި ހަމާސްއިން އަސީރުންގެ ގޮތުގައި ހިފަހައްޓާފައިވާ 33 މީހުންނާއި އިސްރާއީލުން ހައްޔަރުކޮށްފައިވާ އެތައްސަތޭކަ ފަލަސްތީނު ރައްޔިތުން ދޫކޮށްލަން ޖެހޭނެއެވެ.
ހަމާސްއިން ބުނީ ބާކީތިބި އަސީރުން ދޫކޮށްލާނީ އެއްކޮށް ހަނގުރާމަ ހުއްޓާލާ އިސްރާއީލު ސިފައިން ޣައްޒާއިން ފޭބުމުން ކަމަށެވެ.
ހަނގުރާމަ ހުއްޓާލުމުގެ އެއްބަސްވުމަށް އަމަލުކުރަން ފެށުމާއިދޭތެރޭ މިއޮތް ގަޑިއިރުތަކުގެ ތެރޭގައި އިސްރާއީލުން ޣައްޒާއަށް އިތުރު ހަމަލާތައް ދޭނެ ކަމަށް ބައެއް ރިޕޯޓްތައް ބުނެއެވެ. އަދި ކުރިޔަށް އޮތީ ބިރުވެރި ވަގުތުތަކެއް ކަމަށް ބައެއް ނޫސްވެރިން ލަފާކުރެއެވެ. ސަބަބަކީ ފާއިތުވެ ދިޔަ ތަނުގައި މިގޮތަށް ސީސްފަޔަރ އަކަށް އެއްބަސްވާ ކޮންމެ ބުރެއްގައިވެސް އިސްރާއީލުން ޣައްޒާއަށް ވަރުގަ ހަމަލާތަކެއް ދީފައިވާތީއެވެ.
ދެފަރާތުން ހަމަލާ ބަދަލުކުރުން ވަގުތީގޮތުން މެދުކަނޑާލުމަށް އެއްބަސްވި ނަމަވެސް އިއްޔެ އާއި މިއަދުވެސް އިސްރާއީލު ސިފައިން ގެންދަނީ ޣައްޒާއަށް ވަރުގަދަ ހަމަލާތައް ދެމުންނެވެ. މިއަދު ހެނދުނު ހާން ޔޫނިސްއަށް ދިން ހަމަލާތަކެއްގައިވެސް ހިއުމެނިޓޭރިއަން ޒޯނެއްކަމުގައިވާ އަލް މަސާވީގައި 5 މީހުން ވަނީ ޝަހީދުކޮށްލާފައެވެ. ހަނގުރާމަ ހުއްޓާލުމުގެ ވަގުތީ އެއްބަސްވުން ބުދަދުވަހު އިއުލާނު ކުރިފަހުން މިހާތަނަށް އިސްރާއީލު ސިފައިން ދިން ހަމަކާތަކުގައި 119 މީހުން ވަނީ ޝަހީދުކޮށްލާފައެވެ.
