ޖެނުއަރީ 19، ވީ އާދީއްތަ ދުވަހަކީ ޣައްޒާއަށް އަދި މުޅި އިސްލާމީ އުންމަތަށްވެސް އުފާވެރި ދުވަހެކެވެ. އަހަރަކަށްވުރެ ދިގުލައިގެން ދިޔަ ޤަތުލުއާންމު ވަގުތީ ގޮތުން ހުއްޓާލާ ޣައްޒާގެ ރައްޔިތުންނަށް ހަމަނޭވާލާނެ ފުރުސަތު ފަހިވި ދުވަހެވެ. މަގުތަކަށް ބިރެއް ނެތި ނިކުމެ އެއްވެ އުޅެން ލިބިފައިވާއިރު ޣައްޒާއިން މިހާރު އިވެނީ އުފާފާޅުކުރުމަށް ވައިގެ ތެރެއަށް ބަޑި ޖަހާ އަޑެވެ. ބޮން އަޅާ އަޑެއް ނޫނެވެ. މަގުތަކުން އިވެނީ ތަކްބީރުގެ އަޑެވެ. ހަމްދު ކުރާ އަޑެވެ. ތުއްތު ކުދިންގެ މޫނުމަތިންވެސް 15 މަސް ދުވަހުގެ ބިރުވެރިކަން ފިލާ ފާޅުވަނީ ހިނިތުންވުމެވެ.
ހަމާސް އާއި އިސްރާއީލާ ދެމެދު ވަގުތީ ގޮތުން ހަނގުރާމަ ހުއްޓާލުމަށް ވީ އެއްބަސްވުމަށް އަމަލުކުރުން ގަޑިއިރުތަކަކަށް ލަސްކުރި ނަމަވެސް މިހާރު ވަނީ ހަމަލާ ބަދަލުކުރުން ހުއްޓާލާފައެވެ. ހަނގުރާމައިގައި އަމިއްލަ ވަޒަން ދޫކޮށް ދިޔަ އެތައްހާސް ބަޔަކު ވަނީ އެމީހުންގެ ފޮށި ތަންމަތި ބަނދެގެން އަމިއްލަ ވަޒަނަށް އެނބުރި އައުމަށް ކެތްމަދުވެފައެވެ. ޓެންޓުތަކުގައި ރެފިއުޖީންގެ ގޮތުގައި ތިބި އެތައްހާސްބަޔަކު އެ ދަތުރު ފަށާފައިވާއިރު، އަލުން އާއިލާތަކާއި އަވައްޓެރިންނާ ބައްދަލުވާނެ ކަމުގެ އުންމީދުގައި އެތައްހާސްބަޔަކު އެބަތިއްބެވެ.
ހަނގުރާމައިގެ ސަބަބުން ގެދޮރު ސުންނާފަތިވެގެން ދިޔައަސް އަލުން އެތަންތަނަށް އާދެވޭތީ އެމީހުން ތިބީ އުފަލުން ފޮޅިފައެވެ. އަލުން ދިރިއުޅުން އާރާސްތުކޮށް ކިޔެވުން ކުރިޔަށް ގެންދަން ބޭނުންވާ ޅަ ކުދިންނާއި ޒުވާނުންނެވެ. ތައުލީމާއި ސިއްހީ ފަރުވާއަށް ނުހަނު ބޭނުންވެފައި ތިބި އެ ރައްޔިތުންގެ ލޮލުން މިއަދު ފެންނަނީ އުންމީދެވެ. ސުންނާފަތިވެފައިވާ އަމިއްލަ ގެދޮރުގެ ގާކުނޑިތަކުގެތެރޭގައިވެސް ޓެންޓް ޖަހައިގެން އުޅެން ޖެހުނަސް ވަރިހަމައެވެ. ބޭނުންވަނީ އަމިއްލަ ގެދޮރެވެ.
ޣައްޒާގައި ކުރިޔަށް ގެންދިޔަ ޤަތުލުއާންމަށް ދާއިމީ ހުއްޓުމެއް އަންނާނެ ކަމުގެ އުންމީދުގައި ތިބި ޣައްޒާގެ ރައްޔިތުން އާދިއްތަދުވަހު އެއްވެ ތިބެ އުފާފާޅު ކުރަމުން އަންނައިރު ހަމާސްގެ އޮފިޝަލުން ވަނީ އިސްރާއީލުގެ ތިން އަންހެން އަސީރުން މިނިވަންކޮށް ރެޑްކްރެސެންޓާއި ހަވާލުކޮށްފައެވެ.
69 އަންހެނުން ހިމެނޭ ގޮތަށް އިސްރާއީލުން ހައްޔަރުކޮށްފައިވާ 90 މީހުން ވަނީ ދޫކޮށްލާފައެވެ. އޭގެތެރޭގައި ކުޑަކުދިންވެސް ހިމެނެއެވެ. އޮފާ ޕްރިޒަން ސަރަހައްދުގައި އިސްރާއީލު ސިފައިން ފޯރިމަރަމުންދާއިރު އިސްރާއީލުގެ ހަރުކަށި ފިކުރުގެ ބަޔަކުވަނީ އެކަމާއި ދެކޮޅަށް މުޒާހަރާވެސް ކޮށްފައެވެ.
ދެން އެންމެ އަވަހަށް އަސީރުން ދޫކޮށްލާނީ އަންނަ ހޮނިހިރު ދުވަހު ކަމަށް ހަމާސްއިން ބުނެއެވެ. އިސްރާއީލުން ބުނީ ދެވަނަ ބުރުގައި އެދުވަހު ހަތަރު އަސީރުން މިނިވަން ކުރާނެ ކަމަށެވެ.
ހަނގުރާމަ ހުއްޓާލުމުގެ އެއްބަސްވުމަށް ދެފަރާތުންވެސް އިހުތިރާމު ކުރާނެ ކަމަށް އުންމީދުކޮށް ބައިނަލްއަގްވާމީ މުޖުތަމައުން އަންނަނީ އެކަމަށް މަރުހަބާ ކިޔާ ޝުކުރު އަދާކުރަމުންނެވެ. ވަކިން ހާއްސަކޮށް ހައިޖާނު ބޮޑު މެދުއިރުމައްޗަށް އަލުން ހަމަޖެހުން ގެނެވިދާނެ ކަމުގެ އުންމީދުގައި އޮތް އަރަބި ދުނިޔެވެސް މި އެއްބަސްވުމަށް މަރުހަބާ ކިޔައެވެ. އެހެންނަމަވެސް އިސްރާއީލުގެ ބޮޑުވަޒީރު ނަތަންޔާހޫ ވިދާޅުވީ ހަނގުރާމަ ވަގުތީގޮތުން ހުއްޓާލިނަމަވެސް ބޭނުންވެއްޖެ ހާލަތެއްގައި އަލުން ހަމަލާދޭން ފެށުމުގެ އިހްތިޔާރު އިސްރާއީލަށް އެބައޮތް ކަމަށެވެ.
ޣައްޒާގެ ރައްޔިތުންނާއި ހަމާސްއިންވެސް އެދެނީ އެއްބަސްވުމާއި އެއްގޮތަށް ޣައްޒާއިން އިސްރާއީލު ސިފައިން އެއްކޮށް ފައިބައިގެން ދިއުމަށެވެ. އަދި ކުރިޔަށް އޮތް ބަރަކާތްތެރި ރަމަޟާން މަހާ ބައްދަލުކުރާއިރު އަމާން ކަމާއި ސުލްހަވެރިކަން ޣައްޒާގައި ގާއިމުވެފައި އޮތުމަށެވެ.
15 މަސް ދުވަހަށް ދިގުލައިގެން ދިޔަ ނަސްލު ނައްތާލުމުގެ ހަނގުރާމައިގައި 47،000 ހާހާއި ގާތްކުރާ އަދަދެއްގެ ފަލަސްތީނު ރައްޔިތުން ވަނީ ޝަހީދުކޮށްލާފައެވެ. ހޮސްޕިޓާތަކާއި ސުކޫލުތަކާއި ކުޑަ ކުދިންގެ ޕާކުތައްވެސް ވަނީ ބިމާ ހަމަކޮށްފައެވެ. އެތައް ހާސް އާއިލާއެއް ދިރިއުޅެމުން ދިޔަ އިމާރާތްތައްވެސް ވަނީ ބޮންއަޅާ ސުންނާފަތިކޮށްލާފައެވެ.
ހަނގުރާމަ ހުއްޓާލުމުގެ ވަގުތީ އެއްބަސްވުމުގެ ދަށުން 3 ފޭސް އަކަށް ބަހާލައިގެން ކަންކަން ކުރުމަށް ދެ ފަރާތުން ވަނީ އެއްބަސްވެފައެވެ. އެގޮތުން ފުރަތަމަ މަރުހަލާގައި ރަފަހާއި މިސްރާއި ގުޅޭ ރަފަހް ބޯޑަރު ސަރަހައްދުގައިވާ ފިލަޑެލްފީ ކޮރިޑޯއިން އިސްރާއީލު އަސްކަރިއްޔާއިން ފައިބަން ޖެހެއެވެ. އަދި އިންސާނީ އެހީގެ ޓްރެކްތަކުގެ ތެރެއިން ފުރަތަމަ ފޭސްގައި ދުވާލަކަށް 6 ޓްރަކް ޣައްޒާއަށް ވަނުމުގެ ފުރުސަތު ދޭން ޖެހެއެވެ. އަދި ފުރަތަމަ ފިޔަވަހި ޕްލޭނާއި އެއްގޮތަށް ގޮސްފިނަމަ ދެވަނަ ފިޔަވަހީގައި އިސްރާއީލުގެ އަސީރުން ހަމާސްއިން ދޫކޮށްލަން ޖެހޭނެއެވެ. އަދި އިސްރާއިލު ސިފައިން ޣައްޒާގެ ހުރިހާ ސަރަހައްދަކުން ފައިބަން ޖެހެއެވެ. އެފްރީލް 12 ގައި ތިންވަނަ ފިޔަވަހި ފެށޭއިރު ހަމާސް އިން ހިފަހައްޓާފައިވާ ހުރިހާ އަސީރުން މިނިވަން ވާން ޖެހެއެވެ. އަދި ފަލަސްތީނުގެ ރައްޔިތުން އަލުން ޣައްޒާ އާރާސްތުކުރުމުގެ ޕްލޭނެއް އެކުލަވާލާނެއެވެ.
