މިރޭ ސޯޝަލް މީޑިއާގައި އާންމުވި ވީޑިއޯއަކުން ފެންނަނީ މާލޭގެ ގެއެއްގެ 5 ވަނަ ފަންގިފިލާއިން ކުޑަކުއްޖަކު ނުވެއްޓި ކިރިޔާ ސަލާމަތްވި މަންޒަރެވެ. މި ވީޑިއޯ ފެނުނު ކޮންމެ މީހަކު ދެރަވެގެން ދަނީ އެވާހަކަ ދައްކަމުންނެވެ.
މި ވީޑިއޯ އިން ފެންނަ ގޮތުގައި ކުއްޖާ އުޅުނީ ކުޑަދޮރުމައްޗަށް އަރައި ބޭރަށް ދެފައި ތިރިކޮށް ކުޑަދޮރުން ބޭރަށް ފައިބާށެވެ. މިއީ ހެންވޭރު ބުރެވިމަގުގައި ސީދާ މަގަށް ވާގޮތަށް ހުރި ގެއެކެވެ.
އަޑުގެ ކޮޅަށް އެކުއްޖާ ކައިރީގައި ގޭތެރެއަށް ވަނުމަށް އެދި މަންޒަރު ދުށް މީހުން ގޮވާއަޑު ވީޑިއޯއިން އިވެއެވެ. އެހެންނަމަވެސް އެކުއްޖާއަށް އެއަޑު އިވުނުހެނެއް ހީނުވެއެވެ. މި ކުއްޖާ ސަލާމަތްކުރީ ކިރިޔާ ވެއްޓި ނުވެއްޓި ކުޑަދޮރުމަތީގައި އޮއްވާ ގޭތެރެއިން މީހަކު އެކުއްޖާ ކުއްލިއަކަށް ދަމައިގަނެގެންނެވެ. އެކުއްޖާ ސަލާމަތްކުރީ ބޭރުން އެގެއަށް ވަން މީހެއް ކަމެއް ނުވަތަ އެގޭގެ މީހަކުކަމެއް އަދި ސާފެއް ނުވެއެވެ. މައުލޫމާތު ލިބިފައިވާ ގޮތުގައި މިއީ ޚާއްސައެހީއަށް ބޭނުންވާ ކުއްޖެކެވެ.
މިހާދިސާ އާއި ގުޅިގެން ފުލުހުން ވަނީ ކުއްޖާ ވެއްޓެން އުޅުނު މަންޒަރު ފެންނަ ވީޑިއޯ ސޯޝަލް މީޑިއާގައި ހިއްސާ ނުކުރުމަށް އެދިފައެވެ. އެއްވެސް ފަރާތަކުން މި ވީޑިއޯ ސޯޝަލް މީޑިއާގައި ހިއްސާކޮށްފައިވާނަމަ އެ ނަގާ، އެހެން މީހުންނަށްވެސް އެކަން ނުކުރުމަށް ބާރުއެޅުމަށް ދިވެހި ފުލުހުންގެ ޚިދުމަތުން ވަނީ އިލްތިމާސް ކޮށްފައެވެ.
" މިފަދަ ވީޑިއޯތައް ދައުރު ކުރުމަކީ އެ ކުއްޖާއާއި ކުއްޖާގެ އާއިލާ، އާންމުންގެ ފާޑުކިޔުމާއި ނަފްސާނީ ގޮތުން އަނިޔާއަށް ހުށަހެޅިގެންދާނެކަމެއް. އާއިލާގެ އިތުރުން، މިކަމުގެ ސަބަބުން މި ވީޑިއޯ ފެންނަ ކޮންމެ މީހަކަށްވެސް ނަފްސާނީގޮތުން އަސަރު ކުރުމަކީ އެކަށީގެންވާ ކަމެއް. މީގެ އިތުރުން، މިފަދަ މަންޒަރުތަކުގެ ސަބަބުން، ކުޑަކުދިން ނުވަތަ ވަލްނެރަބްލް މީހުން، ޓްރިގަރ ވެ، އެމީހުން ނުރައްކަލަކަށް ހުށަހެޅިދާނެކަމަށް އަޅުގަނޑުމެން ދެކެމު. މިފަދަ ފޫޓޭޖްތައް ދައުރު ކުރުމަކީ، ސޯޝަލް މީޑިއާގައި ސަމާލުކަން ހޯދުމަށް މަސައްކަތްކުރާ ސަގާފަތެއް އާލާވެ، ސަލާމަތާއި ރައްކާތެރިކަމާ ގުޅޭ މުހިންމު ކަންކަމަށް ދެވޭ ސަމާލުކަން ކުޑަވެގެން ހިނގައިދާނެ ކަމެއް. މީގެ ބަދަލުގައި ރައްކާތެރިކަމުގެ ފިޔަވަޅުތަކަށް އަހައްމިއްޔަތުކަން ދީ، ކުޑަދޮރުތަކާއި ބެލްކަނިތައް ރައްކާތެރިކުރުމާއި، ކުޑަކުދިންނަށް ނުރައްކާތަކާ ބެހޭގޮތުން ހޭލުންތެރިކުރުމާއި، އަދި މިފަދަ ވީޑިއޯތައް އިތުރަށް ދައުރުކުރުމުގެ ބަދަލުގައި އެ ޕްލެޓްފޯމްތަކުން ނެގުމަށް ރިޕޯޓުކުރުން ފަދަ ކަންކަމަށް އިސްކަންދިނުމަށް މި ޚިދުމަތުން ގޮވާލަން". ފުލުހުން ވިދާޅުވިއެވެ.
މި ހާދިސާ އާއި ގުޅިގެން އެއްވެސް ފަރާތެއްގެ ކަންބޮޑުވުމެއް ނުވަތަ މަޢުލޫމާތެއް ވާނަމަ، ދިވެހި ފުލުހުންގެ ޚިދުމަތުގެ 3322111 އަށް ގުޅުއްވާ ހިއްސާކުރެއްވުމަށް ފުލުހުން ވަނީ އެދިފައެވެ.
ގޭގައި ކުޑަކުދިން ދިރިއުޅޭއިރު އެއީ ކުޑަކުދިންނަށް ރައްކާތެރި މާހައުލެއްތޯ ޔަގީން ކުރުމަކީ ބެލެނިވެރިންގެ ޒިންމާއެކެވެ. ސަބަބަކީ ބެލެނިވެރިޔާ ފާހާނާއަށް ވަންނަ ވަގުތަކު ނުވަތަ ވަރުބަލިވެގެން ނިދިފަ އޮންނަ ވަގުތަކުވެސް ކުޑަކުއްޖަކު މިފަދައިން ކުޑަދޮރުމައްޗަށް އެރުމަކީ ވެދާނެ ކަމެކެވެ. ރައްކާތެރި ގޮތަކީ ދުރަށް ވިސްނައި މިފަދައިން ހުންނަ ދޮރުތައް ތަޅުލެވޭގޮތް ހެދުން ނުވަތަ ދަގަނޑުޖަހައި ނުވެއްޓޭނެ ގޮތަކަށް ބަންދު ކުރުމެވެ. އެހެންނޫނީ ހިތާމަވެރި ހާދިސާއެއް ހިނގުމަކީ ވެދާނެކަމެކެވެ.
މިފަދަ ކޮންމެ ހާދިސާއެއް ނުވަތަ ވީޑިއޯއެއް ދައުރުވާއިރު އެވާހަކަ ދައްކާ މީހުން ގިނައެވެ. އެކަމަކު މާލެސިޓީގައި ރައްކާތެރިކަމުގެ ފިޔަވަޅު ނައަޅާ ހުންނަ އެތައް ގެއެއް އެބަހުއްޓެވެ. މާލެ އަދި ހުޅުމާލެއިންވެސް މިފަދަ ހާދިސާތަކުގައި ކުދިން މަގުމައްޗަށް ވެއްޓި މަރުވެފައިވާއިރު މިއީ ވިސްނަންޖެހޭ ކަމެކެވެ.