ސުވިސް ބަރަކާ ޗެރިޓީގެ ދިވެހިރާއްޖޭގެ ގޮފިކަމުގައިވާ "ބަރަކާ ޗެރިޓީ މޯލްޑިވްސް" ރަސްމީކޮށް އިފްތިތާހު ކުރީ މިދިޔަ ބުރާސްފަތި ދުވަހުގައެވެ. ބީސީއެމް އިފުތިތާހު ކުރުމުގެ ޖަލްސާ އޮތީ މާލެއަތޮޅު ގުޅީ ޒުވާނުންގެ މަރުކަޒުގައެވެ. މި ޖަލްސާގައި ބަރަކާ ޗެރިޓީ މޯލްޑިވްސްގެ ހިންގާ ކޮމިޓީ ވަނީ އިއުލާން ކޮށްފައެވެ. ހިންގާ ކޮމިޓީއަށް އިންތިޚާބުވި ފަރާތްތަކަށް މަޤާމުގެ ލިޔުން ހަވާލުކޮށްދެއްވީ ޖަލްސާގެ ޝަރަފުވެރި މެހެމާނާ ރައްޔިތުންގެ މަޖިލީހުގެ ހުރާ ދާއިރާގެ މެމްބަރު ޑރ. އަނާރާ ނައީމެވެ. ބަރަކާ ޗެރިޓީ މޯލްޑިވްސްގެ ފުރަތަމަ ދައުރުގެ ރައީސަކަށް އިންތިޚާބުވެފައިވަނީ އުސްތާޛު އަޙްމަދު ޒަކީއެވެ. އަދި ނައިބު ރައީސް ކަމަށް އުސްތާޛު އިބްރާހިމް ޙާފިޒު، ޖެނެރަލް ސެކްރެޓަރީ ކަމަށް އާމިނަތު ނިއުމާ، އިންޓަނޭޝަނަލް ސެކްރެޓަރީ ކަމަށް މުޙައްމަދު އަޙްމަދު އަޖާމީ، ރީޖަނަލް އެފެއާޒް ސެކްރެޓަރީ ކަމަށް މުޙައްމަދު އަމީން އަދި ޚަޒާންދާރު ކަމަށް އިންތިޚާބުވެފައިވަނީ މަރިޔަމް ޒައިފާ ޒަކީ އެވެ. މި ރަސްމިއްޔާތުގައި ސުވިސް ބަރަކާ ޗެރިޓީގެ ސީއީއޯ އާއި އިސްވެރިން ބައިވެރިވެވަޑައިގެންފައި ވެއެވެ. އަދި ސުވިސް ބަރަކާ ޗެރިޓީގެ ފަރާތުން ދެއްވި ރޯދަ ހަދިޔާ ބެހުން ވެސް ކުރިއަށް ގެންދެވިފައިވާ ކަމަށް ބަރަކާ ޗެރިޓީންއިން ވަނީ މައުލޫމާތު ދީފައެވެ. މީގެ އިތުރުން ސުވިސް ބަރަކާ ޗެރިޓީގެ ޒަކާތު ފަންޑު ފައިސާ ގުޅީގެ 50 ފަރާތަކަށް ފޯރުކޮށްދެވިފައި ވެއެވެ. މި ޖަލްސާގައި ގުޅީގެ ގިނަ އަދަދެއްގެ ޢާންމު ރައްޔިތުންގެ އިތުރުން މުއައްސަސާތަކުގެ ވެރިންނާއި މުވައްޒަފުން ބައިވެރިވެފައިވެއެވެ.