މާލީ ދާއިރާއިން މީހުން ތަމްރީން ކުރުމަކީ ރާއްޖެއަށް ވަރަށް މުހިއްމުކަމެކެވެ. މއ. ވިލާރޮދި އިސްމާޢީލް ސާޖިދަކީ ޕަބްލިކް ފައިނޭންސް އާއި ގަވަރނަންސް އެޑިއުކޭޝަންގެ ދާއިރާއިން މީހުން ބިނާކުރުމުގައި ނަމޫނާ އެދުރެކެވެ.
ލޯކަލް ގަވަރނަންސް އަދި ޕަބްލިކް ފައިނޭންސް ދާއިރާއިން މީހުން ބިނާކުރުމުގައި އެކި އިދާރާތަކުގައި ދިގުމުއްދަތެއް ހޭދަކުރައްވާފައިވާ އިސްމާޢީލް ސާޖިދު ވަނީ ސިވިލް ސާރވިސް ޓްރެއިނިންގ އިންސްޓިޓިއުޓާއި، އިސްލާމިކް ޔުނިވާސިޓީ އަދި ސެންޓަރ ފޮރ އޯޕަން ލާރނިންގ ގައި މާލިއްޔަތުގެ ގަވާއިދާއި އަދި ގަވަރނަންސް އާއި ގުޅޭ ބައެއް މާއްދާތައް ކިޔަވައިދިނުމުގެ އިތުރުން އަމިއްލައަށް އިސްނަންގަވައިގެން ބައެއް ކޯސްތަކެއް ފަރުމާ ކުރައްވާފައެވެ. މިގޮތުން ސައުތް އޭޝިއަން އިންސްޓިޓިއުޓް ފޯރ އިސްލާމިކް ފައިނޭންސްގެ ވައިސް ރެކްޓަރގެ މަޤާމްގައި ހުންނަވައިގެން 2020ވަނަ އަހަރު ވަނީ ޕަބްލިކް ފައިނޭންޝަލް މެނޭޖްމަންޓުގެ ޕްރޮގްރާމެއް ފަރުމާ ކުރައްވައި، ދިވެހިންނަށް ފޯރުކޮށްދެއްވާފައެވެ. އަދި ފައިނޭންޝަލް ޖާރނަލިޒަމްގެ ކޯހެއް ފަރުމާކުރެއްވުމުގެ މަސައްކަތް މިހާރުވެސް ކުރައްވަމުން ގެންދަވާކަމަށް ސާޖިދު ވިދާޅުވިއެވެ.
މިވަގުތު ޓެކްސް އެޕީލް ޓްރައިބިއުނަލްގެ މެންބަރެއްގެ ގޮތުގައި މަސައްކަތްކުރައްވާ ސާޖިދު ވިދާޅުވީ ޕަބްލިކް ފައިނޭންސްގެ ދާއިރާއިން މީހުން ބިނާކުރުމުގެ މަސައްކަތަށް ޝައުގުވެރިވީ އޮޑިޓަރ ޖެނެރަލްގެ އޮފީހުގައި މަސައްކަތްކުރެއްވިއިރު އެކި އިދާރާތަކުން ފެނިފައިވާ މައްސަލަތަކަށް ބަލާއިރު، ގިނަފަހަރަށް އެ އިދާރާތަކުގައި ގޯސްކޮށް ކަންތައްތައް ކުރެވިފައި ހުންނަނީ އެއްވެސް ހާލެއްގައި ގަސްތުގައި އެގޮތަށް އެކަން ކުރަން ބޭނުން ނުވިނަމަވެސް ނޭނގުމެއްގެ ތެރެއިން ކަމަށް ފާހަގަ ކުރެވިފައިވާތީ ކަމަށެވެ.
ރާއްޖެއަށް އާ ދާއިރާއެއްކަމުގައިވާ ފައިނޭންޝިއަލް ޖާނަލިޒަމްގެ އެޑްވާންސް ޑިޕްލޮމާ ލެވެލްގެ ކޯހެއް ފަރުމާކުރައްވަމުން އަންނަ ސާޖިދު ވިދާޅުވީ "ރާއްޖޭގައި ރިޕޯޓަރުން ރިޕޯޓް ކުރަމުންދާއިރު، ދައުލަތުގެ މާލީ ކަންކަން ރަނގަޅަށް ނޭނގި ރިޕޯޓް ކުރުމުން އަސްލު އެކަން ވެފައި އޮންނަ ގޮތަށްވުރެ ބޮޑަށް ކުދިކިއުން ކަހަލަ ގޮތަކަށް ޚަބަރު ލިޔެފައި ހުންނަކަން ފާހަގަ ކުރެވޭ ކަމަށެވެ.
"އަޅުގަނޑު ގަބޫލުކުރާގޮތުގައި މާލީ ކަންކަން ރިޕޯޓްކުރާއިރު، މީހުން ނުވަތަ ވަކިބައެއް ގޯސްކުރަން ވާހަކަ ދެއްކުމުގެ ބަދަލުގައި ބިނާކުރުވަނިވި ގޮތެއްގައި ޤާނޫނުތަކާއި ޤަވާއިދުތައް އަދި ފައިނޭންސްގެ ހަމަތަކުގެ މައްޗަށް ރިޢާޔަތް ކުރެވިގެން ޚަބަރުތައް ލިޔަން ދަސްކޮށްދޭން އެބަޖެހޭ. ކިހިނެއްތޯ އެކަންކަން ކުރެވޭނީ ނޫނީ ކޮން ދިމާއަކުންތޯ ގޯސްކޮށް ކަންކަން ކުރެވިފައި ހުރީ. ފައިނޭންޝަލް ޖާރނަލިޒަމް ކޯސް ޑޮކިއުމަންޓް ވަރަށް އަވަސް މުއްދަތެއްގައި މޯލްޑިވްސް ކޮލިފިކޭޝަން އޮތޯރިޓީއަށް ހުށަހެޅުމަށް ގަސްދުކުރަން" ސާޖިދު ވިދާޅުވިއެވެ.
ކިޔަވައިދިނުމުގައި ބަލަންޖެހެނީ ލިބޭ އާމްދަނީއަށްވުރެ ބޮޑަށް ކިޔަވައިދޭ އެއްޗެއް ދަރިވަރުންނަށް ރަނގަޅަށް ފަހުމުކޮށްދިނުން ކަމަށް ސާޖިދު ވިދާޅުވިއެވެ. ހިލޭ ސާބަހަށް އަމިއްލަ ގޮތުން ބައެއް ޓްރޭނިންތައް ފަރުމާކޮށް އޮންލައިންކޮށް ކުރިއަށް ގެންދިއުމަށްޓަކައި ބައެއް އިންސްޓިޓިއުޓްތަކާއި މަޝްވަރާ ކުރަމުންދާކަމަށާއި، ފައިނޭންސް ދާއިރާގެ ދަރިވަރުން ބޭނުންވާނަމަ، ގައިޑް ކޮށްދިނުމަށް ތައްޔާރަށް ހުންނެވި ކަމަށް ސާޖިދު ވިދާޅުވިއެވެ.
ޕަބްލިކް ފައިނޭންސިންގ މެނޭޖްމެންޓާއި ފައިނޭންޝިއަލް ޖާނަލިޒަމް އަކީ މުހިންމު ދާއިރާތަކެއްކަން ފާހަގަ ކުރައްވާ ސާޖިދު ވިދާޅުވީ މި ދާއިރާއިން މީހުން ބިނާކުރުމަކީ މުހިންމުކަމެއް ކައުމުގައި ދެކިގެން މިކަން ކުރަމުން އަންނަނީ އަމިއްލައަށް އިސްނަގައިގެން ކަމަށެވެ.
ސާޖިދުގެ ބައެއް ދަރިވަރުންނާ ވާހަކަ ދައްކާލުމުން ދެ ދަރިވަރަކު ފާހަގަކުރީ ސާޖިދަކީ ވަރަށް ރަނގަޅަށް ކުލާސްތައް ނަންގަވައިދެއްވާ ދަރިވަރުންނަށް އެހީތެރިވެލައްވާ ލެކްޗަރާއެއް ކަމަށެވެ. މިގޮތުން އިސްލާމިކް ޔުނިވާސިޓީގައި ބެޗްލަރސް އިން އިމާމްޝިޕް އެންޑް ލޯކަލްގަވަރނަނސް ކޯހުގެ ދަރިވަރެއް ކަމުގައިވާ އަބުދުﷲ އަލީ ބުނީ "ސާޖިދުއަކީ އައުޓް ސްޓޭންޑިން އޭ ބުނެވޭނީ. ހުރިހާ ގޮތަކުންވެސް ވަރަށް ރަނގަޅު. ފޫހިކަމެއް ނެތި ކުލާސް ކުރިޔަށް ގެންދަވާނެ. ވަރަށް ކިޔަވާދޭ ހިތުން ކިޔަވައިދޭނެ. ވަގުތަށް ކަމޭ ހިތާނެ، ވަރަށް ބޮޑަށް ދިރާސާތަކުގެ އަލީގައި ކިޔަވައިދެއްވާ ލެކްޗަރާއެކޭ ބުނާނީ."
މީގެ އިތުރުން ސިވިލް ސާވިސް ޓްރެއިނިންގ އިންސްޓްޓިއުޓްގައި ސެޓިފިކެޓް 3 އިން އެކައުންޓިންގ އެންޑް ފައިނޭންސްގެ މާއްދާތައް ކިޔެވި ސާޖިދުގެ ދަރިވަރެއް ކަމުގައިވާ އަހުމަދު ހުމެއިދު ފާހަގަކުރިގޮތުގައި "ސާޖިދު އަކީ އަމިއްލައަށް ލެކްޗާރތައް ތައްޔާރުކޮށްގެން ކިޔަވައިދޭ ލެކްޗަރަރ އެއްކަން ފާހަގަ ކުރެވުނު. ވަރަށް ފަސޭހައިން ސިކުނޑިއަށް ނަގައިގަނެވޭނެ ގޮތަށް ކިޔަވައިދެއްވީ. ލެޗްޗަރތައް ދާ ގޮތްވެސް ވަރަށް ޝައުގުވެރި އެންމެ ކުރުކޮށް ބުނާނަމަ، ސާޖިދު ސަރ އަކީ ވަރަށް ފަސޭހަ ލެކްޗަރާއެއް." ކަމަށެވެ.
ޝްރީލަންކާގެ މެޓްރޮޕޮލިޓަން ކޮލެޖުން ޑިޕްލޮމާ އިން ސައިކޮލޮޖީ އަދި ކޮވެންޓްރީ ޔުނިވާސިޓީ އިން ބިޒިނަސް އަދި ފައިނޭންސް ދާއިރާއިން ޑިގްރީ ފުރިހަމަކުރައްވާފައިވާ ސާޖިދުވަނީ އަމިއްލަ ކޮލެޖުތަކުގައިވެސް ކިޔަވައިދެއްވާފަ އެވެ. މިގޮތުން ކުލިކް ކޮލެޖުގައި ކިޔަވައިދެއްވިއިރު ސާޖިދުގެ ކިޔަވައިދިނުމުގެ ފެންވަރު ފާހަގަކޮށް 'އެވާޑް އޮފް އެކްސެލެންސް އިން ޓީޗިންގ' ސެޓިފިކެޓް ލިބިވަޑައިގެންނެވި އެވެ.
