ދާގަބާ ނަމަކަށް ކިޔާ މިތަން ހުންނަނީ އއ.ތޮއްޑޫގައެވެ. ކުރީޒަމާނުގައި މިތަނަށް ކިޔައި އުޅުނީ ބޮޑު ގާފުންޏެވެ. ސަޤާފީ ތަރިކަ ރައްކާތެރިކުރާ ޤައުމީ މަރުކަޒުން މަޢުލޫމާތު ދީފައިވާގޮތުގައި ދާގަބާ ދިރާސާކުރުމަށް 1958ވަނަ އަހަރު ތާރީޚު ކޮމިޓީން ޓީމެއް ފޮނުވުނެވެ. އެއިރު މިތަން ކޮނުމުގެ ކުރިން ފެންނަންހުރީ ރާއްޖޭގެ އެހެނިހެން ހިސާބުތަކުގައި ހުންނަ އުސްގަނޑުތައް ހުންނަގޮތަށެވެ.
އެއިރު ދާގަބާ މަތީގައި އެކިވަރުގެ 6 ރުކާއި މެދުމިނުގެ 6 ކަނދުގަސް ހުރިއިރު، އުސްމިން ލަފާކުރެވެނީ 15 ފޫޓު ހުންނަ ކަމަށެވެ. ދިރާސާ ކުރި ޓީމުން ނެގި ދާގަބާގެ ފޮޓޯތަކެއް ޔުނިވަރސިޓީ އޮފް ސިލޯން، ޕޭރަދެނިޔާގެ ޑޮކްޓަރ އެސް.ޕަރަނަވިތަރަނައަށް ފޮނުވައިފައިވެއެވެ. އެފޮޓޯތައް ބެއްލެވުމަށްފަހު އޭނާ ވިދާޅުވެފައިވަނީ މިތަނަކީ ވީރާނާވެފައިވާ އިސްތޫޕާއެއް ކަމުގައި ސަޤާފީ ތަރިކަ ރައްކާތެރިކުރާ ޤައުމީ މަރުކަޒުން މަޢުލޫމާތު ދީފައިވެއެވެ.
އާދަޔާ ޚިލާފު ގިނަ ސިފަތަކެއް ހުރުމުން މިއީ މުހިންމު ތަނެކެވެ. އަދި މިތަންހުރީ ވައްކޮށް ހަރުފަތްތަކެއް ލާފައިވާ ޕްލެޓްފޯމެއްގެ މަތީގައި ކަމަށާއި، މަތީކައިރި ޒީނަތްތެރިކޮށްފައިވަނީ ފަތިން ހަދައިފައިވާ ފުޅަފެއްގެ ޑިޒައިން އަށް ކަމަށް ވަނީ މަޢުލޫމާތު ލިބިފައެވެ.
