ކުޑަ ދަރިފުޅު ބަލިވެއުޅޭއިރު ކާންދިނުމަށް އުދަގޫވުން މިއީ އަޅުގަނޑުމެންގެ ތެރެއިން ވަރަށްގިނަ މަންމައިންނަށް ދިމާވާކަމެކެވެ. އަދި ވެކްސިން ދިނުމުގެ ސަބަބުން ދަރިފުޅުގެ ކެއުމަށް ބައެއްފަހަރު ބޮޑެތި ބަދަލުތަކެއް އާދެއެވެ.
ބަލިވެ އުޅޭއިރު ގިނަގިނައިން ދަރިފުޅަށް ދިޔާތަކެތި ދެމުން ގެންދާށެވެ. ދަރިފުޅަކީ ގާތުން ކިރުދޭ ކުއްޖެއްނަމަ ކިރުދޭ ވަގުތު އިތުރުކުރެވިދާނެ އެވެ. އަދި ޖޫސް ދޭނަމަ ތާޒާ މޭވާގެ ޖޫސް ދިނުމަށް އިސްކަންދޭށެވެ. ޕެކެޓް ޖޫސް ދޭނަމަ ހަކުރު އެކުލެވިފައިވާ މިންވަރު ބަލަންވާނެއެވެ. އަދި ހަކުރު ނާޅާ ހުންނަ ޖޫސް ޚިޔާރުކުރެވިދާނެއެވެ.
ކާންދޭއިރު މަދު އެތިއެތިކޮޅުން ގިނަފަހަރުމަތިން ކާންދެވިދާނެއެވެ. މިގޮތުން އާންމުގޮތެއްގައި ތިންފަހަރު ކާންދޭނަމަ ބަލިވުމުން 4 ނޫނީ 5ފަހަރު މަދުއެތިކޮޅެއް ކުޑަދަރިފުޅަށް ކާންދެވިދާނެއެވެ. ކާންދިނުމުގައި ދަރިފުޅު ގަޔާވާކަހަލަ ހަށިގަނޑަށް ފައިދާހުރި ގިނަ ބާވަތްތަކެއް އެކުލެވޭ ކާނާ ދިނުމަށް އިސްކަންދޭށެވެ. މިގޮތުން ފަސޭހައިން ލިބެންހުންނަ ތަރުކާރީ އާއި މޭވާގެ އެކި ވައްތަރު ބޭނުންކޮށްގެން ފައިދާ ހުރި ކެއުމެއް ތައްޔާރު ކުރެވިދާނެއެވެ.
ގަދަކަމުން ކާންދިނުމަށް މަސައްކަތް ނުކުރާށެވެ. އޭގެ ބަދަލުގައި ދަރިފުޅު ކެއުމަށް ޝައުގުވެރިވާނެ ގޮތަކަށް ކާންދެވޭތޯ މަސައްކަތްކުރާށެވެ. ބަލިވުމުން ދަރިފުޅަށް ހަރުކާއެއްޗެހި ކާން އުދަގޫނަމަ މަޑުކާނާގެ ބާވަތްތައް ދެވިދާނެއެވެ.
ކުޑަ ދަރިފުޅު ބަލިވެއުޅޭއިރު ކާންދިނުމުގައި ޚާއްސަ ސަމާލުކަމެއް ދޭގޮތަށް ބަލި ރަނގަޅުވުމުންވެސް ސަމާލުކަން ދޭންޖެހެއެވެ. އެއީ ގިނަ ފަހަރަށް ބަލިވުމުން ދަރިފުޅުގެ ބަރުދަން ލުއިވާތީއެވެ. ކުރީގައި ހުރި ބަރުދަނަށް އަނބުރާ ދެވެންދެން، ބަލިވުމުގެކުރިން ކާންދިން ވަރަށްވުރެ އެއްފަހަރު އިތުރަށް ކާންދޭށެވެ. އެވަރުންވެސް ދަރިފުޅު ބަޑުހައިވާނަމަ ފައިދާހުރި އިތުރު ކާނާއެއް ދަރިފުޅަށް ދެވިދާނެއެވެ.
ކިޔުންތެރިންގެ ހިޔާލު
ބަލިވުމުން ކާންދޭނެ އެއްޗެހި ހިމަނާލި ނަމަ
ކޮމެންޓްސް ބަންދުކުރެވިފައި