ގދ.ގައްދޫއަށް އުފަން އުމުރުން 23 އަހަރުގެ ކަރަމް ޢަބްދުލްކަރީމް އަކީ ޑިގްރީއަށް ކިޔަވަމުންދިޔަ ދަރިވަރެކެވެ. އުމުރުން އެއްމަހުގެ ލޯބި ލޯބި ކުއްޖެއްގެ ބައްޕައެކެވެ. 6 ބެއިން ހިމެނޭ ޢާއިލާގެ އެންމެ ހަގު ދަރިފުޅެވެ. ދިރިއުޅުމަށް ދިޔައީ ފޮނި އުންމީދުތަކެއް ކުރަމުންނެވެ. އެހެންނަމަވެސް ހަޔާތަށް ކަޅު ބޯވިލާގަޑެއްގެ އަސަރުކުރީ ނޭގިހުއްޓައެވެ. މިއަދު ކަރަމް އަކީ ޅައުމުރުގައި 2 ކިޑްނީ ފެއިލްވެފައިވާ ޒުވާނެކެވެ.
'ޒީޓައިމްސް' އަށް މަޢުލޫމާތުދެމުން ކަރަމް ބުނީ ބޮލުގައި ރިއްސާތީ ރަނގަޅުނުވެގެން އެޑްމިޓްކުރީ ގއ.ދާންދޫ ސިއްޙީ މަރުކަޒުގަ ކަމަށެވެ. "އެއީ 2020ވަނަ އަހަރު ސެޕްޓެމްބަރުގަ. ފްލައިޓެއް ޗާޓަރުކޮށްގެން އެމަޖެންސީގަ މާލެ ގެނެސް އައިޖީއެމްއެޗްގަ އެޑްމިޓްކޮށްގެން ހެދި ޓެސްޓްތަކުން އެނގުނީ 2 ކިޑްނީ ފެއިލްވިކަން. މިވަގުތުހުރީ ސްޓޭޖް 5ގަ. އެއިރު ވަރަށްގިނައިން ހޮޑުލެވުނު. ބީޕީވެސް ވަރަށް މަތިވެފަހުރީ. އެއަށްފަހު އޭޑީކޭ ހޮސްޕިޓަލުގަ ވަނީ 2 ހަފްތާއެއްހާ ދުވަހު އެޑްމިޓްކޮށްގެން ފަރުވާދީފަ. އަދި އޮޕަރޭޝަންކޮށް ފިސްޓިއުލާ ވަނީ ލައްވާފަ" ކަރަމް ކިޔައިދިނެވެ.
އައިޖީއެމްއެޗް، އޭޑީކޭ އަދި ޓްރީޓޮޕް އިން ވެސް ކަރަމް އަށް ލިބުނީ އެއްޖަވާބެކެވެ. ކުރިން ބަލީގެ އެއްވެސް ޢަލާމާތެއް ނުފެނި ކުއްލިއަކަށް 2 ކިޑްނީ ފެއިލްވިކަން ޔަގީންވުމުން ޢާއިލާއަށް ވަނީ ވަރަށްބޮޑު ހިތާމައަކާއި ކުރިމަތިލާންޖެހިފައެވެ.
" އޭޑީކޭ ހޮސްޕިޓަލުން ޑައެލިސިސް ހެދުމަށްފަހު ހަފްތާއަކު 3ދުވަހު މިހާރު ޑައެލިސިސް ހަދަނީ ހުޅުމާލޭ ހޮސްޕިޓަލުން. ކިޑްނީ ޓްރާންސްޕްލާންޓް ހަދަން ޑޯނާ ޓެސްޓްކުރުމުގެ މަސައްކަތް މިހާރު ކުރަނީ. އައިޖީއެމްއެޗް އެޕޮއިންޓްމެންޓް ކެންސަލްވެގެން ލަސްވަމުންދަނީ. އެއްބަޑުއެއްބަފާ ބޭބެގެ ކިޑްނީ ދިމާވާކަން އެނގޭނީ ޓެސްޓްހެދުމުން" ކަރަމް ބުންޏެވެ.
ކަރަމް ވަޒީފާ އަދާކުރަނީ އަންހެނުން ފާތިނާ ޢަލީގެ ރަށް ކަމުގައިވާ ގއ. ދާންދޫ ކޯޓުގެ އެޑްމިން އޮފިސަރެއްގެ މަޤާމުގައެވެ. އުފާވެރި ދިރިއުޅުމެއް ވޭތުކުރަމުންދިޔަ ދެމަފިރިންގެ ކައިވެންޏަށް މިހާރުވަނީ 3 އަހަރުވެފައެވެ.
" ކޯޓުގަ ވަޒީފާ އަދާކުރާތާ އަހަރެއްހާ ދުވަސް މިވީ. މިވަގުތު ޗުއްޓީގަ މިހިރީ. އަންނަމަހު ހުރިހާ ޗުއްޓީއެއް ހަމަވާނެ. އެއަށްފަހު ނޯޕޭ ލީވް ނޫނީ ވަޒީފާއިން ވަކިވުން ނޫންގޮތެއް ނެތް. އަދި ހުޅުމާލޭގައި މިއުޅެނީ ކުއްޔަށް ތަނެއް ހިފައިގެން. ކިޑްނީ ބަދަލުކުރުމުގެ އޮޕަރޭޝަންގަ އިންޑިއާގައި ހޭދަވާނެ މުއްދަތެއް ނޭނގޭތީއާއި ބޭސްފަރުވާގެ އިތުރަށް ބޮޑު ޚަރަދެއް ހިގާނެތީ އާންމުންގެ އެހީތެރިކަމަށް އެދެން މިޖެހުނީ" ކަރަމް ވަރަށް ދެރަވެފަ ޙާލަތުކިޔައިދިނެވެ.
ކަރަމްގެ އަންހެނުން ފާތިނާ އަކީ ދާންދޫ ސްކޫލުގައި ކިޔަވައިދޭ މުދައްރިސެކެވެ. މިއަހަރު ޖެނުއަރީމަހުގެ 28ވަނަ ދުވަހު ވިހެއުމަށްފަހު ޗުއްޓީގައި ހުރި ފާތިނާ މިވަގުތު ދިރިއުޅެމުންދަނީ ކަރަމް އާއި އެކު ހުޅުމާލޭގައެވެ. ޢާއިލާއިން ބޭނުންވަނީ ވީ އެންމެ އަވަހަކަށް ކަރަމް ގޮވައިގެން ކިޑްނީ ބަދަލުކުރުމުގެ އޮޕަރޭޝަން ކުރުމަށް އިންޑިއާއަށް ދިއުމަށެވެ. ފައިނޭންސް ދާއިރާއިން ކުރިއަށްދާން ބޭނުންވާ ކަރަމްގެ ހުވަފެން ހަޤީޤަތަކަށް ހެދުމަށްޓަކައި ދުޅަހެޔޮ ސިއްޙަތަކަށް އިތުރު ފަރުވާހޯދުމަށް މިވަގުތު ވަނީ ޢާންމުންގެ ދީލަތި އެހީތެރިކަމެއް ވަރަށްބޮޑަށް ބޭނުންވެފައެވެ.
ނޯޓް: މި ޢާއިލާ އަށް އެކަށީގެންވާ މިންވަރަށް އެހީ ލިބިފައިވާތީ، މިރިޕޯޓުގައި ކުރިން ހިމަނަައިފައިވާ ފޯން ނަންބަރާއި އެކައުންޓް ނަންބަރު ވާނީ އުނިކޮށްފައެވެ.
ޖުމްލަ 2 ކިޔުންތެރިންގެ ހިޔާލު
Not gadhoo. He was referred from dhandhoo health center by a charter flight immediately.
Is there anyway that to donate some money from overseas please
ކޮމެންޓްސް ބަންދުކުރެވިފައި