ޑރ.މުޙައްމަދު މުޢިއްޒު ވަނީ 6 އަހަރާއި 9 މަސް ދުވަހު ވަޒީރުކަން އަދާކުރައްވާފައެވެ. 1995ވަނަ އަހަރު 9 މާއްދާއިން ޑިސްޓިންކްޝަން އާއި އެކު އޯލެވެލްއިން ދިވެހިރާއްޖެ އިން އެއްވަނަ ވަނީ ހޯއްދަވާފައެވެ. އަދި ސިވިލް އިންޖިނިއަރިންގ ދާއިރާއިން ޔޫކޭގެ ޔުނިވަރސިޓީ އޮފް ލީޑްސް އިން ވަނީ ޕީއެޗްޑީ ހާޞިލްކުރައްވާފައެވެ. 

ޑރ.މުޢިއްޒު

އޭލެވެލް ނިންމެވުމަށްފަހު އެންމެ ފުރަތަމަ ވަޒީފާ އަދާކުރައްވަން ފެއްޓެވީ މިނިސްޓްރީ އޮފް ކޮންސްޓްރަކްޝަން އެންޑް ޕަބްލިކް ވޯކްސްގައި ޕްލޭނިންގ ޓެކްނީޝަން ޓްރެއިނީގެ މަޤާމުގައެވެ. ވަޒީފާގައި އުޅުއްވަނިކޮށް ލިބިވަޑައިގެންނެވި ސްކޮލަރޝިޕެއްގައި ޔޫކޭ އަށް ވަޑައިގެން ޔުނިވަރސިޓީ އޮފް ލަންޑަން އިން ސްޓްރަކްޗަރަލް އިންޖިނިއަރިންގ ދާއިރާއިން ފަސްޓްކްލާސް އޮނާރސް ޑިގްރީ ފުރިހަމަކުރެއްވިއެވެ. އެއަށްފަހު އަމިއްލަ ޚަރަދުގައި ސިވިލް އިންޖިނިއަރިންގ ދާއިރާއިން މާސްޓަރސް ޑިގްރީ ފުރިހަމަ ކުރެެއްވީވެސް ޔުނިވަރސިޓީ އޮފް ލަންޑަން އިން އެވެ. 

Advertisement

މާސްޓަރސް ޑިގްރީ އަށްފަހު ރާއްޖެވަޑައިގެން ވަޒީފާ އަދާކުރެއްވީ ހައުސިންގ އެންޑް އަރބަން ޑިވެލޮޕްމަންޓް ބޯޑުގައެވެ. ޕީއެޗްޑީ ފުރިހަމަކުރެއްވުމަށްފަހު މަސައްކަތްކުރެއްވީ ޕްރައިވެޓް ސެކްޓަރ ގައެވެ.

ވަޒީރުކަން ކިހިނެއް ލިބިވަޑައިގެންނެވި ފުރުސަތެއް؟

ދިވެހިރާއްޖޭގައި އެންމެ ފުރަތަމަ ސިޔާސީ ޕާޓީތައް އުފެދިގެން އައިއިރު ޑރ.މުޢިއްޒު އަކީ އަދާލަތު ޕާޓީގެ މެންބަރެކެވެ. އެހެންނަމަވެސް ހަރަކާތްތެރިކޮށް އުޅުއްވަން ފެއްޓެވީ ޕީއެޗްޑީ ނިންމެވުމަށްފަހު އެވެ. އަދާލަތު ޕާޓީގެ ރަޖިސްޓްރަރ މަޤާމްގެ އިތުރުން ސެކްރެޓަރީ ޖެނެރަލްގެ މަޤާމްވެސް އަދާކުރެއްވިއެވެ.

އަދާލަތު ޕާޓީގައި އިސްކޮށް މަސައްކަތް ކުރައްވަމުން ގެންދަވަނިކޮށް 2012ވަނަ އަހަރު ފެބުރުއަރީ މަހު މިނިސްޓަރ އޮފް ހައުސިންގެ އެންޑް އެންވަޔަރމެންޓްގެ މަޤާމު ލިބިވަޑައިގެންނެވި އެވެ. "އަދާލަތު ޕާޓީގެ ރައީސް ޝެއިޚް އިމްރާން ޢަބްދުﷲ އާއި ރައީސް ޑރ.މުޙައްމަދު ވަހީދު ޙަސަން މަނިކު އަޅުގަނޑާއި ބައްދަލުކުރައްވާފަ ވަޒީރުކަން ދެއްވުމަށް ނިންމެވީ. އެއީ ކިޔަވައިގެންހުރި ދާއިރާއަށްވުމުގެ އިތުރަށް އެފުރުސަތު ލިބުމުގަ ޝެއިޚް އިމްރާން އިސްދައުރެއް އަދާކުރެއްވި".

ހައުސިންގ މިނިސްޓްރީގެ ނަން ފަހުން ބަދަލުވެގެންދިޔައީ މިނިސްޓްރީ އޮފް ހައުސިންގ އެންޑް އިންފްރާސްޓްރަކްޗަރ އަށެވެ. ރައީސް ވަހީދުގެ ދައުރުނިމި ރައީސް ޢަބްދުﷲ ޔާމީން ޢަބްދުލްޤައްޔޫމްގެ 5 އަހަރުގެ ދައުރު ނިމެންދެން ހައުސިން މިނިސްޓްރީގެ ވަޒީރެއްގެ ގޮތުގައި ހުންނެވީ ޑރ.މުޢިއްޒެވެ.

އަދާލަތު ޕާޓީއަށްފަހު ޑރ.މުޢިއްޒު ގުޅިވަޑައިގެންނެވީ އެމްޑީއޭއާއި އެވެ. "ރައީސް ޔާމީން ހޮއްވެވުމަށް ޕްރައިމަރީއިން ފެށިގެން މަސައްކަތްކުރިން. އެމްޑީއޭގެ ލީޑަރު ޝިޔާމްގެ ވަރަށް ބޮޑު ސަޕޯޓެއް ލިބިގެން ދެވަނަފަހަރަށް މިނިސްޓަރުކަން ލިބުނީ"

މާލޭގައި ކުރެވުނު މުހިންމު މަސައްކައްތައް

ސިނަމާލެ ބްރިޖް

ހުޅުމާލޭ ދެވަނަ ފިޔަވަހި ހިއްކާ ތަރައްޤީ ކުރުން

ހިޔާ މަޝްރޫޢު

ކިންގ ސަލްމާން މިސްކިތް

ރަސްފަންނު

ރަސްރަނި ބަގީޗާ، އިސްކަންދަރު މައިޒާން، ރާވެރިބޭ މައިޒާން

މާލޭ އިންޑަސްޓްރިއަލް ވިލެޖް

ޑރ.މުޢިއްޒު ހައުސިން މިނިސްޓަރުގެ މަޤާމުގައި ހުންނެވިއިރު ގިނަ މަޝްރޫޢުތަކެއްގެ މަސައްކަތް ވަނީ ނިމިފައެވެ. އަދި ބައެއް މަޝްރޫއުތައް ފަށައިގެން ކުރިއަށް ދިޔައިރު، އެންމެ ފާހަގަކުރެވޭ ގެދޮރުވެރި ކުރުމުގެ މަޝްރޫޢާއި ގުޅޭގޮތުން ވިދާޅުވީ، ފުލެޓުތަކުގެ ޢަމަލީ މަސައްކަތް ރައީސް ޔާމީންގެ ދައުރުގަ ކުރެވިފަހުރި ވަރާއި ގާތަށް އެއްވެސް ވެރިކަމެއްގަ ކުރެވިފަ ނެތް ކަމަށެވެ. " ފޭސް 1 ގަ ހުންނާނެ ހަދާންވާ ގޮތުގަ 3000 އަށްވުރެ ގިނަ ފުލެޓު. ފޭސް 2 ހިއްކާފަ އެތާގަވަނީ 11000 އަށްވުރެ ގިނަ ފުލެޓު އެޅުމުގެ މަސައްކަތްކޮށްފަ. އަދި ރާއްޖޭގެ އެކި ރަށްރަށުގައިވެސް އެބަހުރި ފުލެޓު މަސައްކަތްކޮށްފަ. ސުނާމީ އިން ގެދޮރު ގެއްލުނު މީހުންނަށް 10 އަހަރުވީއިރު ގެދޮރު ނުދެވި ހުރި މައްސަލައަށް ޙައްލު ހޯދަދެވުނު".

ގެދޮރު ފޯރުކޮށްދިނުމަށް ކުރެވުނު މަސައްކަތުން ގިނަ ޢަދަދެއްގެ މީހުންނަށް ފުލެޓު ލިބޭނެކަމުގެ ލިޔުން ކުރީ ސަރުކާރުން ވަނީ ދީފައެވެ. އެހެންނަމަވެސް އާ ސަރުކާރު އައިސް އުސޫލު ބަދަލުކޮށް، ކުރިން ފުލެޓު ލިބުނު ބައެއް މީހުން ލިސްޓުން އުނިކުރުމުގެ އިތުރަށް މިއަދާއި ހަމައަށްވެސް ފުލެޓުތައް ހަވާލުނުކުރުމުގެ ކަންބޮޑުވުން ޑރ.މުޢިއްޒު ވަނީ ފާޅުކުރައްވާފައެވެ. 

" ކޮންމެ ޢާއިލާ އަކީ 5 ނުވަތަ 6 މީހުން. އެހެންވެ އެތައްހާސް މީހުންނޭ މިކިޔަނީ. ހައުސިންގ މައްސަލަ ހައްލުނުވޭ. ހައްލުވާނީ ވަރަށްގިނަ މަސައްކަތް ކޮށްގެން. 2018ގަ ރައީސް ޔާމީން އިޢުލާންކުރީ ގުޅީފަޅު ހިއްކާފަ، ފުށިދިއްގަރު ފަޅުން ބޮޑުބައެއް ހިއްކާ ވާހަކަ. އެއިރުން ގޯތި ބޭނުންވާ އެންމެންނަށް ލިބޭނެ. އަދި ފުލެޓު ބޭނުންވާ އެންމެންނަށް ލިބޭނެ. އެއީ އަސްލު ގެދޮރުވެރިކަމަށް އޮތް އެންމެބޮޑު ޙައްލު"

ގުޅީފަޅުގެ މަޝްރޫޢު ކުރީ ސަރުކާރުން އެހާ ލަސްކުރީ ކީއްވެގެންތޯ މިއީ ވެސް އުފެދޭ ސުވާލެކެވެ. މިސުވާލުގެ ޖަވާބު ދެއްވަމުން ޑރ. މުއިއްޒު ވިދާޅުވީ " ޖެހިގެން އޮތް ތިލަފުށީގަ ކުނި އެންދުން ނުނިމޭ. އެހެންނަމަވެސް ރައީސް ޔާމީންގެ ފަހު އަހަރު ކުނި އެންދުން  ހުއްޓާލުމަށްޓަކައި ކުނި ނައްތާލާނެ ޒަމާނީ ނިޒާމެއް ކުރިއަށް ގެންދިއުމަށް ފަންޑިންގ ހޯދުމުގެ ހުރިހާކަމެއް ހަމަޖެއްސި. މިހާރު މިއުޅެނީ ގުޅީފަޅުގަ އަނެއްކާވެސް ޕޯޓް އަޅަން. އެއިރުން އެގެއްލެނީ މާލޭގެ ރަށްވެހިންނަށް ގޯތި ދޭން އެންމެ ކައިރިން އޮތް ފަޅު. ޕޯޓް އެޅީމަ ބިން ގެއްލުމުގެ އިތުރަށް ޕޯޓް ދުރު މުސްތަޤުބަލަކަށް ސެކުއަރ އެއް ނުވޭ. އެއީ އެފަޅަކީ ބޮޑު ކުރެވޭ ޖާގަ ތަނަވަސް ތަނަކަށް ނުވާތީ. ތިލަފުއްޓަކީ މި ސަރަޙައްދުގަ އޮތް އެންމެބޮޑު ޕޯޓް ހެދޭނެ ތަން".  

ކުރީ ސަރުކާރުގައި ފުލެޓު ދީފައިވަނީ އިންސާފުވެރިކޮށް ނޫންކަމަށް ބުނެ އަމާޒުވާ ފާޑުކިޔުންތަކާއި ގުޅޭގޮތުން ވިދާޅުވީ، އިންސާފުގެ ވާހަކަ ދައްކާއިރު މިހާރުގެ ސަރުކާރުން މަސައްކަތްކުރަނީ އިންސާފުވެރިކޮށް ނޫންކަމަށެވެ.

"ވަރަށްގިނަ ގޭގެއަށް ޒިޔާރަތްކުރެވިއްޖެ. ފުލެޓު އަތުލި ގެތަކުގެ މީހުން ވަރަށް ހާލުގަ އެއުޅެނީ. އެހާލަތަށް ބަދަލެއް ނާދޭ. ކުރިއަށްވުރެ ގޯސް ބައެއް ގޭގޭގަ ހާލަތު. އަޅުގަނޑުމެން ކަންތައްކުރީ އިންސާފުންކަން މިދަންނަވަނީ، ފުރަތަމަ ހުޅުވާލި ދުވަހުން ފެށިގެން ޕޮއިންޓް ދޭނެ ގޮތާއި ޝަރުތުވެސް ދިޔައީ އިޢުލާންކުރަމުން. އެއްވެސް ކަމެއްގަ ނޯންނާނެ ފޯމުލާ މީހާއަށް މިލެވެނީ ކޮންކަހަލަ މަޝްރޫއެއްގަ ކަމެއް ކޮބައިތޯ ޝަރުތަކީ މިކަންކަން ނޭގި. ކޮންމެ ކޭސް އެއްގަ އޮންނާނެ ފެންނަން ފުލެޓު ލިބުނުގޮތް. ވަކި ޝަރުތުތަކާއި އެއްގޮތަށް ހޮވޭ މީހާ ހޮވުނީމަ އެއޮތީ އިންސާފު" ޑރ.މުޢިއްޒު ވިދާޅުވިއެވެ.

ސަރުކާރުން އިތުރަށް ފުލެޓު އަޅަންޖެހޭ ކަން ފާހަގަކުރައްވާ ވިދާޅުވީ، އިންސާފަކީ ގެދޮރުވެރިކަން ބޭނުންވާ އެންމެނަށް އެފުރުސަތު ހޯދައިދިނުން ކަމަށެވެ.

މާލޭގެ މޭޔަރ ކަމަށް ކުރިމަތިލެއްވުން

މާލޭ ރައްޔިތުންނަށް ދަތިވެފައިވާ ކަންކަން ޙައްލުކޮށްދިނުމުގެ ޔަޤީންކަމެއް އެންމެބޮޑަށް ދެވެންއޮތީ ޑރ.މުޢިއްޒަށް ކަމުގައި ޤަބޫލުކުރައްވާތީ ކުރިމަތިލެއްވީ ކަމަށް ވިދާޅުވިއެވެ. "މިހާތަނަށް ރައްޔިތުންނަށް ދިމާވެފައިހުރި ދަތިތަކުގަ، މާލޭގެ މައްސަލަތައް ޙައްލުކުރުމުގަ ޢަމަލީ މަސައްކަތް ކުރެވި، ތަޖުރިބާތަކެއް ލިބި، ދާއިރާގެ ތަޢުލީމު ﷲ ގެ އިރާދަފުޅުން ހާޞިލްވެފަ ހުރީމަ ކުރިމަތިމިލީ" މޭޔަރުގެ މަޤާމަށް ކުރިމަތިލެއްވި ސަބަބުތަކުގެ ތަފްޞީލް ދެއްވަމުން ވިދާޅުވިއެވެ.

އަދި ރައްޔިތުން ބޭނުންވަނީ ނަތީޖާ ނެރެން ކަމަށާއި، ދިގުލައިގެންދާ އުންމީދެއް ނެތް ދުވަސްތަކެއް ނޫން ކަމަށް ވިދާޅުވިއެވެ. "ކުރު މުއްދަތެއްގައި އުންމީދުތައް ހަޤީގަތަކަށްވާނެ ދުވަސްތަކެއް ފެންނަން ބޭނުންވަނީ. އަޅުގަނޑުގެ ކިބައިން ފެންނާނީ އިޚުލާސްތެރިކަން، ތެދުވެރިކަން، އަމާނާތްތެރިކަން. އަޅުގަނޑަކީ ކުރިން ކައުންސިލްތަކުގަ ކަންތައްކުރި ގޮތަށް ކުރާނެ މީހެއް ނޫން. ސަރުކާރުން ރައްޔިތުންގެ ވިންދާ އެއްގޮތަށް ކުރާ ކޮންމެ ކަމެއްގަ އަޅުގަނޑު ހުންނާނަން އެންމެ ކައިރީގަ" އަންނަމަހު އޮންނަ ލޯކަލް ކައުންސިލް އިންތިޚާބުގައި މާލޭ ސިޓީގެ މޭޔަރުކަމަށް ކުރިމަތިލައްވާ ކެމްޕެއިން ކުރައްވަމުން އަންނަ ޑރ.މުޢިއްޒު ވިދާޅުވިއެވެ.

2018ވަނަ އަހަރު ބޭއްވުނު ރިޔާސީ އިންތިޚާބަށްފަހު ޕީޕީއެމް އާއި ގުޅިވަޑައިގެންނެވި ޑރ.މުޢިއްޒު ވަނީ ސިޔާސީ ގޮތުން ކުރިއަށް ވަޑައިގެންނެވުމަށް ވެދެއްވި އެހީތެރިކަމަށް ރައީސް ވަހީދު، ރައީސް ޔާމީން އަދި ޝެއިޚް އިމްރާންގެ އިތުރުން ޝިޔާމް އަށް ޝުކުރު އަދާކުރައްވާފައެވެ.

" އަޅުގަނޑަށް މިހާހިސާބަށް އާދެވުނީ ބައްޕަ އަލްމަރުހޫމް ޝެއިހް ޙުސައިން ޢަބުދުއްރަޙްމާން އަދި މަންމަ ހުސްނާ އާދަމް ކުރެއްވި މަސައްކަތާއި ދެއްވި އެއްބާރުލުމުން. އަދި މިހާރު ވަރަށް ބުރަކޮށް މަސައްކަތް ކުރަމުންދާއިރު އަޅުގަނޑުގެ އަންހެނުން ސާޖިދާ މުޙައްމަދު އެންމެބޮޑު ސަޕޯޓެއް ވެދެނީ." ވެރިރަށް މާލެއަށް އުފަން ޑރ.މުޢިއްޒު ޝުކުރުވެރިކަމާއި އެކު ފާހަގަކުރެއްވިއެވެ.