ބޭސް ފަރުވާ ކުރުމަށް އާސަންދަ ހަމަޖެހުނު ކަމުގައިވިއަސް، ރާއްޖެއިން ބޭރުގައި ގިނަ ދުވަސްތަކެއް ހޭދަވާ ބަލި މީހުން އެހީތެރިކަމަށް އެދި ސޯޝަލް މީޑިއާގައި ޕޯސްޓްތައް ޖަހާފައި ހުންނަތަން ފެނެއެވެ. 'ޒީޓައިމްސް' މެދުވެރިކޮށް މިފަދަ ފަރާތްތަކާއި ގުޅޭ ރިޕޯޓްތައް ވާނީ ގެނެސްދީފައެވެ. އަދި ތަކުރާރުކޮށް ގިނަ އަދަދެއްގެ ބަޔަކު އެހީތެރިކަމަށް އެދެމުންދާތީ ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) އިން އެފަދަ ފަރާތްތަކަށް އެހީތެރިކަން ފޯރުކޮށްދޭގޮތުގެ މަޢުލޫމާތު މިރިޕޯޓުގައި ގެނެސްދޭނަމެވެ.
އާސަންދަ ސްކީމުން އެހީ ލިބިގެން ރާއްޖެއިން ބޭރަށްދާ ފަރާތްތަކުގެ ތެރެއިން އެންސްޕާއިން އެހީ ފޯރުކޮށްދިނުމުގައި ބަލަނީ، ފަރުވާ ހޯދުމަށް ބޭނުންޖެހިފައިވާ މިންވަރާއި އެފަރާތުން އެދިފައިވާ އެހީގެ ބާވަތާއި، އެކުގައި ދަތުރުކުރާ އެހީތެރިންގެ އަދަދަށާއި، ބައްޔަށް ފަރުވާ ކުރުމަށް ރާއްޖެއިން ބޭރުގައި ހޭދަކުރަންޖެހޭނެ ކަމަށް އަންދާޒާކުރާ މުއްދަތަށެވެ. މާލީ އެހީ ދިނުމުގައި އެހީގެ މިންވަރު ކަޑައަޅަނީ އިސްވެދެންނެވި ކަންތައްތަކަށް ރިއާޔަތްކޮށްފައި ކަމަށް އެންސްޕާއިން 'ޒީޓައިމްސް' އަށް ލިޔުމުން ދިން ޖަވާބުގައި ބަޔާންކޮށްފައިވެއެވެ.
އަދި އާސަންދަ ސްކީމުން އެހީ ނުލިބި ރާއްޖެއިން ބޭރަށް ބޭސްފަރުވާ އަށް ދާ ފަރާތްތަކުގެ ތެރެއިން އެންސްޕާއަށް އެހީއަށް އެދި ހުށަހަޅާ ފަރާތްތަކަށް ވެސް އެހީތެރިކަން ފޯރުކޮށްދެއެވެ. އެހީގެ ކުޑަ ބޮޑުމިން ކަނޑައަޅަނީ ބަލިމީހާ ދޭ މަޢުލޫމާތާއި ހުށަހަޅާ ލިޔެކިޔުންތަކަށް ބެލުމަށްފަހުގައި ކަމަށް ވަނީ އެންސްޕާއިން މަޢުލޫމާތުދީފައެވެ.
އާސަންދައިން ނުލިބޭ ބޭހާއި އިންޖެކްޝަން ފަދަ ތަކެތި ހޯދުމަށް ދަތިވާކަމަށް ބައެއް ފަރާތްތަކުން މަޢުލޫމާތު ދީފައިވާތީ އެކަމާއި ގުޅޭގޮތުން ސުވާލުކުރުމުން އެންސްޕާއިން ބުނެފައިވަނީ ބޭހާއި އިންޖެކްޝަން ގަތުމަށް އެހީ ފޯރުކޮށްދޭ ކަމަށެވެ. " ބޭސް ނުވަތަ އިންޖެކްޝަން ބޭނުންކުރާ މުއްދަތަށާއި ބަލީގެ ބާވަތާއި، ބަލިމީހާގެ ހާލަތަށް ބަލާ ބޭސް ނުވަތަ އިންޖެކްޝަން ގަތުމަށް ހިނގާނެކަމަށް އަންދާޒާކޮށް އެހީއަށް އެދޭ ފަރާތުން ހުށަހަޅާ ޚަރަދު އެނގޭނެފަދަ ކޯޓޭޝަންއަށް ރިއާޔަތްކުރުމަށްފަހު އެހީ ހަމަޖައްސައިދެވޭނެ" އެންސްޕާއިން މަޢުލޫމާތު ދިނެވެ.
ދިވެހިރާއްޖެއިން ހޯދާ ބައެއް ފަރުވާތަކުގައި ވަގުތުން ވަގުތަށް ބޭނުންވާ ބައެއް ބޭސް އަދި އިންޖެކްޝަން އާސަންދައިން ނުލިބި އެފަދަ ބޭހާއި އިންޖެކްޝަން ގަތުމަށް އަމިއްލައަށް ބޮޑު ހޭދައެއް ކުރަންޖެހުމަކީ ބަލިމީހުންގެ ކަންބޮޑުވުމެކެވެ. އެންސްޕާއިން ބުނެފައިވަނީ މިފަދަ ފަރާތްތަކުން ބޭހާއި އިންޖެކްޝަން ގަތުމަށް ފައިސާ ދެއްކި ރަސީދު ހުށަހެޅުމުން މާލީ އެހީތެރިކަން ފޯރުކޮށްދޭނެ ކަމަށެވެ.
އައިޖީއެމްއެޗް އިން އޮޕަރޭޝަން ކުރެވެން ނެތިގެން ހިތުގެ އޮޕަރޭޝަން ފަދަ ބައެއް ބޮޑެތި އޮޕަރޭޝަން އޭޑީކޭ ހޮސްޕިޓަލުން ކުރަމުންދާއިރު، އެއޮޕަރޭޝަންތަކަށް އާސަންދައިގެ ވަކި އިންސައްތައެއް ހަމަޖެހޭކަމުގެ ޝަކުވާ އެފަރާތްތަކުން ދަނީ ކުރަމުންނެވެ. އެންސްޕާއިން ބުނެފައިވަނީ އެފަދަ ފަރާތްތަކަށް ވެސް އެހީތެރިކަން ހަމަޖައްސަމުންދާ ކަމަށެވެ. "ހަމަޖައްސާދޭ އެހީގެ އިންސައްތަ ކަނޑައަޅާނީ އަމިއްލަ ހޮސްޕިޓަލްތަކުން ކޮށްދޭ އަގުގެ އެންމެ ކުޑަ އަގަށް ރިއާޔަތްކޮށް" އެންސްޕާއިން މަޢުލޫމާތުދިނެވެ.
ބޭސް ފަރުވާއާއި ގުޅޭގޮތުން އެހީތެރިކަމަށް އެދި ހުށަހަޅާ ފަރާތްތަކަށް ރަސްމީ ބަންދު ނޫން 7 ދުވަހުގެ ތެރޭގައި އެހީ ހަމަޖެހޭކަން ނުވަތަ ނޫންކަން އަންގާނެ ކަމަށާއި، އެހީ އަށް އެދި ފޯމު ހުށަހަޅާއިރު ފުރިހަމަ މަޢުލޫމާތު ހުށަހެޅުމަށް އިސްކަން ދިނުމަށް އެންސްޕާއިން ވަނީ އެދިފައެވެ. އަދި އަވަހަށް ޖަވާބު ބޭނުންވާ ފަރާތްތަކުން ސަބަބު ބަޔާންކޮށް ކޯލް ސެންޓަރު ނަންބަރު 1402 އަށް މަޢުލޫމާތު ހިއްސާކުރުމުން ޖަވާބު ލިބިގެންދާނެ ކަމަށް އެންސްޕާއިން ވަނީ ބުނެފައެވެ.
