ނ.މިލަދޫގައި ރެދިންގެ ގައުފުނި ކިޔާތަނެއް އޮވެއެވެ. މިއީ ބުޑިސްޓް މޮނާސްޓްރީއެއް ހުރި ތަނެއް ކަމަށް ވަނީ މަޢުލޫމާތުލިބިފައެވެ. މިތަންހުރީ ރަށުގެ އިރުމަތީ ފަރާތުގައެވެ. އެދިމާއިން 150 ވަރަކަށް ފޫޓަށްވުރެ ބޮޑުބައެއް ގިރައިގެން، ތަނުގެ ބޮޑުބައި މިހާރުވަނީ މޫދަށް ގޮސްފައެވެ. ކުރިން މިތަނާ ގޮނޑުދޮށާ ދެމެދު 180 ވަރަކަށް ފޫޓު ހުރިކަމަށްވެއެވެ. މިތަނަކީ ތަހްޤީޤުކުރަން މުހިންމުތަނެއްގެ ގޮތުގައި ސަޤާފީ ތަރިކަ ރައްކާތެރިކުރާ ޤައުމީ މަރުކަޒުން ވަނީ ފާހަގަކޮށްފައެވެ.
1987ވަނަ އަހަރު މެއިމަހުގެ ތެރޭގައި އާކިއޮލޮޖިކަލް ސަރވޭ އޮފް އިންޑިއާގެ ޓީމަކާއި އަލްއުސްތާޛު މުޙައްމަދު އިބްރާހީމް ލުތުފީ ވަނީ މިލަދޫ ތަހުޤީޤު ކޮށްފައި ކަމަށާއި، މުޙައްމަދު އަމީނުގެ ވެރިކަމުގެ ދުވަސްވަރުގައި ބަޔަކު މީހުން ރެދިންގެ ގައުފުނި ކިޔާ ސަރަހައްދުން ގާ ނަގަނިކޮށް، ހިރިގަލުން ހުރި ފޮއްޓެއް ފެނިގެން މާލެ ފޮނުވުނު ކަމަށް ތަހުޤީޤު ކުރެވުނުއިރު ރަށު އޮފީހުން ވަނީ މަޢުލޫމާތުދީފައެވެ. އަދި ރަށުގެ މެދުތެރެއިން ކޮންނަމުންދާއިރު ބުޑިސްޓު ދީނުގެ ދުވަސްވަރުގެ ގައުފަދަ ތަކެތި ފެންނަމުންދާކަމަށް ބުނެވެއެވެ.
މަޢުލޫމާތު: ސަޤާފީ ތަރިކަ ރައްކާތެރިކުރާ ޤައުމީ މަރުކަޒު
