މިއަދަކީ ރޯދަމަހުގެ ފުރަތަމަ ދުވަސް ކަމުގައިވާތީ މާލެ އަދި ހުޅުމާލެ މާރުކޭޓުގަ މުދާ ވިއްކާ އަގުތައް ބަލާލީމެވެ. އެންމެބޮޑަށް ފާހަގަވީ މާލޭ ލޯކަލް މާރުކޭޓުން އަދި ހުޅުމާލެ ރަށު މާރުކޭޓުން ވެސް ދޮންކެޔޮ ހުސްވެފައިވާ ކަމެވެ. އަދި ދޮންކެޔޮ ލިބެންހުރީ މަދު ފިހާރައަކުން ކަމުގައިވާއިރު އާދައިގެ ދޮންކެޔޮވަކެއް ފިހާރަތަކުގައި އުޅެނީ 4 ރުފިޔާ އަދި 5 ރުފިޔާ އަށެވެ. ދޮންކެޔޮ ކިލޯ އެއް އުޅެނީ 50 ރުފިޔާ އަށް ވުރެ މަތީގައެެވެ.
ޖުމްލަގޮތެއްގައި ރަށު މާރުކޭޓަށް ބަލާއިރު ލިބެންހުރި ބާވަތްތައް މަދުކަން ފާހަގަކުރެވުނެވެ. 'ޒީޓައިމްސް' އަށް މަޢުލޫމާތުދެމުން ރަށު މާރުކޭޓުގެ ގޮޅިތަކުގައި މަސައްކަތްކުރާ މީހުން ބުނެފައިވަނީ ރޯދަފެށެން ކައިރިވިއިރުވެސް މުދާ ލިބުމުގައި ދަތިތަކެއް އުޅޭކަމަށެވެ.
" ރާއްޖެއިން ބޭރުން ގެންނަން ހަމަޖެހިފައިހުރި ބާވަތްތައް 3 ދުވަހަށް ލަސްވެގެންދިޔަ ޖާގަ ނުލިބިގެން ނުގެނެވި. މިބަލަނީ ވަރަށް އަވަހަށް ލިބޭނެ ކަމަށް. ތަރުކާރީ އާއި މޭވާ ގެންނަނީ ބޭރުން. އަދި ރަށްރަށުން ގެންނަ އެއްޗެހީގެ ތެރެއިން ކަރާ ލިބޭ. އެކަމަކު ތާޒާ މިރުސް އަދި އެހާވަރަށް ނުލިބޭ" ރަށު މާރުކޭޓު ގޮޅިއެއްގައި ހުރި އަންހެނަކު މަޢުލޫމާތުދިނެވެ.
މާލެ އަދި ހުޅުމާލެ މާރުކޭޓަށް ބަލާއިރު ކަރާގެ އަގު އުޅެނީ ކުރިއަށްވުރެ ބޮޑުކޮށެވެ. މިގޮތުން ދިވެހިރާއްޖޭގައި އުފައްދާ ކަރާ ކިލޯ އެއް އާންމުކޮށް ވިއްކަނީ 35ރ އަދި 40ރ އަށް ކަމަށް ވަނީ މަޢުލޫމާތު ލިބިފައެވެ. އެހެންނަމަވެސް ފިޔާ އަލުވީގެ އަގު ހެޔޮކަމަށް ގޮޅިތަކުން ފާހަގަކޮށްފައިވެއެވެ.
އާންމުކޮށް ބޭނުންކުރާ ބައެއް ބާވަތްތަކުގެ އަގުހުރިގޮތް:
ދިވެހި މިރުސް ކިލޯ އެއް: 350ރ. އާއި 600ރ. އާއި ދެމެދު
ބޭރު މިރުސް ކިލޯ އެއް: 100ރ އަށް ވުރެ މަތީގައި
ކާއްޓެއް 5ރ އާއި 20ރ ދެމެދުގައި
ލުނބޯ ކިލޯ އެއް އުޅެނީ 40 ރުފިޔާ އަށް ވުރެ މަތީގައި
ކޮންމެ އަހަރަކު ރޯދަމަހު މާރުކޭޓުގައި ވިއްކަން ހުންނަ ބާވަތްތަކުގެ އަގަށް ބޮޑު ބަދަލެއް އާދެއެވެ. މިއަހަރު ރޯދަމަހުވެސް ކުރިއަށްވުރެ ތަކެތީގެ އަގު ބޮޑުވެފައިވާއިރު، އެކަށީގެންވާވަރަށް ތަކެތި ނުލިބޭނަމަ މިހާރަށްވުރެ އަގު އުފުލިގެން ގޮސްދާނެ ކަމަށް މާރުކޭޓުގައި މަސައްކަތްކުރާ ބައެއް މީހުން ވަނީ މަޢުލޫމާތު ދީފައެވެ.
