ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް އަމާޒުކޮށް، މާލޭގައި އެއްޗެއް ގޮއްވާލައިގެން ރޭގެ ވަގުތެއްގައި ދިން ހަމަލާގައި ޒަޚަމްވެވަޑައިގަތުމުން މިވަގުތުވެސް އެމަނިކުފާނަށް ގެންދަވަނީ އޭޑީކޭ ހޮސްޕިޓަލުގައި ފަރުވާ ދެއްވަމުންނެވެ. ބުރާސްފަތި ދުވަހުގެ ރޭ 8:30 ހާއިރު ރައީސް ނަޝީދުގެ ގެކޮޅު ހުންނަ ނީލޯފަރު ހިނގުމާއި މަޖީދީމަގު ގުޅޭ ސަރަހައްދުގައި އެއްޗެއް ގޮއްވާލާފައިވަނީ ރައީސް ނަޝީދު ކާރުކޮޅަށް އަރާވަޑައިގަންނަވަން އުޅުއްވަނިކޮށެވެ. މިހަމަލާގައި އެމަނިކުފާނަށް ލިބިވަޑައިގެންނެވި ގެއްލުންތަކުގެ ތަފްސީލެއް އަދި މިހަމަލާދިން ގޮތެއް ރަސްމީ ސިފައެއްގައި މިހާތަނަށް ހާމަކޮށްފައި ނުވެއެވެ.
އެހެންނަމަވެސް ރައީސް ނަޝީދުގެ އަރިސް ބޭފުޅަކު މަޢުލޫމާތު ދެއްވިގޮތުގައި އެއްޗެއް ގޮއްވާލުމުން ބުރަބުރައިގެން ދިޔަ އެތިއެތިކޮޅު ހެރިގެން ރައީސް ނަޝީދުގެ ފުއްޕާމެއަށް ވަނީ ގެއްލުންލިބިފައެވެ. އަދި ލިބުނު ގެއްލުންތަކާއި ގުޅިގެން މިހާތަނަށް ތިން އޮޕަރޭޝަނެއް ކޮށްފައިވާކަމަށް ވަނީ މަޢުލޫމާތުދީފައެވެ.
މިހަމަލާގައި ރައީސް ނަޝީދުގެ އިތުރުން ދެން ޒަޚަމްވީ އެމަނިކުފާނުގެ 2 ހަށިފާރަވެރިންކަމުގައިވާ މޯލްޑިވްސް ނޭޝަނަލް ޑިފެންސް ފޯސްގެ 2 އޮފިސަރުންގެ އިތުރުން އިނގިރޭސިވިލާތަށް ނިސްބަތްވާ މީހަކާއި އާންމުންގެ މީހަކަށް ކަމަށް މޯލްޑިވްސް ޕޮލިސް ސަރވިސް އިން ވަނީ މަޢުލޫމާތުދީފައެވެ. އެންމެބޮޑަށް ޒަޚަމްވެ ވަޑައިގަތީ ރައީސް ނަޝީދެވެ. ރައީސް ނަޝީދާއި އެންމެ ކައިރީގައި ތިބި 2 ހަށިފާރަވެރިންގެ ތެރެއިން އެކަކުގެ އަތާއި ފައިވަނީ ޒަޚަމްވެފައެވެ. ހަމަލާދިންވަގުތު ބުރައިގެން ދިޔަ އެތިއެތިކޮޅު އޭނާގެ އަތާއި ފައިގެ އެކިތަންތަނަށް ހުރީ ހެރިފައެވެ. ފަރުވާއަށްފަހު މިހާރުވަނީ ހޮސްޕިޓަލުން ދޫކޮށްލާފައެވެ. މިހަލާގައި އަނިޔާވި ބިދޭސީމީހާގެ ފައިވެސް ވަނީ ވަރަށްބޮޑަށް ޒަހަމްވެފައެވެ.
މިހަމަލާދެވުނު ވަގުތު ބާރުއަޑެއް އިވިގެން ދިޔައިރު އެސަރަހައްދުގައި ހުރި ވެހިކަލްތަކުގެ އިތުރުން ފިހާރައިގެ ބިއްލޫރިވެސް ވަނީ ތަޅައިގެންގޮސްފައެވެ. ހާދިސާ ހިނގި ސަރަހައްދު ފުލުހުން ބަންދުކޮށްފައިވާއިރު އެސަރަހައްދު ވަނީ ފުލުހުންގެ ފޮރެންސިކް ޓީމުން ބަލައި ފާސްކޮށްފައެވެ.
ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ޤައުމާއި މުޚާތަބުކުރައްވާ ވިދާޅުވެފައިވަނީ މިހަމަލާ މޯލްޑިވްސް ޕޮލިސް ސަރވިސްގެ އިތުރުން މޯލްޑިވްސް ނޭޝަނަލް ޑިފެންސް ފޯސް އިން ތަހުޤީޤުކުރިއަސް މި ހަމަލާގެ ފުރިހަމަ ތަހުޤީޤެއް ހިންގުމަށް ބައިނަލްއަޤްވާމީ ތަޖުރިބާކާރުންގެ އެހީތެރިކަން ހޯއްދަވަމުން ގެންދަވާކަމަށެވެ.
" އޮސްޓްރޭލިއަން ފެޑެރަލް ޕޮލިސްގެ ތަހުޤީޤު ޓީމެއް އަންނަ ހޮނިހިރު ދުވަހު ރާއްޖެ އައުމަށް ވަނީ ހަމަޖެހިފައި. މިއީ ދިވެހިރާއްޖޭގެ ޑިމޮކްރަސީއަށާއި އިޤްތިސާދަށް ދިން ހަމަލާއެއް. މިފަދަ އަމަލުތަކަށް ދިވެހި ބިމުގައި ޖާގައެއް ނޯންނާނެ" ރައީސުލްޖުމްހޫރިއްޔާ ވިދާޅުވިއެވެ.
ރައްޔިތުންގެ މަޖިލީހުން ނެރުނު ބަޔާނުގައި ވަނީ ރައީސް ނަޝީދުގެ ފުރާނަފުޅަށް އަމާޒުކޮށް މިދިން ފިނޑި ޓެރަރިސްޓް ހަމަލާ ހަރުކަށި އިބާރާތުން ކުށްވެރިކޮށްފައެވެ.
" މިހަމާލާގައި ލިބިވަޑައިގެންނެވި އަނިޔާތަކަށް އޭޑީކޭގެ މަލްޓި ސްޕެޝަލިޓީ މެޑިކަލް ޓީމަކުން ގެންދަވަނީ ރައީސް ނަޝީދަށް ފަރުވާ ދެއްވަމުން" ރައްޔިތުންގެ މަޖިލީހުގެ ބަޔާނުގައިވެއެވެ.
ދިވެހި ޤައުމަށް ސިހުމެއް ލިބިގެންދިޔަ މިހަމަލާ ކުށްވެރިކޮށް އެމްޑީޕީއިން ނެރުނު ބަޔާނުގައިވަނީ "މި ހަމަލާއަކީ ސީދާ ރައީސް މުހައްމަދު ނަޝީދުގެ ހަށިކޮޅަށް އަމާޒުކޮށް ފުރާނަފުޅު ދުއްވާލުމަށް ދީފައިވާ ޓެރަރިސްޓް ހަމަލާއެއް. މިކަމުގައި ޝާމިލުވާ އެންމެހާ ފަރާތްތަކާއި މެދު ފިޔަވަޅު އެޅުމަށް މި ޕާޓީއިން ގޮވާލަން" ކަމަށެވެ.
އިދިކޮޅު ޕީޕީއެމް އިން ވެސް މިހަމަލާ ކުށްވެރިކޮށް ފުރިހަމަ ތަހުޤީޤެއް ހިންގުމަށް ގޮވާލާފައިވާއިރު، ސޯޝަލް މީޑިއާގައި ގިނައަދަދެއްގެ ބަޔަކުދަނީ މިހަމަލާއާއި ދެކޮޅަށް އަޑުއުފުލަމުންނެވެ. މީގެތެރޭގައި ރާއްޖޭގެ ރައީސްކަން ކުރައްވާފައިވާ ބޭފުޅުންގެ އިތުރުން ސިޔާސީ ޕާޓީތަކުގެ އިސްވެރިންނާއި، ރައްޔިތުންގެ މަޖިލީހުގެ މެންބަރުންވެސް ހިމެނިވަޑައިގަންނަވައެވެ. ޖުމްލަގޮތެއްގައި މިހަމަލާ ކުށްވެރިކޮށްފައިވާއިރު މީހެއްގެ ފުރާނައަށް ނުރައްކާވާ އަމަލެއް ހިންގުމަކީ ބަލައިގަނެވޭނެ ކަމެއް ނޫންކަމަށް ވަނީ ބުނެފައެވެ. އަދި މި ހަމަލާ ބައެއް މީހުން ސިފަކޮށްފައިވަނީ ޖެހިލުންކުޑަ ހައްދުފަހަނައަޅައިފައިވާ ޓެރަރިސްޓް ހަމަލާއެއްގެ ގޮތުގައެވެ.
