ސިނަމާލެ ބްރިޖުގައި މިއަދު ހަވީރު ހިނގި އެކްސިޑެންޓެއްގައި ރައްޔިތުންގެ މަޖިލީހުގެ ކުޑަހުވަދޫ ދާއިރާގެ މެންބަރު އަހްމަދު އާމިރަށް ވަނީ ވަރަށްބޮޑެތި ޒަހަމްތަކެއް ލިބިފައެވެ.
ޒީޓައިމްސް އަށް މަޢުލޫމާތު ދެއްވަމުން އާމިރު ވިދާޅުވީ މި އެކްސިޑެންޓް ހިނގީ މިއަދު ހަވީރު 4:45 ހާއިރު ކަމަށެވެ.
" އަޅުގަނޑު ދިޔައީ މާލެއިން އެއާޕޯޓަށް ދާންވެގެން. ބައްޕަމެން ރަށަށް ފުރުވަންވެގެން، 5:30 ގައި ފްލައިޓް އޮތީމަ އެއަށްވުރެ ކުރިން ޗެކިންގ ކުރަންވެގެން އަޅުގަނޑު ދިޔައީ. ތަންކޮޅެއް ބާރަށް ދެވުނީ. ދަނިކޮށް ސައިކަލުގެ ފުރޮޅު ހަލާކުވީ. ފުރޮޅު ހަލާކުވީމަ ސައިކަލު ބެލެންސް ނުކުރެވުނު. ކޮންޓްރޯލުން ނެއްޓިގެން ގޮސް ޖެހުނީ" އާމިރު ހޮސްޕިޓަލުގައި އޮންނަވައިގެން މަޢުލޫމާތު ދެއްވިއެވެ.
އާމިރަށް ލިބިވަޑައިގެންނެވި ގެއްލުންތައް ފެންނަ ފޮޓޯ ޒީޓައިމްސް އަށް ލިބިފައިވާއިރު، އާމިރުގެ މޫނާއި ފައިންވެސް ގިނައަދަދަކަށް ލޭއައިސް ހުރި މަންޒަރު ފޮޓޯތަކުން ވަނީ ފެނިފައެވެ.
" ފައިގެ ދަށްފުށް ވަރަށް ފުންކޮށް ޒަހަމްވެފަހުރީ. މޫނު މަތީގައި ކަނައަތްފަރާތުގެ ބުމައާއި ދިމާލުންވެސް ވަރަށްބޮޑަށް ޒަހަމްވެފަހުރީ. މިހާރު ހުރީ ފަހާފަ. ދެން އެކިތަންތަން ހުރީ މަށައިގެން ގޮސްފައި"
އާމިރު ވިދާޅުވީ މި ލިބުނު ޒަހަމްތަކުގެ ސަބަބުން ގައިގެ އެކިތަންތަނަށް ވަރަށް ބޮޑަށް ތަދުވާ ކަމަށެވެ. ﷲގެ އިރާދަފުޅުން އެއްވެސް ތަނެއް ބިންދައިގެން ނުދާކަމަށް ވިދާޅުވިއެވެ. އަދި ހޮސްޕިޓަލުން ދޫކުރާނެ ދުވަހެއް އެނގޭނީ ސްކޭން ރިޕޯޓު ލިބި ޑޮކްޓަރު ބެލުމަށްފަހުގައި ކަމަށް އާމިރު ވަނީ ވިދާޅުވެފައެވެ.
