މިއަދަކީ ބައިނަލްއަގްވާމީ ލޭހަދިޔާ ކުރާ މީހުންގެ ދުވަހެވެ. އާންމުކޮށް ލޭހަދިޔާ ކުރާ މީހުންނަށް އެކޮށްދެވެނީ އިންސާނީ ޚިދުމަތެކެވެ. އެންމެ ކުރިއަރާފައިވާ ޤައުމުތަކުގެ ތެރޭގައި ހިމެނޭ އެމެރިކާއިން ކޮންމެ ދެ ސިކުންތެއްގެ ތެރޭގައި ކޮންމެވެސް ކަހަލަ ލޭ އެޅުމާއި ގުޅޭ ހާދިސާއެއް ކުރިމަތިވެއެވެ. އަހަރެއްގެ ތެރޭގައި އެކިފަހަރުމަތިން ލޭ ހަދިޔާ ކުރެވިދާނެއެވެ. ނަމަވެސް ބައެއް މީހުންނަކީ ސިއްޙީ ގޮތުން ދިމާވާ ހާލަތެއްގެ ސަބަބުން ލޭހަދިޔާ ނުކުރެވިދާނެ ބަޔަކަށް ވެދާނެއެވެ. އެގޮތުން ނޭނގި ނަމަވެސް އެޗް.އައި.ވީ ފަދަ ބަލިތައް ޖެހިފައިވާ މީހުން ލޭހަދިޔާ ކުރުމަކީ ނުރައްކާތެރި ކަމެކެވެ.
"ކޮންމެ އަހަރަކު 6 ފަހަރު ލޭހަދިޔާ ކުރެވިދާނެ އެއީ ކޮންމެ 56 ދުވަހަކުން" ނިއުޔޯކް ބްލަޑް ސެންޓަރގެ ޑރ.ބްރޫސް ސަޗިސް ބުނެފައިވެއެވެ. އަދި "ހަށިގަނޑުގައި ރެޑް ބްލަޑް ސެލްސް ބަދަލު ކުރަން 8 ހަފްތާ ނަގާނެ" ކަމަށްވެސް ޑޮކްޓަރު ބުނެފައިވެއެވެ. އެގޮތުން ޕްލޭޓްލެޓްސް އަހަރަކު 24 ފަހަރު އަދި ޕްލާސްމާ 12 ފަހަރު ހަދިޔާ ކުރެވިދާނެއެވެ. ސަބަބަކީ މި ދެބާވަތަކީ ރެޑް ބްލަޑް ސެލްއަށްވުރެން އަވަހަށް އުފެދޭ އެއްޗަކަށް ވުމެވެ. ކޮންމެ ޑޮނޭޝަނެއްގެ ކުރިން ހިމަގްލޮބިން ހުންނަ މިންވަރު ޗެކްކުރަނީ އެ ސަބަބަށްޓަކައެވެ.
އެފްޑީއޭއިން އާންމު ކޮށްފައިވާ ގައިޑްލައިނުގައި ވާގޮތުން 18 އަހަރުން މަތީގެ މީހުންނަށް ލޭހަދިޔާ ކުރެވޭއިރު 16 އަހަރާ 17 އަހަރުގައިވެސް ބެލެނިވެރިއެއްގެ ހުއްދަ ލިޔުމަކުން ލިބިގެން ލޭ ހަދިޔާ ކުރެވިދާނެއެވެ. ލޭހަދިޔާ ކުރުމުގައި މަތިވެގެން ވަކި އުމުރެއް ނޯންނައިރު ބައެއް ތަންތަންތަނުން 75 އަހަރުން މަތީގެ މީހުންގެ ގައިން ލޭ ނަގަނީ ޑޮކްޓަރެއްގެ ލަފާގެ މަތިންނެވެ. އެމެރިކާގައި 38 އިންސައްތަ މީހުން ލޭހަދިޔާކުރެއެވެ. ނަމަވެސް ބައެއްބާވަތްތަކުގެ ބޭސް ބޭނުންކުރުމަށްފަހު ވަކި މުއްދަތެއް ހަމަވުމުން ނޫނީ ލޭހަދިޔާ ކުރުމަކީ ރައްކާތެރި ކަމެއް ނޫނެވެ. އަދި އެހެންމެ މާބަނޑު އަންހެނުން ވިހެއުމަށްފަހު 6 މަސްފަހުން ލޭހަދިޔާ ކުރުމަކީ އެންމެ ރަނގަޅުގޮތެވެ. އަދި މަދިރީގެ ޒަރިއްޔާއިން ފެތުރޭ ބަލިތައް މެލޭރިއާ، ޑެންގޫ ފަދަ ބަލި ޖެހިއްޖެނަމަ ލޭ ހަދިޔާ ނުކުރެވިދާނެ ހާލަތެއް ކުރިމަތިވެދާނެއެވެ.
މަސްދަރު: ބިޒިނަސް އިންސައިޑަރ
