އއ.އުކުޅަހު ކުޑަމިސްކިތް ނުވަތަ މާމިސްކިތަކީ ހިރިގަލުން ބިއްތަށްހަދާ އެތެރޭގެ ބެރިތަކާއި ތަނބުތައް ލިޔެލާޖަހާފައި ހުރި މިސްކިތެކެވެ. އަދި މަތިވަޑާންގަނޑު ލާއިން ކުރެހުން އަޅާ އެކި އިބާރާތުން އަރަބިބަހުން ލިޔެލާފައިހުރި ވަރަށް ތާރީޚީ އާސާރީ މިސްކިތެކެވެ.
މިމިސްކިތުގެ ބެރިތަކާއި ތަނބުތައް ހަދާފައިހުރީ ހައިވަކަރުންނެވެ. މިމިސްކިތަކީ ހިޖުރައިން 1116 ވަނަ އަހަރު އިމާރާތް ކޮށްފައިވާ މިސްކިތެކެވެ. މިސްކިތުގައި ހުރި ލިޔެކިޔުންތައް ބެލިއިރު އޭގެތެރެއިން ލިޔުމެއްގައި އަރަބި ބަހުން އުކުޅަހު ކަނބާ އާމިނަތު ބިންތު މުހައްމަދު ލިޔެފައިވެއެވެ. މިރަށުގައި ތިބި ދުވަސްވީ މީހުން ބުނެފައިވާގޮތުގައި މި މިސްކިތަކީ އުކުޅަހު ކަނބާފާނާއި ދިޔަމިގިލި ރަދުން ކައިވެނި ބައްލަވައިގެން އެކަމަނާގެ ނަމަށް ނިސްބަތްކޮށް ބިނާކޮށްފައިވާ މިސްކިތެކެވެ.
މައުލޫމާތު: ސަޤާފީ ތަރިކަ ރައްކާތެރިކުރާ ޤައުމީ މަރުކަޒު
