ދުނިޔޭގައި އެކި މީހުންނަށް ދިމާވާނީ އެކިގޮތެވެ. ޒަވާޖީ ހަޔާތެއް ފެށުމަށްފަހު ބައެއް މީހުންނަށް ﷲ ގެ ތަނަވަސް ރަހްމަތްފުޅުން ވަރަށް އަވަހަށް ދަރިން ލިބެއެވެ. އެކަމަކު ބައެއް މީހުންނަކީ އެ ނަސީބު އެހާއަވަހަށް ލިބޭ ބައެއް ނޫނެވެ. އަދި އެއްގޮތަކަށްވެސް އެ ނަސީބު ނުލިބޭ މީހުންވެސް އުޅޭކަން މިއީ ޤަބޫލުކުރަންޖެހޭ ހަޤީޤަތެކެވެ.

އެކަމަކު ހިތާމައަކީ ބައެއް މީހުން ކުރާ ބޭކާރު ސުވާލުތަކުން ހިތް ކުދިކުދިވާތީއެވެ. ކޮބާ ދަރިއަކު ހޯދާކަށް ނުވޭ؟ އަދިވެސް ނުވިހަން ދޯ ތިހުންނަނީ؟ ޒުވާންކަން ގެއްލިދާނެތީތަ ނުވިހަން ތިހުންނަނީ؟ އެންމެ ކުއްޖެއް ހޯދާފަ ހުއްޓާލީ ދޯ؟ ތިޔައުމުރުގެ އެންމެން ކަހަލަ ގޮތަކަށް މިހާރު ދަރިން ހޯދައިފި! މިފަދަ ސުވާލާއި ފާޅުކުރާ ބޭކާރު ޚިޔާލުތަކުން އަނެކާއަށް ކުރާ އަސަރު އެންމެންނަށް ވިސްނޭނެނަމަ ކިހާ ރަނގަޅުހޭ ހިތަށް އަރައެވެ.

ރަހުމަތްތެރިއަކަށް ދިމާވި ކަމެއް ވެސް ހިއްސާކޮށްލާނަމެވެ. އޭނާ ފުރަތަމަ ބަނޑުބޮޑުވެ ދެފަހަރުވެސް ބައިގެންދިޔައީއެވެ. އެކަމަކު އެވާހަކަ ސުވާލުކުރާހާ އެންމެން ކައިރީގައި ބުނާކަށް ނުޖެހެއެވެ. އަދި އަމިއްލަ ދިރިއުޅުމުގެ ވާހަކަ ކިޔައި ނުދިނުމަކީ އެއީ ހިތަށްއެރިހާ އެއްޗެއް ބުނެ އެމީހުން ދެރަކުރަންވީ ސަބަބެއްވެސް ނޫނެވެ.

Advertisement

" އަހަރެން ފެންނަހާ މީހަކު އަހާނެ އަދިވެސް ބަނޑުބޮޑެއް ނުވޭ؟ ކިހިނެއްވީ އަނެއްކާ؟ ދަރިއަކު ހޯދަން ބޭނުން ނުވަނީތަ؟ މިނިވަންކަމާއި އެކީގައި މިހާރު ތިއުޅޭގޮތަށް ނުއުޅެވޭނެތީ ދޯ ކުއްޖަކު ނުހޯދަނީ؟ މިފަދަ އެތައް ސުވާލެއް ކުރާ ކޮންމެފަހަރަކު ހިތަށްކުރާ އަސަރު ބުނެދޭން ނޭނގޭ. ރާއްޖެއިންނާއި ރާއްޖެއިން ބޭރުގެ ދެޤައުމަކުން ބޭސްކޮށްގެންވެސް އަދި ކުއްޖަކު ލިބުމުގެ ނަސީބެއް ނުލިބޭ. އެކަމަކު ދިމާވާހާ މީހުންގެ މިސުވާލުތަކަކަށް ވެސް ހުއްޓުމަކަށް ނާދޭ" އެ ރަހުމަތްތެރިޔާ ކިޔައިދިނެވެ.

މިފަދަ އެހެން ހާދިސާ އެއްވެސް ހިއްސާ ކޮށްލާނަމެވެ. ނީނާ ކިޔާ އެ ރަހުމަތްތެރިޔާ އަކީ އެކި ސަބަބުތަކާއި ހުރެ ތަފާތު އޮޕަރޭޝަންތަކެއް ކޮށް އަދި އެއްފަހަރު ބަނޑުބޮޑުވެ ބަނޑަށް ދަރިފުޅު މަރުވި މީހެކެވެ. އެކަމަކު އޭނައަށްވެސް މީހުންގެ ބޭކާރު ސުވާލުތަކާއި ކުރިމަތިލާންޖެހޭވަރު މަދެއް ނޫނެވެ.

ޑޮކްޓަރީ ފަރުވާއަށްފަހުވެސް ދަރިއަކު ނުލިބި އެހޭދަވާ މުއްދަތަކީ ވަރަށް އެހެންކަހަލަ އިހުސާސްތަކެއް ކުރުވާ ދުވަސްތަކެކެވެ. ދިރިއުޅުމުގައި އެ އިހުސާސްވާ އެކަނިވެރިކަމާއި ހިތާމައަށްވުރެ މީހުންގެ ނޭދެވޭ ބަސްތަކާއި ކުރިމަތިވުމުން އެލިބޭ ހިތްދަތިކަން މާބޮޑެވެ. ދިރިއުޅުމައިގެން ހިތްވަރާއިއެކު ކުރިއަށްދާ މިފަދަ ދެމަފިރިންނަށް ބޭނުންވަނީ ޢާއިލާއާއި އެކުވެރިންގެ ލޯތްބާއި ހިތްވަރެވެ. އެމީހުންގެ އެކަނިވެރިކަން ހަނދާންކޮށްދޭ މީހަކަށް ނުވަމާ ހިނގާށެވެ.

މީހުން އުޅޭ ގޮތަކުން ދިރިއުޅުމުގައި އެމީހަކަށް ދިމާވިގޮތެއް ނޭނގިދާނެއެވެ. ދަރިން ހޯދަން ބޭނުންވިއަސް އެ ނަސީބު ބޭނުންވާ ވަގުތަކު ފުރިހަމަ ނުވެދާނެއެވެ. ދަރިން ހޯދަން ބޭނުންނުވާ މީހެއްކަމަށް ބުނެ ނޭދެވޭ ބަސްތައް އަމާޒުކުރުމުގެ ހައްގެއް އެއްވެސް މީހަކަށް ނޯންނާނެއެވެ. އަދި އަމިއްލަ ދިރިއުޅުމާއި ގުޅޭގޮތުން ބޭކާރު ސުވާލު ނުކުރަމާ ހިނގާށެވެ. ތިމާއަށް ތިކުރެވޭ ސުވާލަކީ އަނެކާގެ ހިތަށްހެރޭ ހަންޖަރަކަށް ހެދުމުގެ ބަދަލުގައި، ތިމާގެ ދުލުން ބޭރުވާ ބަހަކީ އަނެކާއަށް ލިބޭ ހިތްވަރަކަށް އަދި ހިންހަމަޖެހުމަކަށް ހެދުމަށް މަސައްކަތްކުރަމާ ހިނގާށެވެ.