ހަނދާނަށް އަންނަނީ އަވަށްޓެރި ގެތަކުގެ އެއްއުމުރެއްގެ ކުދިންނާއިއެކު ކުޅެއުޅުނު ދުވަސްތަކެވެ. ކުޑައިރު ކިޔައިއުޅޭ ގޮތުންނަމަ 'ޗުއްކަންނާރާ'، 'ފަސައްބަހަ' މިއީ އެންމެ ފޯރީގައި ކުޅެއުޅުނު ކުޅިވަރެވެ.
ކޮވިޑްގެ ބަލިމަޑުކަމުގެ ސަބަބުން ރަށަށް ނާދެވި ދުވަސްތަކެއް ވޭތުވުމަށްފަހު މިއައީ ވަރަށް އުފަލުންނެވެ. އެހެންނަމަވެސް ބަލާލި ކޮންމެ ދިމާލަކުން ފެންނަންހުރި ގިނަ ގެތަކަކީ މިހާރު މީހުން ދިރިނުއުޅޭ ގެތަކެވެ. ބައެއް ގޭގޭގައި ބަންގްލަދޭޝް މީހުން ދިރިއުޅެމުން އަންނައިރު ގިނަގެތައް ހުރީ ހުހަށެވެ. މަދު ގެއެއްގައި އުމުރުން ދުވަސްވީ މައިންބަފައިން އުޅެމުންދާ އެކަނިވެރި ދިރިއުޅުން ފެނުނެވެ.
ރަށަށް އައުމުން ފެންނަ ކޮންމެ މީހަކުވެސް މަރުހަބާ ކިޔަމުން އައީ އުފަލާއިއެކުގައެވެ. އެކަމަކު ދެން މާލެ ދަނީ ކޮންއިރަކުތޯ ސުވާލު ނުކުރާ މީހަކު މަދެވެ. އެއީ އެމީހުންނަށް ފެންނަންހުރި މަންޒަރުތަކަށް ބަލާއިރު ގިނަ މީހުން ރަށަށް މިއަންނަނީ ޗުއްޓީއަށެވެ. އެނބުރި ދާނެކަން އެމީހުންނަށް އެނގޭތީ ސުވާލުކުރަނީ ކަމަށް ޤަބޫލުކުރަމެވެ.
އަޅުގަނޑުގެ ޗުއްޓީގެ ފުރަތަމަ ދުވަހުވެސް ފަތިހުގެ ހިތްގައިމު ފިނިކަމުގެތެރޭގައި އަމާން މަގެއްގައި ހިގާލުމުގެ އުފާ ހޯދީމެވެ. އެލިބުނު ހިތްހަމަޖެހުމާއި އުފަލަކީ ލިޔުމުން ބަޔާންކުރެވޭ ވަރަށްވުރެ ބޮޑު އުފަލެކެވެ. ވަށައިގެން އިވެމުން ދިޔައީ އެކިވައްތަރުގެ ދޫނީގެ ހިތްގައިމު އަޑެވެ. އެކަމަކު އެކަނިވެރި މައިންބަފައިން ގޭގޭގައި އެއުޅޭ އެކަނިވެރިކަން ފެނުމުން ހިތަށް ފުން އަސަރެއް ކުރުވިއެވެ. ލޯބިން ބޮޑުކުރި ކުދިންގެ އެހީތެރިކަން އެންމެ ބޭނުންވާ ދުވަހު އެމައިންބަފައިން އެއުޅެނީ އެކަނިވެރި ކަންމަތީގައެވެ. އޭގެތެރެއިން ބައެއް މީހުންނަކީ ދަރިން ކިތަންމެ ބޭނުންވިއަސް ރަށްފުށުގެ ހިތްގައިމު މާހައުލުގައި ދިރިއުޅެން ބޭނުންވާ މީހުންނެވެ. އެކަމަކު ދަރިންނާއިއެކު ދިރިއުޅެން ބޭނުންވިއަސް މާލޭގެ ކުދިކުދި ގޮޅިތަކުގައި ސާފުވައި ނުލިބި އުޅެންޖެހޭ ހާލުން މާލޭގައި ދިރިއުޅެން ބޭނުން ނުވާ މައިންބަފައިން ވެސް މަދެއް ނޫނެވެ.
ކޮންމެއަކަސް ރަށުގެ މިހިތްގައިމު މާހައުލު މާހިތްހަމަޖެހެއެވެ. އަޅުގަނޑުގެ 4 އަހަރުގެ ދަރިފުޅުވެސް މިހާރު މާލެ ދާން ބޭނުމެއް ނުވެއެވެ. މަންމަ މިރަށުގައި ނުއުޅެނީ ކީއްވެގެންތޯ ދަރިފުޅު ތަކުރާރުކޮށް ސުވާލުކުރާއިރު އެދަރިފުޅުގެ ޅަ ސިކުނޑިއަށް ވިސްނައިދެވޭވަރަށްވުރެ ސަބަބުތައް މާގިނައެވެ. ރަނގަޅު ތަޢުލީމެއް ލިބެން ނެތްތަނުގައި ސިއްޙީ ފަރުވާވެސް އެކަށީގެންވާ ގޮތެއްގައި ލިބެންނެތެވެ. އަދި ވަޒީފާގެ ފުރުސަތުވެސް މަތީ ތަޢުލީމް ހާސިލުކުރި ދާއިރާއިން ލިބެންނެތެވެ. ސަބަބުތައް އެހާވެސް ގިނައެވެ.
އެހެންނަމަވެސް ގޭގައި ޖެހިގެން އެއޮންނަ ބީޗާއި، ޕާކަށް ހިނގާލަން ގޮސް، ގޯތީގައި ހައްދާފައިހުންނަ ތަފާތު މޭވާއާއި ތަރުކާރީ ކައިގެން، ސާފުވައިލިބިގެން ރަށްފުށުގެ ދިރިއުޅުން މާހިތްގައިމެވެ.
އާއިލާ އާއި އަވަށްޓެރިންގެ ލޯބި ލިބިގެން ކުޑައިރު އެއުޅުނު ގޮތަށް މިހާރު އުޅެވެން ނެތެވެ. ޒަމާނަށް އައި މިބަދަލުގެ ސަބަބުން އެއިރު އެކުޅުނު ކުޅިވަރުތަކުގެ ބަދަލުގައި ޗުއްޓީ ހޭދަކުރަމުން އަންނަ ކުދިން އަތުން ވެސް ފެންނަނީ ފޯނާއި ޓެބްލެޓެވެ. އަޅުގަނޑުމެން ކުޑައިރު ކުޅުނު ކުޅިވަރުތައް ކުޅުމުގެ ފުރުސަތު މިހާރުގެ ކުދިންނަށް ލިބޭނެހެނެއް ހީނުވެއެވެ. އެކަމަކު އަދިވެސް އެއްފަހަރު ކުޑައިރުގެ އެކުވެރިންނާއި އެކު ޕިކްނިކް ގޮސް މަޖާކޮށް އުޅެލާހިތްވެއެވެ.
ވަށައިގެން ފެންނަންހުރި ކޮންމެ ގެއަކީ ވެސް ކުޑައިރުގެ އުފާވެރި ހަނދާނެއް އެގެއަކާއި އެކު ވާގެއެކެވެ. ކުޑައިރު ދިރިއުޅުނީ އެކުވެރި، އެކަކު އަނެކަކަށް ލޯތްބާއި އެކު ޤަދަރުކުރާ ބައެއްގެތެރޭގައެވެ. މިހާރު އޭގެތެރެއިން ބައެއް މީހުން މިދުނިޔެ ދޫކޮށްފައިވިނަމަވެސް، ގިނަ މީހުން މާލެ ބަދަލުވެ ފަޅުވެފައިވާ ގެތައް ފެނުމުން ހަމަ ހަގީގަތުގައިވެސް ލޮލުން ކަރުނަ އައެވެ.
މާލޭގައި ދިރިއުޅެން މިޖެހިފައިވަނީ ކޮންފަދަ މަޖުބޫރީ ހާލަތެއްގައިހެއްޔެވެ. ލިބޭހާ ރުފިޔާއެއް އެތިބޭތަނަކަށް ދައްކައިގެން އުޅޭ އުޅުން ރަށްފުށުގެ އަރާމު ދިރިއުޅުމާއި ބަލާއިރު ވަރަށް ތަފާތެވެ. އަޅުގަނޑުގެ ދަރިފުޅެކޭ އެއްގޮތަށް އުޅެން ބޭނުންވަނީ ރަށްފުށުގެ ހިތްގައިމު މާހައުލުގައެވެ. އަޅުވެތިކަމެއް އިހުސާސް ނުވާ ދޫނިތަކެއް ފަދައިން ސާފުވައިލިބި ޖާގަ ބޮޑު، އުފާވެރިކަމުގެ ބަގީޗާއެއްފަދަ ރަށުގައެވެ. ލޯބިވާ އާއިލާ އާއި އެކު އެއްގެއެއްގައި އެއްސުފުރާ އިން ކައިގެން ދިރިއުޅުމުގެ ނަސީބު ލިބިފައިވަނީ ޔަގީނުންވެސް ވަރަށް ނަސީބުގަދަ ބަޔަކަށެވެ. ޝުކުރުވެރިވާށެވެ.
