ހއ.ބާރަށު ހުކުރު މިސްކިތުގެ ދެކުނު ފަރާތުން އިރުމަތީ ފަރާތު އަތިރިމައްޗަށް (ފުއްޓަރު ފަރާތަށް) ދާން އޮތް މަގަށް ކިޔައި އުޅެނީ ކަމަނާ މަގެވެ. މިމަގަކީ މުހައްމަދު ތަކުރުފާނު ރެހެންދި ގޮއްޔެ ގޮވައިގެން ވަޑައިގެންނެވި މަގު ކަމުގައި ބުނެވެއެވެ.
ކުރީ ޒަމާނުގައި މިމަގުގައި ފެންވަޅެއް ހުރެއެވެ. މިވަޅު ފަހުން ފެންނަން ހުރީ އަޑިގަނޑެއް ގޮތަށެވެ.
" މި މަގަކީ ކުރީޒަމާނުގައި ވިޔަޒޯރު އަތޮޅުވެރިކަމުގައި ބޮޑު ޢީދު ފާހަގަކުރުމަށް، އަތޮޅުގެ ބައެއް ރަށްރަށުން މީހުން އައިސް ޢީދު ކުޅިވަރު ކުޅުނު ދުވަހު އުތީމު މުހައްމަދު ތަކުރުފާނު ބޮލަށް ގޮންޖެއްސެވި ބާރަށު ބޯށިވަޅު ބުޅާ ފާތިމާގެ ރެހެންދި ގޮއްޔެ ގޮވައިގެން ރަށުގެ އިރުމަތީ ފުއްޓަރު ފަރާތަށް ގެންދިޔަ މަގު. މި ފުއްޓަރު ފަރާތުން އެނބުރި އައީ އެކަކު އަނެކަކަށް ލޯބިވެ ކައިވެނި ކުރުމަށް އެއްބަސްވެގެން." ސަޤާފީ ތަރިކަ ރައްކާތެރިކުރާ ޤައުމީ މަރުކަޒުން ވަނީ މައުލޫމާތު ދީފައެވެ.
އަދި މިމަގަކީ ސިއްތިމާވާ ރަނިކިލެގެފާނު އާލާސްކަންފުޅެއް ޖެހިގެން ކިޔަވާ ގެއެއް އަޅާ ކިޔެވެލި ކިޔެވި މަގެވެ. މިކިޔެވެލި ކިޔެވިއިރު ފެން ނެންގެވުމަށް ބޭނުންކުރެއްވި ވަޅު މިމަގުގެ ދެކުނު ފަރާތު ފުއްޓަރާ ކައިރީގައި ފޮރުވާލެވިފައި އެބަހުރި ކަމަށް ވަނީ މައުލޫމާތު ލިބިފައެވެ.
ކަމަނާ މަގު ރީތިކޮށް ބެހެއްޓުމަށްޓަކައި މަގުގެ ދެފަރާތުގައި ދިވެހި ރުއް އިންދާފައިވާއިރު، ދޭތެރެ ދޭތެރެއިން ރައްޔިތުން ނުކުމެ މަގު ކޮށާ އަލިކޮށް، ކުނިކަހާ ހަދަމުން ދާ ކަމަށްވެއެވެ.
