ނ.ކެނދިކުޅުދޫ މަރްޔަމް ރިޒްނާ އަކީ، އާއިލާއިން މައުލޫމާތުދޭ ގޮތުގައި އަމިއްލައަށް އެއްވެސް ކަމެއް ނުކުރެވޭހާ ބަލި މީހެކެވެ. ބަލިހާލަތު ހުރިގޮތުން މިވަގުތު ހިނގާ ނުއުޅެވެއެވެ. އުމުރުން 36 އަހަރުގެ ރިޒްނާ ބެލުމުގެ ޒިންމާ އުފުލަނީ އޭނާގެ މަންމަ އިނާޔާ އަބްދުއްރަހްމާން އެވެ.
'ޒީޓައިމްސް' އަށް މައުލޫމާތު ދެމުން އިނާޔާ ފާހަގަކުރިގޮތުގައި، އޭނާގެ 9 ކުދިންގެ ތެރެއިން 3 ވަނަ އަށް ހުރި ރިޒްނާ އަކީ އެންމެ ކުޑައިރުއްސުރެ ވެސް ބަލާބެލުމަށް އެހެން ކުދިންނާ ތަފާތު ކުއްޖެކެވެ.
" ހަށިގަނޑުން ވަރަށް ބޮޑުކޮށް އަބަދުވެސް ހުންނަނީ. ތެލަސީމިއާ ކެރިއަރެއް. އެކަމަކު ކުޑައިރު ލޭ ނާޅާ. އެއިރު ޑޮކްޓަރު ބުނި އެއްފަހަރު އަޅައިފިއްޔާ ދެންޖެހޭނޭ އަބަދުވެސް ލޭ އަޅަން."
2004ވަނަ އަހަރުގެ ސުނާމީ އެރި ދުވަހެވެ. އެދުވަހަކީ އެއިރު ތައިރޮއިޑް ބަލި ތަހައްމަލު ކުރަމުންދިޔަ ރިޒްނާ ގެ ގަޔަށް އިންޖެކްޝަނެއް ޖެހި ދުވަހެކެވެ. އެއަށްފަހު ހަށިގަނޑުން ވަރުދޫވެ ތަފާތުގޮތެއް ފެންނާތީ ރިޒްނާ ޑޮކްޓަރަށް ދެއްކިއެވެ.
" އެއިރު ރިޒްނާ އަށް ވާނީ 18 އަހަރު. ޑޮކްޓަރު ބަލާފަ ބުނީ ރިޒްނާ ގައިގަ ހުރީ އެންމެ 5 ޕޮއިންޓް ލޭ ކަމަށް. ޑރ. އަލީ ލަތީފާއި ޑރ. ޝިޔާމް ރިޒްނާ އަށް ފަރުވާ ދިނުމަށްފަހު ހެދި ޓެސްޓްތަކުން ފުރަތަމަ ފަހަރަށް ކިޑްނީގެ ބަލި ހުރިކަން އެނގުނީ."
ކިޑްނީ ބަލީގެ ހަގީގަތް އިތުރަށް ބެލުމަށް ރާއްޖެއިން ބޭރަށް ސާމްޕަލް ފޮނުވައިގެން ހެދި ޓެސްޓްގެ ނަތީޖާ ލިބޭވަރުވީ ދެމަސް ދުވަހުން ކަމަށް އިނާޔާ ވަނީ ބުނެފައެވެ. 2 ކިޑްނީ އިންފެކްޓް ވެފައިވާތީ އެދުވަހުން ފެށިގެން ރިޒްނާ ދަނީ ކިޑްނީ ބައްޔަށް ފަރުވާ ހޯދަމުންނެވެ. އަދި ކޮންމެ މަހަކު ލޭ ވެސް އަޅަމުންނެވެ.
"ޑައެލިސިސް ހަދާތާ 8 އަހަރު ވެއްޖެ. ޑައެލިސިސް ހަދަން އެއިރު އަތަށް ލެއްވި ފިސްޓިއުލަރ އިނީ ވައަތުގަ ލައްވާފަ. ޑައެލިސިސް ހަދަމުން ދަނިކޮށް އެ އަތް ދުޅަވެގެން އަތް ފަޅައިގެން ދިޔައީ. އެހެންވެ އޮޕަރޭޝަން ކޮށްފަ ފިސްޓިއުލަރ ނަގާފަ މިހާރު އިނީ މެޔަށް އެއްޗެއް ލައްވާފަ. އެއީ ވަރަށް ބޮޑު ވޭނެއް." އަސަރާއިއެކު ރިޒްނާގެ މަންމަ ކިޔައިދިނެވެ.
މިހާތަނަށް 6 ފަހަރު އިތުރު ފަރުވާ އަށް ރިޒްނާ އިންޑިއާ އަށް ގެންގޮސްފައިވާއިރު، އޭގެތެރެއިން 5 ފަހަރު ގެންދިޔައީ އަމިއްލަ ހަރަދުގައި ކަމަށް އާއިލާއިން ވަނީ މައުލޫމާތު ދީފައެވެ. އެއްފަހަރު އާސަންދައިގެ އެހީގަ ގެންދިޔައިރު މިހާރު އާއިލާއިން ދަނީ ޑޮކްޓަރުގެ ލަފައާއި އެއްގޮތަށް ރިޒްނާ ގޮވައިގެން އޮޕަރޭޝަން ކުރުމަށް އިންޑިއާ އަށް ދިއުމަށް މަސައްކަތް ކުރަމުންނެވެ.
ކިޑްނީ ބަލި ސްޓޭޖް 4ގައި ހުރި ރިޒްނާގެ ވައަތަށް އަނެއްކާވެސް ފިސްޓިއުލަރ ލެއްވުމަށް އޮޕަރޭޝަން ކުރަންޖެހިފަވާއިރު، ޑައެލިސިސް ހެދުމަށް މެޔަށް ލައްވާފަހުރި އެތިކޮޅު ވެސް ބަދަލުކުރަން ޖެހޭ ކަމަށް އާއިލާއިން ވަނީ މައުލޫމާތު ދީފައެވެ. ރާއްޖެއިން ދެވެން ނެތް ފަރުވާ އަށް އާސަންދަ ހަމަޖެހިފަވާއިރު، އިންޑިއާ އަށް ނުފުރި ލަސްވަނީ ވިސާ ހަމަނުޖެހިގެންނެވެ.
މާލޭގައި ދިރިއުޅޭ މި އާއިލާގައި ރިޒްނާގެ ބައްޕަ އަކީ ދޯންޏެއްގައި މަސައްކަތް ކުރާ މީހެކެވެ. ހަފްތާ އަކު 3 ދުވަހު ޑައެލިސިސް ހަދަން ރިޒްނާ ގޮވައިގެން ދިއުމުގެ އިތުރަށް، ޒަރޫރީ ހުރިހާ ބޭނުމެއް ފުއްދުމުގެ މަސައްކަތް ކުރަންޖެހޭތީ އާމްދަނީ ހޯދުމަށް އިތުރު މަސައްކަތެއް ނުކުރެވޭ ކަމަށް އިނާޔާ ވަނީ ފާހަގަކޮށްފައެވެ. ގަނޑުކޮޅެއް ނެގުމަށް ކުރި އޮޕަރޭޝަނަށް ފަހު އޮކްސިޖަން ލެވެލް ދަށްވުމުން މިމަހު ކުރީކޮޅުގަ ވެސް އައިސީޔޫގައި ފަރުވާދީފައިވާ ރިޒްނާ އަށް މާލީ އެހީތެރިކަމެއް ފޯރުކޮށްދިނުމަކީ އާއިލާގެ ވަރަށް ބޮޑު އެދުމެކެވެ.
ނޯޓް: މި ޢާއިލާ އަށް އާންމުންގެ ފަރާތުން އެހީތެރިކަން ލިބިފައިވާތީ، މިރިޕޯޓުގައި ކުރިން ހިމަނަައިފައިވާ ފޯން ނަންބަރާއި އެކައުންޓް ނަންބަރު ވާނީ އުނިކޮށްފައެވެ. ޒީޓައިމްސްގައި މިރިޕޯޓު ޕަބްލިޝް ކުރުމުން މި އާއިލާއަށް އެހީތެރިކަން ފޯރުކޮށްދިން މީހުންނަށް ވަރަށްބޮޑަށް ޝުކުރިއްޔާ!
