ކަޅުފޮއި ރެއެއްގެ ދަންވަރެވެ. ސިއްސައިގެން ގޮސް ހޭލެވުނީ ގުގުރީގެ އަޑަށެވެ. ގަޑި ބަލާލިއިރު ގަޑީގެ ކަށި ހުރީ 3 ޖެހުމާ ކައިރިވެފައެވެ. ހަނދާނަށް އަންނަނީ މީގެ 15 އަހަރުގެ ކުރީގެ މާޒީއެވެ. އެއީ ހިތި ހަނދާން ތަކާއި ގުޅިފައިވާ ހިތި މާޒީއެކެވެ. މާޒީގެ އެތައް ސަފްހާތަކެއް އަހަރެންގެ ހިތުގައި ބިންވަޅު ނެގިފައި ވަނީ އިހަކަށް ދުވަހު ވީ ކަމެއް ފަދައިންނެވެ. އަހަރެންގެ ހިތް ކުދިކުދިވެގެން ގޮސް ރޮވެން ފެށުނެވެ. އެ މާޒީގެ ފެށުންވެސް ހިގައިދިޔައީ މިފަދަ ކަޅުފޮއި ރެއެއްގައެވެ. އެއީ އަހަރެންގެ ހަޔާތުގައި އެންމެ ބަރުދާސްތު ކުރަން ދަތި ނިންމުން ނިމުނު ރެއެއް ކަމަށް އޭރު ކުޑަކޮށްވެސް ހީވެފައެއް ނުވެއެވެ. މިކަހަލަ ވިސްނުންތަކެއްގައި ގެއްލިފައި އޮއްވާ ދެން އިވެންފެށީ ފަތިސް ނަމާދުގެ ބަންގީގެ އަޑެވެ. އަވަސް އަވަހަށް ތެދުވެ ފެންވަރާލައިގެން ނަމާދަށް އެރީމެވެ. ނަމާދުކޮށް ނިމިގެން އެކަމާމެދު ވިސްނިފައި ރޮވުނެވެ. ނަމަވެސް އެހާލަތު ދެން ބަދަލު ނުވާނެކަން އެނގެއެވެ.
ދުވަސްވަރަކީ އަހަރެންގެ ޒުވާން ދުވަސްވަރެވެ. އަހަރެންގެ ހަޔާތުގައި ދެކެމުން ދިޔައީ ފޮނި އުންމީދު ތަކަކާއި ފޮނި ހުވަފެން ތަކެކެވެ. ހާސިލް ކުރަން ބޭނުންވީ ވަރަށް އަރާމު އުފާވެރި ދިރިއުޅުމެކެވެ. އެހެނަސް އަހަރެންގެ އާއިލާއަކީ އެހާ ތަނަވަސް އާއިލާއެއް ނޫނެވެ. ގްރޭޑް 10 ނިމި މަތީ ތައުލީމް ހާސިލް ކުރުމަށް މާލެ ފޮނުވޭނެ ތަނަވަސްކަން އަހަރެންގެ އާއިލާގައި ނެތުމުން ރަށުގައި ހުރީއެވެ.
އާދައިގެ މަތިން ކޮންމެ ދުވަހެއްގެ ހަވީރަކީ ގޭދޮށު ހުރިހާ ކުދިންވެސް ބަށި ކުޅެން އެއްވާ ގަޑިއެވެ. އަހަރެމެން ކުޅެންދަނީ ރަށު އޮފީހާ ޖެހިގެން ދެކުނުން އިރަށް އޮންނަ ހުސްބިމަށެވެ. އެހިސާބަކީ ހިތްގައިމު ކަމާއި ހަމަހިމޭން، އަދި ގެއާވެސް މާދުރުނޫން ހިސާބެކެވެ. ކުޅުމުގެ ފޯރީގައި އުޅެނިކޮށް ބޯޅައަކުން ޖެހި އަތަށް ތަދުވާން ފެށުމުން އެތަނުގައި ހުރި ފާރުބުރިއެއްގެ މަތީގައި އިށީދެލީމެވެ. ކައިރީގައި ހުރި ފޯނު ބޫތުން ފޯން ރިންގްވާން ފެށުމުން އެދިމާލަށް ނަޒަރު ހިންގާލެވުނެވެ. އެންމެންވެސް ތިބީ ކުޅުމުގެ ފޯރިއަށް ގެއްލިފައި ކަމުން އެއްވެސް ކުއްޖަކު ފޯނުނަގަން ދިއުމަކަށް ސަމާލު ކަމެއް ނުދިނެވެ. އެހެން ކަމުން އަހަރެން ފޯނު ނަގަން ދާން ހިނގައިގަތީމެވެ. ނަމަވެސް އެހިސާބަށް ނުދެވި އުޅެނިކޮށް ފޯނު ކެޑިއްޖެއެވެ. އެކަމަކު އަނެއްކާވެސް ފޯނު ރިންގުވާން ފަށައިފިއެވެ. އަހަރެން ގޮސް ފޯނުނަގާފައި ހަލޯ އޭ ބުނެލީމެވެ. އެކޮޅުން ވާހަކަދެއްކި ކުއްޖާވެސް ހަލޯ ބުނެލުމަށްފަހު ތީ ކޮންކުއްޖެއްތޯ އަހާލިއެވެ. އަހަރެން ޖަވާބުގައި ބުނެލީ "ކޮންކުއްޖެއް ތިހޯދަނީ" މިހެންނެވެ. އެކޮޅުން ވާހަކަ ދެއްކި މީހާ ސަމާސާ ރާގަކަށް ބުނެލީ މިހޯދަނީ ތިކުއްޖާ ކަމަށެވެ. އެހެން ބުނުމުން އަހަރެން ބުނީ "ތިހޯދާ ކުއްޖާ މިތާކު ނެތް، ފަހުން ގުޅާލަންވީއެއްނު ދޯ" އެހެންކިޔާފައި އަހަރެން ފޯނު ކަނޑާލީމެވެ.
އަނެއްކާވެސް ފޯނު ރިންގުވިއެވެ. އަޅާނުލާ ހިނގައިގަތީމެވެ. ނަމަވެސް ކެނޑިނޭޅީ ފޯނު ރިންގުވާން ފެށުމުން އަނެއްކާވެސް ގޮސް ފޯނުނެގީމެވެ. ހަމަ އެކުއްޖާއެވެ. "އަޅެ ޕްލީސް މަޑުކޮށްލަބަލަ ވާހަކަ ދައްކާލަން، ތީ ހާދަ ހިތްދަމައިގަންނަ ޖާދުވީ އަޑެކޭ" މިހެންބުނުމުން އަހަރެން ޖަވާބުގައި ބުނެލީ "ނުދަންނަ މީހުންނާ ވާހަކަދައްކާ ނޫޅެން" ކަމަށެވެ. އަނެއްކާވެސް އެކޮޅުން ވާހަކަދެއްކި މީހާ އޭނަގެ ނަން ބުނެލިއެވެ. "އަހަރެންނަށް ކިޔަނީ ނާޒިމް، އަހަރެން މަސައްކަތް ކުރަނީ އަރިއަތޮޅު ރިސޯޓެއްގެ ފްރޮންޓް އޮފީސް މެނޭޖަރަކަށް" މިހެން ބުނުމުން އަހަރެންވެސް ވާހަކަދައްކައި ތައާރަފްވެލީމެވެ. އޭނާގެ ވާހަކައިގައި ހިތްދަމައި ގަންނަ ޖާދުވީ ގޮތެއް ހުއްޓެވެ. ސަކަ މިޒާޖެއްގެ ވެރިއެއްކަން ފާހަގަވިއެވެ. އިރުކޮޅަކުން ނަމާދަށް ބަންގިގޮވަން ފެށުމުން ފޯނު ބާއްވާފައި އަވަސްއަވަހަށް ވާހަކަ ކުރުކޮށްލާފައި އެހެން ކުދިންނާއެކު ގެއަށްދިއުމަށް ހިނގައިގަތީމެވެ.. ގެއަށް އައިސް އެމީހަކާ މެދު ވިސްނެން ފެށުނެވެ. އެއީ ކިހިނެއް ހުންނަ މީހެއްތޯ އާއި، އެމީހަކާ ބައްދަލުވުމަށް އަހަރެންގެ ހިތް އެދެންފެށިއެވެ.
ޖެހިގެން އައި ދުވަހުވެސް އެގަޑިއަށް އަހަރެމެން ކުޅެން ދިޔައީމެވެ. ހިތާ ހިތާ އިންތިޒާރު ކުރެވެމުން ދިޔައީ އެފޯނު ކޯލަށެވެ. އިރު އިރުކޮޅާ ނަޒަރު ހިންގާލެވެނީ ފޯނުބޫތާ ދިމާލަށެވެ. ކުޅުމުގެ މާބޮޑު ޝައުގުވެރި ކަމެއް ނެތް ނަމަވެސް ކުޅުމުގެ ތެރޭގައި އެހެން ކުދިންނާ މަޖާކޮށް އުޅުމަށްފަހު، އިންތިޒާރު ކުރެވުނު ފޯނު ކޯލް ނައުމުން މާޔޫސް ކަމެއްގައި ހުރެ ގެއަށް އައީމެވެ. އެނގެނީ ހަމައެކަނި އޭނާގެ ނަމާއި މަސައްކަތްކުރާ ރިސޯޓުގެ ނަމެވެ. ފޯނު ނަންބަރު އަހާލާކަށް ހަނދާނެއް ވެސް ނެތެވެ. އޭގެ ފަހުން ކޮންމެ ދުވަހަކުވެސް އިންތިޒާރު ކުރެވެމުން ދިޔައީ އެފޯނު ކޯލަށެވެ.
އޭގެ ހަފްތާއެއް ފަހެވެ. އާދައިގެ މަތިން އަހަރެން ގޭތެރޭގައި އުޅެނިކޮށް މީހަކު އައިސް އޮފީސް ކައިރި ފޯނު ބޫތަށް ފޯނެއް އައިވާހަކަ ބުނެލުމުން އުފަލުން ދުވެފައި ބޫތާ ދިމާލަށް ދެވުނެވެ. ފޯނު ނަގާލަމުން ހަލޯއޭ ބުނެލީމެވެ. އެވަގުތު އަހަރެންގެ ހިތަށް ވެރިވެގެން ދިޔައީ ފުން އިހްސާސް ތަކެކެވެ. އެ ޖާދޫވީ އަޑުން އަހަރެންގެ ހިތް ފުރާލަ ދިނެވެ. އަދި ނާޒިމް އަހަންނަށް ލޯބި ހުށަހެޅިއެވެ. އަހަރެންގެ ހިތް އެކަމަކަށް ދެކޮޅުހަދާނެ ޖާގައެއް ނުދީ އެކަމަށް އާއެކޭ ބުނީމެވެ. އެކަކު އަނެކަކަށް ނުފެނި ލޯބި ވުމަކީ އެހާ ފަސޭހަކަމަށް ވެދާނެ ކަމަށް ހުދު އަހަރެންވެސް މީގެ ކުރިން ގަބޫލު ނުކުރަމެވެ.
ވަރަށް ގިނައިރު ދެމީހުން ވާހަކަ ދެއްކުމަށްފަހު ގެއަށް އައުމުން މަންމަ ވަރަށް ސުވާލުކުރިއެވެ. ގުޅީ ކާކުތޯ އާއި ކީއްކުރަންތޯ ވެސް އެހިއެވެ. ޖަވާބުގައި އަހަރެން ބުނެލީ ރައްޓެއްސެއް ކަމަށެވެ. އަހަރެންގެ ދެ އަންހެން ކޮއްކޮ ތިބެއެވެ. އެކުދިންނަށް ކިޔަވާދީ ސްކޫލަށް ގެންގޮސްދިނުމުގައި ގޭތެރޭގައި އެހީވަނީ އަހަރެންނެވެ. އާއިލާގައި އެންމެ ބޮޑަށް ހުންނަނީ ބޭބެއެވެ. ބޭބެ ވަޒީފާ އަދާކުރަނީ ރަށު ކޯޓުގެ ކާތިބަކަށެވެ. ބައްޕަ ވަޒީފާ އަދާ ކުރަނީ ރަށު އޮފީހުގެ ޕިޔޯނަކަށެވެ. މަންމައަކީވެސް ކުރިން ކުނާވިޔެ، ރޯނުވިޔެ ވަރަށް މަސައްކަތް ކުރި މީހެކެވެ. ނަމަވެސް ޕޯލިއޯ ޖެހި ފަރުވާ ނުކުރެވުމުގެ ސަބަބުން ހިނގާބިގާވެ އުޅުމަކީ މަންމައަށް ވަރަށް އުދަގޫ ކަމެކެވެ. އެހެންކަމާއެކު ވަޒީފާއަކަށް ނުގޮސް ގޭގައި މަންމައަށް އެހީވާން އަހަރެން ހުންނަނީ މަންމަ ކައިރީގައެވެ.
އެއްދުވަހެއްގެ މެންދުރުގެ ވަގުތެވެ. އާދައިގެ މަތިން ކައި ނިމިގެން ބަދިގެ ސާފުކޮށްލުމަށް ފަހު ގޭދޮރުމަތީގައި ހުރި ޖޯލިފަތީގައި ވައިޖައްސާލުމަށްޓަކައި އިށީއިދެލައިގެން އަހަރެން އިނީމެވެ. ގެއާއި ޖެހިގެން ހުންނަ ގޭގައި އުޅޭ ލަމްހާ އައިސް އަހަރެން ކައިރީގައި އެދުނީ އެނާއާއި އެކީ އަތިރިމައްޗަށް ދިއުމަށެވެ. ކޮންމެއަކަސް އަހަރެމެން ދެމީހުން ގޮސް އަތިރިމަތީގައި ހުންނަ ހޮޅުއަށީގައި ޖައްސާލައިގެން ތިއްބާ މީހަކު އައިސް އައްސަލާމް އަލައިކުމް ކިޔާފައި ގޮވާލިއަޑަށް އަހަރެން ދިޔައީ ސިއްސައިގެންނެވެ. ކަޅިޖަހާނުލާ އެމީހަކު އަހަރެންނާ ދިމާލަށް ބަލަން ހުއްޓެވެ. އިރުކޮޅެއް ފަހުން އެމީހަކު އަހާލީ "މިރަށުގައި އުޅޭ ސަހާ ދަންނަންތަ" މިހެންނެވެ. ވަގުތުން އަހަރެންގެ އަތްފައި ފިނިވިއެވެ. އަދި ޖަވާބުގައި އަހަރެން ބުނީމެވެ. "ތީ ނާޒިމްދޯ". އަހަރެންގެ އެ ޖުމްލައިން އޭނައަށް އިތުރު ހައިރާންކަމެއް ލިބި ބަސްހުއްޓުނެވެ. "އަހަރެން މީ ސަހާ، ކީއްވެ އަންގާވެސް ނުލާ ތިއައީ"... ނާޒިމް ލަދުރަކި ފާޑަކަށް ހީލުމަށް ފަހު ވާހަކަދައްކަން ފެށިއެވެ. އޭނަ އަހަރެންނާ ބައްދަލު ކުރަން ކެތްމަދުވެފައިވާތީ، ނައިސް މަޑުނުކުރެވިގެން އައީ ކަމަށް ބުނެލިއެވެ. އަދި އޭނާގެ މަންމަގެ ރައްޓެއްސެއް ހުންނަ ކަމަށާއި އެގޭގައި ހުރެވޭނެ ކަމަށް މަންމަ ބުނުމުން އައީ ކަމުގައި ބުނެލިއެވެ. އަހަރެމެން ދެމީހުންނަކީ ދެ ލޯބިވެރިން ކަމަށް ލަމްހާއަށް ކިޔާދިނުމަށްފަހު އެކަން ސިއްރު ކޮށްދިނުމަށް އެދުނީމެވެ.
އެރޭ އިޝާ ނަމާދުކޮށް، ކޮއްކޮމެންނަށް ކާން ތައްޔާރު ކުރުމަށްފަހު ރީތިވެލައިގެން އަހަރެން މިސްރާބު ޖެހީ ރަށުގެ ހުޅަގުފަރާތު އަތިރިމައްޗަށެވެ. އަތިރިމަތީގެ ހުދު ދޮންވެލިގަނޑު މަތީގައި އަހަރެންގެ އިންތިޒާރުގައި ނާޒިމް އިށީއިދެލައިގެން އިނެވެ. ހުދު ގަމީހެއްގައި ނާޒިމް އިންއިރު އޭނާގެ ރީތިކަން އިތުރަށް ފުރިހަމަ ވެގެން ދިޔައެވެ. ނާޒިމް އާއި ކައިރިވެލުމުން ދުވަންފެށި މީރުވަހުން އަހަރެންގެ ހިތުގެ އެންމެ ހިމަ ނާރުތަކަށް ވެސް އަސަރު ކުރުވިއެވެ. އެ ހިތްގައިމު ހަނދުވަރީ ރޭގައި ނާޒިމްގެ އުގުގައި ބޯއަޅާލައިގެން އޮވެ އަހަރެންގެ އިހްސާސްތައް ބަންޑުން ކޮށްލީމެވެ. ނާޒިމަކީ އަހަރެން ހިތް އެދެމުން ދިޔަ ސިފަތަކެއްގެ ވެރިއެއް ކަމަށާއި އަހަރެން ގޮވައިގެން އުޅެވޭވަރުގެ މީހެއްކަން ނާޒިމްގެ ވާހަކަތަކުން އަހަރެންނަށް ޔަޤީންވިއެވެ. ދުވަހަކުވެސް އަހަރެންގެ ހިތުގައި ނުޖައްސާނެކަމަށް އޭނާ ވައުދުވިއެވެ. އޭނާއަކީ މާލޭގެ މުއްސަދި އާއިލާއަކަށް އުފަން މީހެއް ކަމަށްވާއިރު، އަހަރެން ކަހަލަ ނިކަމެއްޗަކާ ގުޅެން ނާޒިމްގެ އާއިލާއިން ޤަބޫލު ނުވެދާނެތީ އެކަމާމެދު އަހަރެންގެ ހިތުގައި ސުވާލު އުފެދުނެވެ. އަދި ކޮންމެފަދަ ހާލެއްގައި ވެސް އަހަރެން ގޮވައިގެން އުޅޭނެ ކަމަށް ނާޒިމް ވައުދުވިއެވެ. އެރޭ ގެއަށް ދިޔައީ އަހަރެން ދެކެމުންދާ ހުވަފެނުގައި ކުލަ ޖެހުނުކަމުގެ ޔަޤީންކަން އޮވެގެންނެވެ.
ނާޒިމްއާއި އަހަރެންގެ ގުޅުމުގެ ވާހަކަ މަޑުމަޑުން ރަށުތެރޭގައި ދެކެވެން ފަށައިފިއެވެ. ބައްޕަ ވެސް އެކަމާމެދު އަހަރެންނާ ސުވާލު ކުރިއެވެ. އެއީ ތެދެއް ކަމުގައި ބުނެ، އަދި އޭނާ އަކީ އަހަރެން ގޮވައިގެން އުޅުވޭވަރުގެ މީހެއްކަން ޔަގީން ކޮށްދިނީމެވެ. ބައްޕަ އެކަމަށް އިންކާރުކޮށް އެކަން ހުއްޓާލުމަށް އަހަރެންނަށް އެންގިއެވެ. އެގުޅުމުގެ ވާހަކަ އިތުރަށް އަޑުއިވިއްޖެނަމަ ގެއިންވެސް ބޭރަށް ނިކުތުން މަނާކުރާނެ ކަމަށް ބުނެ އިންޒާރު ދިނެވެ. އެކަމާމެދު އަހަރެން ވަރަށް ބޮޑަށް މާޔޫސްވެ ގޮތް ހުސްވިއެވެ. އެކަމުގެ އެހީއަކަށް އެދި އާދޭސް ކުރުމަށް ހުރީ ލަމްހާ ކަމަށް ވިސްނުނެވެ. އަވަސް އަވަހަށް ގޮސް ލަމްހާ އަށް މިވާހަކަތައް ކިޔާދީ މިކަމުގައި އެހީވެވިދާނެތޯ އެހީމެވެ. ލަމްހާ މަސައްކަތް ކުރަނީ ޕޮލިސް ސްޓޭޝަންގެ އެޑްމިން ޑިޕާރޓްމެންޓްގައެވެ. ލަމްހާގެ ވާހަކައިން އެކަމަށް އެހީވެވިދާނެކަން އެނގުމުން އަހަރެންގެ ހިތަށް ކުޑަފިނިކަމެއް ލިބިގެން ދިޔައެވެ. ނާޒިމް ފުރައިގެން ދާން ޖެހުނީ އަހަރެންނާ ބައްދަލު ނުވެވިއެވެ. ލަމްހާ އަތަށް ދީފައި ނާޒިމްއާއި ހަވާލުކުރުމަށް ސިޓީއެއް ދިނީމެވެ. އެސިޓީގައި ބައްޕަމެން ނުގަބޫލުކަމާއި އަހަރެން ނާޒިމްއާއި ބައްދަލު ކުރުމަށް މަނާކުރި ވާހަކަ ވެސް ލިޔުނީމެވެ. އަދި ނާޒިމްދެކެ ވާ ލޯތްބަކަށް ނިމުމެއް ނާންނާނެ ކަމަށާއި، ކޮންމެފަދަ ހާލެއްގައި ވެސް ނާޒިމްއާއި ގުޅެން ތައްޔާރަށް ހުރި ކަމުގައި ބުނީމެވެ.
އޭގެ ފަހުން އަހަރެން ގެއިން ނިކުތުން މަނާ ކުރިއެވެ. ފޯނުބޫތު ކައިރިއަށް ގޮސްފިނަމަ ގެއިންވެސް ނެރޭނެ ކަމުގައި ބައްޕަ ބުންޏެވެ. ސްކޫލް ދޮށަށް ކޮއްކޮމެން ގޮވައިގެން ދިއުންވެސް މަނާކުރިއެވެ. ގޭގައި ފާޑަކަށް ބަންދުވެވުނެވެ. މިގޮތުގައި މަހެއްހާ ދުވަސް ހޭދަވެގެން ދިޔައެވެ. އަހަރެންގެ ހިތް ކުދިކުދިވެގެން ގޮސް ހަލާކުވާ ވަރުވެއެވެ. ބައްޕަ ނަމާދަށް ދާ ވަގުތު ބަލާފައި ފޯން ބޫތަށްދާން ފެށީމެވެ. މާގިނަދުވަހެއް ނުވެ މިކަންވެސް ބައްޕައަށް ފަޅާއަރައިފިއެވެ. އަހަރެން ދުވަހަކުވެސް މަންމައާއި ބައްޕަ ހިތުގައި ޖެހޭފަދަ ކަމެއް ނުކުރަމެވެ. ނަމަވެސް ލޯބީގައި ދީވާނާ ވުމުން މައިންބަފައިންގެ އަޑުތަކަށް ދެވުނީ ބީރު ކަންފަތެކެވެ. މިއަދު އެމީހުންނަށްވުރެ އަމިއްލަ ނަފްސް އިސްކުރެވުނެވެ. މަންމަގެ ރުއިމާ އާދޭސް ތަކަށް ދެމުންގެންދިޔައީ ބީރު ކަންފަތެކެވެ. ކޮންމެފަދަ ހާލެއްގައި ނަމަވެސް ނާޒިމް އާއި ކައިވެނި ކުރަން ބޭނުންވާ ވާހަކަ ބައްޕަ ކުރިމަތީގައި ބުނަމުން ގެންދިޔައީމެވެ. އަހަރެންގެ ސަބަބުން މަންމައާއި ބައްޕަ ދެމެދުގައި މައްސަލަތައް ޖެހެމުން ދިޔައެވެ. އެކަމަކަށް އެއްވެސް ފަރުވާލެއް ނުބަހައްޓަމެވެ. އަހަރެން ބޭނުންވީ ލޯބި ހާސިލު ކުރުމަށް ކުރެވެން ހުރި ހުރިހާ މަސައްކަތެއް ކުރާށެވެ. މަންމައާއި ބައްޕައަށް ވާނެ ގޮތަކަށް ނުވިސްނާ އަހަރެން މަސައްކަތް ކުރަމުން ދިޔައީ އަހަރެންގެ ލޯބި ހާސިލް ކުރާށެވެ. ލަމްހާގެ އެހީގައި ސިޓީގެ ޒަރީއާއިން ނާޒިމް އާއި ވާހަކަ ދައްކަމުން ދިޔައީމެވެ. ލަމްހާއަކީ އަބަދުވެސް އަހަރެމެންގެ ގެއަށްއައިސް އުޅޭ މީހަކަށް ވާތީ، މަންމަ އާއި ބައްޕަ ޝައްކު ކުރާނެ ޖާގައެއް ނޯންނާނެތާއެވެ.
ނާޒިމް އާއި ބައްދަލު ކުރެވޭނެ ދުވަހަކަށް އެދި އިންތިޒާރު ކުރަމުންދާތާ 6 މަސް ދުވަސް ފާއިތުވެގެން ހިގައްޖެއެވެ. އިންތިޒާރުކޮށްކޮށް ވަރުބަލިވެއްޖެއެވެ. ކެތްތެރިކަން ކޮޅުން ލައިފިއެވެ. އަބަދާއި އަބަދު އިދެވެނީ ނާޒިމްގެ ޚިޔާލާ ފިކުރުގައެވެ. ރަނގަޅަށް ނުކެވެއެވެ. މަންމަމެންނާ އަހަރެން ވާހަކަވެސް ނުދައްކަމެވެ. ނާޒިމްއާއި ބައްދަލު ނުކުރެވޭތީ އެކަމާ ހިތާމަ ކޮށްކޮށް އަހަރެން ވަރުބަލިވެއްޖެއެވެ. އަބަދުވެސް އިންނަންޖެހެނީ ގޭގައެވެ. ގެއިން ނުކުމެއްޖެނަމަ ދެން އަހަރެންނަށް އަންނާނީ ކޮން އިންޒާރެއް ކަމެއްވެސް ނޭނގެވެ. އަދިވެސް ނާޒިމް ހުރީ އަހަރެންނާއި ކައިވެނި ކުރަން ތައްޔާރަށް ކަމުގައި ބުނެއެވެ. މަންމައާއި ބައްޕަގެ ނުގަބޫލުގައި ނަމަވެސް އަހަރެން ބޭނުންވަނީ އަހަރެންގެ ލޯބި ހާސިލް ކުރާށެވެ. ކުޑައިރުއްސުރެ ދެކެމުންއައި ފޮނި ހުވަފެން ހަގީގަތަކަށް ހަދާށެވެ. ބޭނުންވަނީ މުއްސަދިކަމާއި އަރާމާއި އުފަލުގައި ދިރިއުޅޭށެވެ.
އާދައިގެ މަތިން އަހަރެން ކޮޓަރީގައި އިންދާ ލަމްހާ އައިސް އަހަރެން ގައިގާ ބައްދާލިއެވެ. ތިވަރަށް ތިކަމާ ނުވިސްނާ އުފާކުރާށޭ ބުނެލިއެވެ. އަހަރެންނަށް ލިބުނީ ކުއްލި ހައިރާން ކަމެކެވެ. ވާންވީ ގޮތަކާ ކުރަންވީ ކަމެއް ނޭނގިފައި ހުރެވުނެވެ. ލަމްހާ އަހަރެންގެ އަތަށް ސިޓީއެއް ދިއްކޮއްލިއެވެ. އަދި ފުރަން ތައްޔާރުވުމަށް ބުންޏެވެ. އަވަސް އަވަހަށް ސިޓީ ކިޔާލީމެވެ. ސިޓީގައި އޮތީ ނާޒިމް އަހަރެން ބަލާ އަންނާނެ ވާހަކައާއި ފުރަން ތައްޔާރުވާންވީ ވާހަކައެވެ. އަހަރެންގެ ހިތަށް ވެރިވެގެންދިޔަ އުފާވެރި ކަން ބުނެދޭން ނޭނގެއެވެ.
ނުނިމޭ....
