"ރާއްޖެތެރޭ މީހުން ވިއްޔާ އައިސް މިއުޅެނީ މިތަނުގައި ގަދަވެގަނެގެން.. އަހަރެންނަށް ކައްކާފައި ކާންދީ ކަންކަމެއް ނުކޮށްދެވޭނެ.. ރަށަށް ގޮސް އަމިއްލަ މަންމައަށް ދަރިން ބަލަން ޖެއްސިއްޔާ މާރަގަނޅެއްނު... މިބަސްތައް އަހަރެންގެ ކަންފަތަށް އަޑު އިވިގެން ދިޔައީ ހޮނު ގުގުރިއެއް ފަދައިންނެވެ. މިބަސްތަކަކީ ނާޒިމްގެ މަންމަ އަހަރެންގެ ދަރިފުޅާއި ދިމާލަށް ބުނަމުންދިޔަ ބަސްތަކެކެވެ. އަހަރެން ގޮސް ގެއަށް ވަނުމާއެކު، ދަރިފުޅު މަންމީއޭ ކިޔާފައި ރޯން ފެށިއެވެ. އަދި ބުނެލިއެވެ. "މާމި ކޮއްކޮ ދެކެ ރުޅިއައީ އަދި ކޮއްކޮގެ ރަށަށް ދާށޭ ބުނީ، އާރާ ކޮއްކޮ އަށް އައިސްކްރީމް ގަނެދިނީ ކޮއްކޮއަށް ނުގަނެދިން".... އަހަރެންގެ ހިތަށް ހީވީ ހަންޖަރެއް ހެރުނުހެންނެވެ. ކުޑަ ކުއްޖަކަށް އެފަދަ ކަމެއް ކުރަން ކެރޭނީ ހާދަ އިންސާނިއްޔަތުކަން ކުޑަވީމަތާއެވެ. ކޮންމެއަކަސް ނާޒިމް ގެއަށް އައުމުން އަހަރެން ނާޒިމް ގާތުގައި މިވާހަކަ ދެއްކީމެވެ. ނާޒިމް އެކަމާ މެދު މާބޮޑުއެއްޗެއް ނުބުނެއެވެ. ނާޒިމް ގޮސް މަންމައާއި އެވާހަކަ ހިއްސާކުރިއެވެ. އަދި އެއީ ދޮގެއް ކަމުގައި ނާޒިމްގެ މަންމަ ބުންޏެވެ. އަހަރެން ނާޒިމްއާއި ނާޒިމްގެ އާއިލާއާއި މެދު މައްސަލަ ޖައްސަން ދައްކާ ވާހަކައެއް ކަމުގައިވެސް ބުންޏެވެ.

އަހަރެން އޮފީހުން ޗުއްޓީ ނަގައިގެން ދުވަސްކޮޅަކު ގޭގައި މަޑުކޮށްލީމެވެ. ދަރިފުޅުގެ ކަންކަން  ރަނގަޅަށް ނުބެލެހެއްޓޭތީއެވެ. އަދި ނާޒިމްގެ މަންމަގެ ނުރުހުމުގެ ބަސްތައް އަޑުއަހަން އަހަރެންގެ ހިތަށް ކުޅަދާނަ ކަމަކަށް ނުވާތީއެވެ. ގިނަ ދުވަސްވީ ވަރަކަށް ނާޒިމް މަންމަގެ ނޭދެވޭ މަންޒަރުތައް ފެންނަލެއް ގިނަވާން ފަށައިފިއެވެ. ފޯނެއް އަޔަސް އަހަރެންނަށް ޝައްކު ކުރުމާއި އަހަރެން އެހެން ފިރިހެނުންނާއި ވާހަކަ ދައްކާ ކަމުގެ ދޮގު ތުހުމަތު އަހަރެންގެ ބޮލުގައި އަޅުވަން ފަށައިފިއެވެ. ނާޒިމް ގެއަށް އައިސް ވަންނައިރަށް އަހަރެންގެ ގޯސް ވާހަކަ ދެއްކުން އިތުރުވާން ފަށައިފިއެވެ. އެހުރިހާ ކަމަކަށް އަހަރެން ދިޔައީ ކެތް ކުރަމުންނެވެ. މިއަދާ ހަމައަށްވެސް އަހަރެންދިޔައީ ހަޔާތުގައި ދިމާވި އެތައް ކަމަކާ ކެތް ކުރަމުންނެވެ. މިއަދު އަހަރެންނަކީ މަންމައާއި ބައްޕަގެ ލޯބިން މަހްރޫމް ވެފައިވާ މީހެއްކަން އިހްސާސް ކުރެވެން ފަށައިފިއެވެ. އަހަރެންގެ މާގިނަ ރައްޓެހިންނެއް ވެސް ނުތިބެއެވެ.

މިއަދަކީ އަހަރެން ރަށުން ފުރައިގެން އައި ފަހުން 10 އަހަރު ފުރުނު ދުވަހެވެ. އަހަރެންގެ ހަޔާތުގެ 10 އަހަރު ހޭދަވެގެން ދިޔައީ އުފަން ރަށަށްވެސް ނުގޮހެވެ. ރަށުން އައި ފަހުން އަހަރެންގެ ރައްޓެއްސަކަށް ވެސް އަދި އާއިލާގެ މީހަކަށްވެސް ހުރީ ލަމްހާއެވެ. މަންމަމެން ދެކިލަން ދާން ކިތައްމެހާވެސް ބޭނުމެވެ. އަހަރެންގެ ބައްޕަ އަދިވެސް އަހަރެންނާއި ވާހަކައެއް ނުދައްކައެވެ. އެކަމުގައި އަހަރެން ބައްޕަ ކުށްވެރިއެއް ނުކުރަމެވެ. ކުށްވެރިއަކީ އަހަރެންނެވެ. އަހަރެން ބޭނުންވި ދިރިއުޅުން އިޚްތިޔާރު ކުރީ އަހަރެންނެވެ.

Advertisement

އަނެއްކާވެސް އަހަރެން ބަނޑުބޮޑުކަން އަހަރެންނަށް އެގުނެވެ. މިހާރު ގޭގައި ގެންގުޅޭ މީހެއްވެސް ހުރެއެވެ. އެހެން ކަމާއެކު އަހަރެންގެ ކަންކަމުގައި ވެސް އެހީތެރިވެދީ ހަދަނީ ބޭރުމީހާއެވެ. މިދުވަސްކޮޅު ނާޒިމް ރޭގަނޑު ގެއަށް އަންނަނީ ވަރަށް ލަހުންނެވެ. އަމިއްލަ ކުންފުންޏެއް ހުޅުވިފަހުން ނާޒިމް ކުރިއަށް ވުރެ ބިޒީއެވެ. ދަރިފުޅު ސްކޫލަށް ގެންގޮސްދީ ހަދަނީވެސް ގޭގައި ގެންގުޅޭ މީހާއެވެ. އަހަރެން ބަނޑުބޮޑު ވީންސުރެ އެހާމެ ބައްޔެވެ. ނާޒިމްގެ މަންމަގެ ނުރުހުމާއި ނަފްރަތުގެ ބަސްތައް އަޑު އިވޭލެއްވެސް މަދެއް ނޫނެވެ. ނާޒިމް ގެއަށް އައިސް ވަންނައިރަށް އަހަރެންގެ ގޯސް ވާހަކަ ދައްކާތީ ނާޒިމްގެ ހިތުގައި އަހަރެންނަށް އޮތް ލޯތްބަށް ކިލަބުކަން އަންނަން ފަށައިފިއެވެ.

އަހަރެން ވިހަން ކައިރިވާތީ ބޭބީ އަށް އެއްޗެހި ގަނެލަން ބޭރަށް ނިކުތީމެވެ. ނާޒިމް އަށް މެސެޖެއް ކޮށްލާފައި ބޭރަށްދާ ވާހަކަ ވެސް ބުނެލީމެވެ. އަހަރެން ބޭރުގައި ހުއްޓާ ނާޒިމްގެ މަންމަ އަހަރެންނަށް ގުޅިއެވެ. ގުޅާފައި ނާޒިމް އަހަރެން ހޯދާ ވާހަކަ ބުންޏެވެ. އަދި އަހަރެން ވަގުތުން ނާޒިމްގެ ފޯނަށް ގުޅީމެވެ. ނާޒިމް ފޯނެއް ނުނަގައެވެ. އަހަރެން ފިހާރައެއްގައި ހުއްޓާ ރަށު މީހަކާ ދިމާވެގެން ފިހާރަ ކައިރީގައި އޭނައާއި ވާހަކަ ދައްކާލަން އަހަރެން މަޑުކޮށްލީމެވެ. ކުއްލިއަކަށް އެތަނަށް އައިސް ހުއްޓުނީ ނާޒިމްގެ ކޮއްކޮއެވެ. "ފަހަރި މިތާ ކީއްކުރަނީ މިހާ ލަސް ގަޑިއެއްގަ" މިހެން ބުނެފައި އޭނަ ސައިކަލުގައި ނައްޓާލައިފިއެވެ. އަހަރެންވެސް ވަރުބަލި ވެފައި ހުރުމުން ޓެކްސީއަކަށް އަރައިގެން ގެއަށް ދިޔައީމެވެ. ގެއަށް ގޮސް ދޮރު ހުޅުވާލުމާއެކު ވަރަށް ރުޅިއައިސްފައި ހުރެ ނާޒިމް އަހަރެންގެ އިސްތަށިގަނޑުގައި ހިފާ ކޮއްޕާލިއެވެ. "ކަލޭ ހިލޭ ފިރިހެނަކާ އެކީ ބޭރުގައި އުޅެފައި މިގެއަށް އައިސް ވަންނާނެ ކަމެއް ނެތް، ނުވިތާކަށް ފޯނުވެސް ނިއްވާލާފަ.." މިހެން ބުނަމުން ނާޒިމް އަނެއްކާވެސް އަހަރެންގެ މޫނުމަތީގައ ވަރަށް ބާރަށް ޖެހިއެވެ. އަހަރެންނަށް ވީތަދުން ގިސްލަ ގިސްލާފައި ރޯން ފެށުނެވެ. އަހަރެންގެ ފޯނު ނިވިފައި އޮތް ކަމެއްވެސް އަހަރެންނަކަށް ނޭނގެއެވެ. އަދި އަހަރެން ދިޔައީ ބޭބީ އަށް ބޭނުންވާ ބައެއް އެއްޗެހި ގަނެލަން ކަމުގައިވެސް ބުނީމެވެ. ނާޒިމްގެ ކޮއްކޮވެސް އަހަރެންނާ ގުޅޭގޮތުން ހަގީގަތާއިޚިލާފު އެތައް ވާހަކަތަކެއް ދެއްކިއެވެ. އަހަރެންގެ ލޮލުން ފައިބަމުން ދިޔަ ކަރުނަތައް ފޮހެދޭނެ މީހަކު މިއަދު މިތާކު ނެތްކަން އެނގުނެވެ. އަހަރެން އެރޭ ނުނިދަމެވެ. ވީތަދުންނާ ވީހިތްދަތްޗަކުންނެވެ.

ޖެހިގެން އައި ދުވަހު ހޭލައިގެން ނާޒިމް ދިޔައީ ބޭރަށެވެ. އަދި އަހަރެންނަށް އެންގީ ވަޒީފާއިން ވަކިވުމަށް ސިޓީ ލުމަށެވެ. ގެއިން ބޭރަށް ނުކުތުންވެސް މަނާ ކުރިއެވެ. މީ އަހަރެންވީ ގުރުބާނީގެ އަގުހެއްޔެވެ. އަހަރެން މިއިނީ ވިހަން ކައިރިވެފައެވެ. އަހަރެންގެ އާއިލާއެއް އަދި ރައްޓެއްސަކުވެސް ނެތެވެ. މިހުރިހާ ކަމެއް ހިތަށް އަރާފައި އަހަރެންނަށް ކެތްކުރަން ދަތިވެއްޖެއެވެ. ފޯނު ނަގާފައި ލަމްހާއަށް ގުޅާފައި ހިތް ފުރެންދެން ރޯލީމެވެ. އަދި އަހަރެންނަށް މިހާލުގައި މިތާ ކެތް ނުވާނެ ކަމުގައިވެސް ބުނީމެވެ.

އަހަރެންނަށް މިފަހަރު ލިބުނީ ފިރިހެން ކުއްޖެކެވެ. ދަރިފުޅު ލިބުމުންވެސް ނާޒިމްގެ ފަރާތުން މާބޮޑު އެހީތެރިކަމެއް ނުލިބެއެވެ. އަހަރެންގެ ހާލާއި މެދު ހަމްދަރުދީވެ އެހީގެ އަތެއް ދިއްކޮށްލަން ވެސް ހުރީ ގޭގައި ގެންގުޅޭ މީހާއެވެ. އަހަރެންނަށް މާރަނގަޅަށް ކަންތައްތައް ކޮށްދޭތީ ނާޒިމްގެ މަންމަ އެމީހާ އާއި ދިމާލަށްވެސް އެއްޗެހި ކިޔައެވެ. ދެދަރިން ގޮވައިގެން ވަރަށް ހާލުގައި ދުވަސް ތައް ހޭދަކުރަމުން ދިޔައީމެވެ. ވަޒީފާއިން ކެނޑުނު ފަހުންވެސް އެއް އަހަރުވެއްޖެއެވެ. ގެއިން ބޭރަށް ނިކުމެލެވެނީ ހަމައެކަނި ދަރިފުޅު ގޮވައިގެން ސްކޫލްދޮށަށް ދާށެވެ. ނާޒިމް ގެއަށް ވަދެލަނީ ހަމައެކަނި ނިދާލާށެވެ. ބައްޕަ ނުފެންނާތީ ކުދިންވެސް ވަރަށް ޝަކުވާ ކުރެއެވެ.

އެއްރެއެއްގެ އިރާކޮޅެވެ. އަހަރެން ކޮޓަރިން ނުކުތްއިރު ބެލްކަނީގައި ނާޒިމް ހުއްޓެވެ. އަދި ނާޒިމް ކައިރީގައި އިތުރު އަންހެނަކު ހުއްޓެވެ. އަހަރެން ފެނުމުން ހީލާފައި އަހަރެންނާއި ސަލާމް ކޮށްލިއެވެ. "އަހަރެން މީ ނާޒިމްގެ ވާން އުޅޭ ހަނގު އަނބި" އެމީހަކު އަހަރެންނާ ދިމާލަށް އެހެން ބުނެލަމުން ތައާރަފް ވެލިއެވެ. އަހަރެންނަށް ހީވީ ފައިދަށުން ބިންގަޑު ދަމައިގަތްހެންނެވެ. ނާޒިމް ދެއަންބަށް އިންނަން އުޅޭ ވާހަކަ އަހަރެންގެ ކުރިމަތީގައި ބުނެލިއެވެ. އަދި އެކަމާ ގަބޫލުވެވެން ނެތް ނަމަ ފުރައިގެން ރަށަށް ދިއުމަށްވެސް އެދުނެވެ. ނާޒިމްގެ މަންމަގެ މޫނުމައްޗަށް ވެރިވެފައިވާ ހިނިތުންވުމުން ފޮރުވިފައިވާ އެތައް މާނައެއް ދޭހަވެގެން ދިޔައެވެ. ދެރަވެ ރޮއި އާދޭސް ކުރިއަސް މިއަދު އެއަޑު އަހާނެ އެކަކުވެސް މި ހަތަރުފާރުން އެތެރޭގައި ނެތް ކަން އަހަރެންނަށް އެނގުނެވެ.

ނާޒިމާއި އެއަންހެންމީހާގެ ކައިވެނި ކުރެވި އެއަންހެން މީހާވެސް ގެއަށް ގެނައެވެ. އަހަރެންގެ ކުރިމަތީގައި އެދެމީހުން އުޅެމުންގެންދާ ރޮމޭންޓިކް މަންޒަރުތަކުން އަހަރެންގެ ހިތް ފުޑު ފުޑުވެގެން ދެއެވެ. ގޭތެރޭގައި އަހަރެން ހުންނަނީ ބާކީ ކޮށްލާފައެވެ. ނާޒިމްގެ ހަނގު އަނބި ހުންނަނީ ވަކިން ކޮޓަރިއެއްގައެވެ. ނާޒިމް އެމީހާއާއި ކައިވެނި ކުރިފަހުން އަހަރެންގެ ކޮޓަރިއަކަށް ނުވަދެއެވެ. ކުދިންގެ ކަންކަމުގައިވެސް މާބޮޑު އަޅާލުމެއް ނުބަހައްޓައެވެ. އަހަރެން ވިސްނާވިސްނާ ބޯގޮވައިފިއެވެ. އެހެނަސް ކެތް ކުރީމެވެ. މިއަދު އަހަރެންނަކީ އަޅާލާނެ ޔާރެއް ހުރި މީހެއްވެސް ނޫންތާއެވެ. ނާޒިމްގެ ހަނގުއަނބަށް ވެސް ކުއްޖަކު ލިބުނެވެ. އެދަރިފުޅު ލިބުމުން ގޭތެރެއަށް ވެރިވެފައި އޮތީ އުފާވެރިކަމެވެ. ނާޒިމްގެ ހަނގުއަނބީގެ ހުރިހާ ކަމެއް ކުރުމަށް ހަވާލުކޮށްފައި އޮންނަނީ ގޭގައި ގެންގުޅޭ ބޭރުމީހާއަށެވެ. އަދި އޭނަވިހޭ ފަހުން އަހަރެންގެ ކަމެއްގައި އެހީވާން ހުއްޓަސް ގެންގޮސް އޭނަގެ ކޮންމެވެސް ކަމެއް ހަވާލު ކުރެއެވެ.

މިހާރު ނާޒިމް އަހަރެންނަށް ޚަރަދެއް ނުކުރެއެވެ. އަހަރެން ވަޒީފާއަށް ނުދާތީ އަހަރެންގެ އަތުގައި ފައިސާ ނެތުމުން އެކަމާ ވަރަށް ދަތިވެއެވެ. އެއްދުވަހަކު އަހަރެން ވަރަށް ބޮޑަށް ހުން އައިސްގެން ޑޮކްޓަރަށް ދައްކަން ދާން ނާޒިމް ކައިރި ލާރިކޮޅެއް ދޭށޭ ބުނުމުން ދެވެން ނެތް ވާހަކަ ބުންޏެވެ. ވީދެރައިން ގޮސް ކޮޓަރިއަށް ވަދެ އެދުގައި އޮށޯވެ އޮވެ ރޮވެން ފެށުނެވެ. ދެދުވަސް ވީއިރުވެސް އަހަރެންގެ ހުން ރަނގަޅު ނުވުމުން އަނެއްކާވެސް ނާޒިމް ކައިރީ ޑޮކްޓަރަށް ދާން އެދުނީމެވެ. "ކަލޭ އަމިއްލައަށް ލާރި ހޯދައިގެން އަމިއްލަ ކަންކަމަށް ޚަރަދު ކުރޭ" މިހެން ބުނެފައި އޭނަގެ ހަނގުއަނބި ގޮވައިގެން ބޭރަށް ނުކުތެވެ. އަހަރެންގެ ދަރިފުޅު އައިސް އަހަރެންގެ ބޮލުގައި ފިރުމާލަފައި ބުންޏެވެ. "މަންމާ ނުރޮއި ކޮއްކޮ ބޮޑުވެގެން މަންމަ ބަލި ވީމަ ޑޮކްޓަރަށް ދައްކަން ލާރި ދޭނަން". އެބަސްތަކުން އަހަރެން ހިތަށް ފުން އަސަރުތަކެއް ކުރުވިއެވެ. އަހަރެންނަށް ހޮޑުލެވި ބޯއަނބުރަން ފެށިއެވެ. އެންމެ ފަހުން ގޭގައި ގެންގުޅޭ މީހާއަށް ކެތް ނުކުރެވިގެން ޓެކްސީ އަކަށް އަރުވައިގެން އަހަރެން ގޮވައިގެން ހޮސްޕޓަލަށް ދިޔައެވެ. ހޮސްޕިޓަލުގައި އެޑްމިޓް ކުރިއެވެ. އަހަރެންގެ ހާލު ބަލާލަންވެސް ނާޒިމް ނާދެއެވެ. ޑޮކްޓަރުގެ ރިޕޯރޓްތަކުން އަހަރެންނަށް ޑެންގީ ޖެހިފައިވާ ކަން އެނގުނެވެ. ގޭގައި ގެންގުޅޭ މީހާ ވަރަށް ރަނގަޅެވެ. ހޮސްޕިޓަލުގެ ހުރިހާ ކަމެއް ނިމެންދެން އޭނަ އަހަރެން ކައިރީގައި މަޑުކުރިއެވެ. ހޮސްޕިޓަލް ބިލްތައް ދައްކަންވެގެން ނާޒިމަށް ގުޅުމުންވެސް ނައެވެ. އަހަރެން ހަދާނެ ގޮތް ހުސްވިއެވެ. އެތަނުގައި އޮއްވާ އަހަރެންނާ އެކު މަސައްކަތް ކުރި ނަރުހެއް އައުމުން ވެގެން އުޅޭގޮތް ކިޔާދިނީމެވެ. އޭނަ ހޮސްޕިޓަލުގެ ބިލުތައް ދައްކައިދިނެވެ. އަދި އެއްވެސް އެހީއެއް ބޭނުންނަމަ ކޮންމެ ގަޑިއަކުވެސް އޭނައަށް ގުޅާލަދޭށޭ ބުނެލިއެވެ. ހޮސްޕިޓަލުން ދޫކޮށްލުމުން އަހަރެން ގެއަށް ދިޔައީމެވެ. އަހަރެންގެ ކުދިން ފެނުމުން އެކުދިން އައިސް އަހަރެންގެ ގައިގާ ބައްދާލާފައި މަންމަ ރަނގަޅުހޭ އަހާލިއެވެ.

އަހަރެން ކޮޓަރީގައި އިންދާ ނާޒިމް އައިސް ވަނެވެ. އަހަރެން މީހަކާ ރައްޓެހިވެގެން އުޅޭ ކަމުގެ ތުހުމަތު ކުރިއެވެ. ހޮސްޕިޓަލުގެ ޑޮކްޓަރަކާއި އަހަރެން ރައްޓެހިވެގެން އުޅޭ ކަމުގައި ބުނެ އަހަރެންނާ ދިމާލަށް ވަރަށް ހަޑި އެއްޗެހި ކިއެވެ. އެއީ އެއްވެސް އިރެއްގައި އަހަރެން ނުކުރާނެ ކަމެއް ކަމުގައި ބުނީމެވެ. ކޮންމެފަދަ ހާލެއްގައިވެސް އިއްފަތްތެރި އަންބެއްގެ ގޮތުގައި ހުންނާނެ ކަމުގައި ބުނީމެވެ. "އަހަރެން ކުރިމަތީގައި ކަލޭ މާ މާތް މީހަކަށް ވާން ނޫޅޭ. ހަމަ މިހާރު މިގެއިން ނުކުމޭ.. ތިހުރީ ވަރިކޮށްފައި". ނާޒިމް ބުނެލިއެވެ.

ނުނިމޭ..