އަވަށްޓެރި އިންޑިއާ އަކީ ގިނަ އަދަދެއްގެ ދިވެހިން ބޭސްފަރުވާ ކުރުމަށް ޒަމާނުއްސުރެ ދާ ގައުމެކެވެ. މިގޮތުން ރާއްޖެއިން ފަރުވާ ނުކުރެވޭ ބޮޑެތި ބަލިތަކަށް ފަރުވާހޯދުމަށް އިންޑިއާ އަށް ދާ ދިވެހިން އެ ގައުމުގައި ހޭދަކުރާ ދުވަސްތަކަކީ ބޭސްފަރުވާގެ ކަންތައްތަކުގައި ވަރަށް ބުރަކޮށް އުޅޭ ދުވަސްތަކެކެވެ.
އިންޑިއާގެ ބެންގަލޫރުގެ އެންޔޫ ހޮސްޕިޓަލަކީ ވެސް އާސަންދައިގެ ދަށުން ގިނަ އަދަދެއްގެ ދިވެހިން ފަރުވާ ހޯދުމަށް ދާ ހޮސްޕިޓަލެކެވެ. އެންޔޫ ހޮސްޕިޓަލުން ވަނީ ތަފާތު ބަލިތަކުގެ މީހުންނާ ދިމާވެފައެވެ. މީގެތެރޭގައި އެޑްމިޓްކޮށްގެން ފަރުވާ ހޯދާ މީހުންނާއި، އޮޕަރޭޝަނަށްފަހު ވަކި މުއްދަތެއްގެ ފަހުން ޑޮކްޓަރަށް ދައްކަންޖެހޭ މީހުން ހިމެނެއެވެ.
ބޭސްފަރުވާއަށް ދާ ގިނަ މީހުންނަކީ ކުދިކުދި ކޮޓަރިތަކުގައި ދުވަހު ކުއްޔަށް އުޅޭ މީހުންނެވެ. ބަލީގެ ވޭނާއިއެކު އެހެން ގައުމެއްގައި ހޭދަކުރަންޖެހޭ މުއްދަތުގައި އުޅެންޖެހޭ ދަތި ހާލުގެ ސަބަބުން ހިތްހަމަ ޖައްސާލެވޭނެ ގޮތެއް މިފަދަ ބަލިމީހުންނާއި އެހީތެރިންނަށް ގިނަ ފަހަރަށް ނޯވެއެވެ.
އަޅުގަނޑުގެ މި ރިޕޯޓުގައި މި ބަލާލަނީ ހިތްހަމަޖައްސާލުމަށް ޕާކުތަކަށް ދިއުމާއި ގުޅޭގޮތުންނެވެ. މިގޮތުން ބެންގަލޫރުގައި ހުންނަ 'ލާލްބާގް ބޮޓޭނިކަލް ގާރޑެން' ނުވަތަ ލާލްބާގް ޕާކަކީ ގުދުރަތީ ރީތިކަން ފުރިހަމައަށް ލިބިފައިވާ ވަރަށް ހިތްފަސޭހަ މާހައުލެކެވެ. ޕާކަށް ވަނުމަށް ބޭނުންވަނީ މީހަކަށް 30 ރުޕީސް އެވެ. އެއީ ދިވެހި ރުފިޔާއިންނަމަ 6 ރުފިޔާ އެވެ.
ޕާކަށް ވަދެގެންދިޔައިރު އެންމެ ފުރަތަމަވެސް ލޮލުގައި އަޅައިގަތީ ދެފަރާތުގައި ހައްދާފަހުރި ތަފާތު ރީތި މާ ބަގީޗާތަކެވެ. ނޫކުލައިން ފެށިގެން އެކި ކުލަކުލައިގެ ކޮކާތައް އުދުހެމުން ދިޔައިރު މިމަންޒަރު ބަލާލުމުން ހިތްހަމަޖެހުން ލިބުނެވެ.
ޕާކުގެ މަގުތަކުގައި ތަފާތު އެކި ވައްތަރުގެ މޭވާއާއި ޖޫސް ވިއްކަން ގާޑިއާތައް ބަހައްޓާފައި ހުއްޓެވެ. ކާން ބޭނުން ކޮންމެ ވައްތަރެއްގެ މޭވާއެއް އަގުހެޔޮކޮށް ލިބެން ހުއްޓެވެ. އަޅުގަނޑު ބެލީ ވަގުތުން ފިހެގެން ޒުވާރިއެއް ކާލެވޭތޯއެވެ. ފިހުނު ޒުވާރިއެއްގެ އަގަކީ ވެސް 6 ރުފިޔާ އެވެ. ރަހަ މީރެވެ.
ވަށައިގެން ފެންނަންހުރި ތަފާތު ގަސްތަކުގެ މަތިން އުދުހެމުން ދިޔައީ އެކި ވައްތަރުގެ ދޫންޏެވެ. މީގެތެރޭގައި ރާއްޖެއިން އާންމުކޮށް ނުފެންނަ ވައްތަރުގެ ބާޒު ފަދަ ދޫނިތައް ހިމެނެއެވެ. މުޅި މާހައުލުން އިވެމުންދިޔައީ ދޫނީގެ ހިތްގައިމު އަޑެވެ.
ޕާކުގެ މެދަކާ ހިސާބުން ދިމާވީ ފޮޓޯ ނެގުމަށްފަހު ވަގުތުން ފޮޓޯ ޕްރިންޓްކޮށް ހަވާލުކޮށްދޭ ހުނަރުވެރި ކެމެރާމަނުންނާއެވެ. އެމީހުންގެ ހުނަރުވެރިކަން ބަލާލުމަށް ފޮޓޯއެއް ނެގީމެވެ. ބުނާނެ ބަހެއް ނެތެވެ. އެހާމެ ފުރިހަމައެވެ.
ލާލްބާގް ޕާކަކީ ރޭވުންތެރިކަމާއެކު ބެންގަލޫރުގައި މިގޮތަށް ޒީނަތްތެރި ކުރެވުނު ފުރަތަމަ ޕާކެވެ. މި ޕާކުގެ ފައުންޑަރ އަކީ ހައިދަރު އަލީ އެވެ. އޭނާ އެންމެ ފުރަތަމަ މިމަސައްކަތް ފެށީ 1760 ވަނަ އަހަރުގަ އެވެ. ހައިދަރުގެ މަސައްކަތް ފުރިހަމަކޮށް ޕާކުގެ މަސައްކަތް ނިންމާފައިވަނީ އޭނާގެ ދަރިފުޅު ޓިޕޫ ސުލްތާން އެވެ. މި ބަގީޗާގައި 1854 ބާވަތުގެ ގަސް ހުންނަކަމުގައިވެއެވެ. ބަގީޗާގައި ހުރި މަޝްހޫރު ތަންތަނަށް ބަލާއިރު ބިއްލޫރި ގެއެއްގެ އިތުރަށް، ފެންގަނޑު ފަދަ ތަންތަން ހިމެނެއެވެ.
ދުނިޔޭގެ އެކި ގައުމުތަކުން ތަފާތު ރީތި ގަސް ގެނެސްގެން ހައްދާފައިވާ މި ބަގީޗާ އަކީ ހިތްހަމަ ޖައްސާލުމަށް ދިއުމަށް ވަރަށް ރަނގަޅު ތަނެއްގެ ގޮތުގައި ދެކެމެވެ. ބަލީގެ ވޭނާއި އުދަގުލުގައި ދިރިއުޅޭއިރު ހިތްހަމަޖެހުން އެއީ ވަރަށް މުހިންމު ކަމެކެވެ. ބައެއް އާއިލާ ތަކަކީ އަހަރު ދުވަހަށްވެސް މަޑުކޮށްގެން ފަރުވާ ހޯދާ އާއިލާ ތަކަކަށްވާއިރު ކުޑަ ޚަރަދެއްގައި މިފަދަ އުފާވެރި މާހައުލަކަށް ޒިޔާރަތްކޮށްލުމުން އެލިބޭ ހިތްހަމަޖެހުން އިހުސާސްކޮށްލެވޭނީ މިފަދަ ތަނަކަށް ޒިޔާރަތް ކޮށްލުމުންނެވެ.
