މިއަދުގެ ހުކުރު ޚުތުބާގައި ބަޔާންކޮށްފައިވެއެވެ. މުސްލިމް އަޚުންނޭވެ. މާތް ﷲ ދިވެހިރާއްޖެ އަށް އިސްލާމީ ނޫރުގެ އަލިކަން މިންވަރު ކުރެއްވުމުގެ މަތިވެރި ނިޢުމަތަށް ޝުކުރުވެރިވުމަކީ އެންމެންގެ ވާޖިބެއްކަން ހަނދާން ކުރާށެވެ. އެ ނިޢުމަތަށް ޝުކުރުވެރިވުމަކީ މި ލޮބުވެތި ވަޠަނުގައި އެދީނުގެ ޝިޢާރުތައް ފާޅުކޮށް ދަމަހައްޓަން މަސައްކަތް ކުރުމެވެ.
" މި ގައުމަކީ ސައްތައިން ސައްތަ އިސްލާމީ ޤައުމަކަށް ވާތީ އެކަމާ ދެކޮޅުހަދާ ބަޔަކު އެބައުޅޭ. ސައްތައިން ސައްތަ ސުންނީ ޤައުމަކަށް ވާތީ އެކަމާވެސް ހަސަދަވެރިވާ ބަޔަކު އުޅޭ. ދިވެހިރާއްޖެ އިސްލާމްވުމާއެކު، ރާއްޖެ އިސްލާމްދީނުން ބޭރަށް ނެރެވޭތޯ އެކި ދުވަސްވަރު، ތަފާތު އެތައް މަސައްކަތްތަކެއް ކޮށްފައިވާކަން ތާރީޚު ހެކިދޭ. އެންމެ ފާޅުކަން ބޮޑު ގޮތެއްގައި މިކަން ކޮށްފައިވަނީ ޕޯޗުގީޒު އިސްތިޢުމާރުގެ ޒަމާނުގައި." ހުކުރު ޚުތުބާގައި ފާހަގަކޮށްފައިވެއެވެ.
އިސްތިޢުމާރު ގައުމުތަކުން އެކި ގައުމުތަކަށް އަރައި، އެ ގައުމުތަކުގެ މީހުން އެމީހުންގެ ދީނުން ބޭރުކުރަމުން އައިސް، ދިވެހިރާއްޖެ ވެސް ގަދަކަމުން އެމީހުންގެ ދީނަށް ވެއްދޭތޯ ވަނީ ގިނަގުނަ މަސައްކަތް ކޮށްފައިކަމަށާއި، މި މަސައްކަތް ނާކާމިޔާބުވެ ރާއްޖެ އިސްލާމް ދީންމަތީ ދެމިއޮތީ، މާތް ﷲ ގެ ފަޟްލުވަންތަކަމަށްފަހު، ބޮޑުތަކުރުފާނުގެ އަގުހުރި ޖިހާދުގެ ސަބަބުން ކަމަށް ޚުތުބާގައި ވަނީ ބުނެފައެވެ.
މިހާރަކަށް އައިސް ސައްތައިން ސައްތަ މުސްލިމް ގައުމުގެ ބައެއް މީހުންގެ ފުށުން، އިސްލާމްދީނާ ދެކޮޅު ޢަމަލުތައް ފެންނަކަމަށާއި، މިގޮތުން މީހުން މެރުމާއި، މީހުންގެ މުދަލަށް ގެއްލުން ދިނުމާއި، އަނިޔާވެރި ޢަމަލުތައް ހިންގުމަށް ގޮވާލުމުގެ އިތުރުން ދީނާމެދު ނަފުރަތު އުފެއްދުމުގެ އަމަލުތައް ހިންގުން ހިމެނޭކަމަށް ވަނީ ފާހަގަކޮށްފައެވެ.
" މިފަދަ އަމަލުތައް ހިންގުމަކީ އިސްލާމް ދީނަށް ކުރެވޭ ވަރަށްބޮޑު އިހާނާތެއް. ފާޅުގައި އިސްލާމްދީނަށް ފުރައްސާރަ ކުރާ ބަޔަކު އުޅޭކަމީ ހިތާމަހުރި ކަމެއް. އިސްލާމް ދީނާ މެދު ޝައްކު އުފައްދައި ދީނުގައި ކަނޑައަޅުއްވާފައިވާ ހައްދުތަކާމެދު ޝައްކު އުފެއްދުމަށް ކުރަމުން ގެންދާ ހަޑި މުޑުދާރު އަމަލުތައް ވަގުތުން ހުއްޓާލާ، އިސްލާމް ދީނާ ބެހޭ ސައްހަ މައުލޫމާތު ހޯދައި އިސްލާހުވުމަށް ނަސޭހަތްތެރިވަން." މިއަދުގެ ޚުތުބާގައި ބަޔާންކޮށްފައިވެއެވެ.
އަދި އިސްލާމް ދީނާ ޚިލާފު ފިކުރުތަކުގެ އަހުލުވެރިން، މުސްލިމުންގެ ހިތްތަކަށް ވެރިވެގަތުމަށް ގިނަ އަދަދެއްގެ ފައިސާއާއި، ސިޔާސީ ނުފޫޒާއި، މިނިވަންކަމުގެ ޝިއާރުތައް ބޭނުންކޮށް، އެމީހުންގެ ދީނަކީ ވަރަށް އޯގާތެރި ދީނެއްކަން މުސްލިމުންނަށް ދައްކާ ކަމަށްވެސް ފާހަގަކޮށްފައިވެއެވެ.
