ދިވެހިރާއްޖެ މިއަދު ވަނީ، ހެޔޮލަފާ މުޖުތަމަޢެއް ބިނާކުރުމަށާއި، ތަރައްޤީއާއި، ތަހުޒީބުގެ އާ އުސްމިންތަކަށް ވާސިލުވުމަށްޓަކައި ގިނަގުނަ މަސައްކަތްތަކެއް ކުރަންޖެހިފައި ކަމަށް މިއަދުގެ ހުކުރު ޚުތުބާގައި ވަނީ ބުނެފައެވެ.
" މި މަސައްކަތްތައް ކާމިޔާބީއާ ހަމައަށް ގެންދެވޭނީ މުހިންމު ރުކުންތަކެއް ފުރިހަމަވެގެން. އޭގެތެރެއިން އެންމެ މުހިންމު ރުކުންތަކަކީ، އަދުލުވެރިވުމާއި، އިންސާފު ޤާއިމްކުރުމާއި، ހެޔޮކަންކަމަށް އަމުރުކުރުމާއި، ނުބައިކަންތައްތައް ނަހީކުރުން. ޢަދުލުވެރިކަން ނެތް މުޖުތަމައެއްގައި ސުލްހަވެރިކަމެއް ނޯންނާނެ."
ހެޔޮ ކަންކަމަށް އަމުރުކޮށް ނުބައިކަންކަން ހުއްޓުވުމަކީ އިސްލާމީ މުޖުތަމައެއްގެ އެންމެ އިސް ރުކުނެވެ. މުންކަރާތްތައް ހުއްޓުވުމަކީ، އިސްލާމް ދީނުގައި ނުހަނު މަތީ ދަރަޖައަށް އަމުރުކޮށްފައިވާ ކަމެކެވެ. މުންކަރާތް ހުއްޓުވުމުގައި ދަރަޖަތަކެއް ވެއެވެ. އެކަން ބަޔާންކުރައްވާ ކީރިތި ރަސޫލާ ޞައްލަﷲ ޢަލައިހި ވަޞައްލަމް ހަދީސް ކުރައްވާފައިވާ އާޔަތެއްގެ މާނައިގައިވެއެވެ. "ތިޔަބައިމީހުންގެ ތެރެއިން މީހަކަށް މުންކަރާތެއް ފެނިއްޖެނަމަ އެމީހެއްގެ އަތުން އެކަން ހުއްޓުވާށެވެ. އަތުން ހުއްޓުވުމަށް ނުކުޅެދިގެންވާ މީހާ ފަހެ އޭނާގެ ދުލުން އެކަން ހުއްޓުވާށެވެ. އެކަމަށް ނުކުޅެދިގެންވާ މީހާ، އޭނާގެ ހިތުން އެކަން މަނާކުރާށެވެ. އެއީ އީމާން ކަމުގެ އެންމެ ދަށު ދަރަޖައެވެ."
އިސްލާމް ދީން ވަނީ ޒުވާނުންނަށް މަތިވެރި މަޤާމެއް ދީފައެވެ. ހެޔޮގޮތުގައި ތަރުބިއްޔަތުވެގެން ﷲ އަށް އަޅުކަން ކުރުންމަތީ ދެމިހުންނަ ޒުވާނާއަށް ޤިޔާމަތް ދުވަހު، މާތް ﷲ ގެ ޢަރުޝީގެ ހިޔާވަހިކަން ދެއްވާނެކަން ވަނީ ބަޔާން ކޮށްދެއްވާފައެވެ.
" ކޮންފަދަ މަތިވެރި ނަސީބެއް ހެއްޔެވެ. މި ނަސީބު ހާސިލުވުމަށް ނޭދޭނީ ފަހެ ކޮން ޒުވާނެއް ހެއްޔެވެ."
ހަށިގަނޑު ދުޅަހެޔޮކޮށް ބެހެއްޓުމަށްޓަކައި، ޝަރުޢީ ގިއުގަނޑުގެ ތެރޭގައި، ކުޅިވަރު ކުޅުމާއި، ކަސްރަތު ކުރުމަކީ އިސްލާމް ދީން މަނާކުރާ ކަމެއް ނޫނެވެ. ހެޔޮލަފާ ޞުލްހަވެރި ޒުވާނުން ބިނާކުރުމުގައި ކޮންމެ މީހަކުވެސް އެމީހެއްގެ މަސްއޫލިއްޔަތު އަދާކުރަންޖެހޭ ކަމަށާއި، އިސްލާމީ އުއްމަތް ހެޔޮގޮތުގައި ބިނާވެގެން ދިއުމުގެ އަސްލަކީ މުސްލިމުން އެބައިމީހުންގެ ދަރިން ތަރުބިއްޔަތު ކުރުމަށް ދިން ސަމާލުކަން ކަމަށް ޚުތުބާގައި ފާހަގަކޮށްފައިވެއެވެ.
