އިސްލާމް ދީން ވަނީ އައުސާއި ޚަޒްރަޖާ ދެމެދުގައި އޮތް ހަތުރުވެރިކަމާއި، ނޭއްގާނީކަމުގެ އަލިފާންގަނޑު ނިއްވާލައި އަލިފާނުގެ ވަޅުގަނޑެއްގެ ތުންފަތްމަތިން އިސްލާމީ އުއްމަތް ދުރަށްލައި ސަލާމަތްކޮށްފައެވެ. މިއަދުވެސް މުސްލިމުންނަށް މިކަން ނުކުރެވެންވީ ސަބަބެއް ނެތެވެ. މިކަމަށް ބޭނުންވާ، އެއްގަލަކަށް އެރުމާއި އޯގާވެރިކަމާއި އެކަކު އަނެކަކަށް އަޅައިލުމުގެ ރޫޙު މުސްލިމުންގެ ކިބައިގައި އެބަހުއްޓެވެ.
ރަސޫލުﷲ ސައްލަﷲ ޢަލައިހި ވަޞައްލަމް ހަދީސް ކުރައްވާފައިވާ އާޔަތެއްގެ މާނައިގައިވެއެވެ. "އެއްބަޔަކު އަނެއްބަޔަކު ދެކެ ލޯބިވުމާއި، އަޅައިލުމާއި، އެއްބަޔަކު އަނެއް ބަޔަކަށް އޯގާވެރިވުމުގައި މުއުމިނުންގެ މިސާލަކީ އެއް ހަށިގަނޑެއްގެ މިސާލެވެ. އެހަށިގަނޑުގެ ގުނަވަނެއް ބަލިވެއްޖެނަމަ އެހެން ގުނަވަންތައް ހޭލައި ހުރުމާއި ހުން އައުމުގައި އެ ގުނަވަނަކަށް އިޖާބަ ދޭނެތެވެ."
އަދި އެމީހެއްގެ އަމިއްލަ ނަފްސު ދެކެ ލޯބިވާ ވަރަށް އޭނާގެ އަޚާ ދެކެ ލޯބިވެއްޖައުމަށް ދާންދެން ތިޔަބައިމީހުންގެ ތެރެއިން އެކަކު ވެސް ފުރިހަމައަށް އީމާންވާ މީހަކު ކަމުގައި ނުވާ ކަމަށް ވަނީ ބަޔާން ކުރައްވާފައެވެ. އިސްލާމީ އެއްބައިވަންތަކަމާއި، އީމާންކަމުގެ އުޚުއްވަތްތެރިކަން މުސްލިމުންގެ ހިތްތަކުގައި އުފެދި ބޮޑުވީ މި ލޯތްބާއި، މި އޯގާވެރިކަމާއި، މި ކުލުނާއި، އެއްގަލަކަށް އެރުމުގެ ސަބަބުންނެވެ.
ދަރީންގެ ހިތްތަކުގައި އިސްލާމް ދީނަށް ލޯބި ޖެއްސުމާއި، އެ ދީން ގެނެސްދިން އެކުވެރިކަމާއި، އެއްބައިވަންތަކަމާއި، ވަޙްދަތު، ދަރީންނަށް ދަސްކޮށްދީ، އެގޮތުގެ މަތީން އެ ކުދިން ތަރުބިއްޔަތު ކުރުމަކީ، ބެލެނިވެރިންނާއި އެދުރުންގެ މަސްއޫލިއްޔަތެކެވެ.
އިސްލާމީ ވަޙްދަތު ޤާއިމްކުރުމަށް ބޭނުންވާ ކަންތައްތަކުގެ ތެރޭގައި ދެބަސްވުންތަކާއި، އަރާރުންތަކާ ދުރުހެލިވުންވެއެވެ. އިސްލާމީ ވަޙްދަތާއި އީމާންކަމުގެ އުޚުއްވަތްތެރިކަން ޤާއިމް ކުރެވޭނީ، އަމިއްލަ މަޞްލަޙަތުތަކާއި ދުނިޔަވީ މަންފާތަކަށް ވުރެ އުއްމަތުގެ މަޞްލަޙަތުތައް އިސްކުރެވިގެންނެވެ.
" އިސްލާމް ދީން ގޮވާލަނީ އެއްބައިވަންތަކަމާޢި، އެއްގަލަކަށް އެރުމަށާއި، އެކަތިގަނޑަކަށް ވުމަށާއި، ބައިބައި ނުވުމަށާއި، އެކަކު އަނެކަކު ދެކެ ރުޅިނައިސް އެއްބަނޑު އެއްބަފައި ބައެއްގެ ގޮތުގައި އުއްމަތް ބިނާކުރުމަށްޓަކައި އަތުގުޅާލުމަށް. ތައުޙީދުގެ ކަލިމައަށް ފަހު، އިސްލާމް ދީން ގެނެސްދީފައި ވަނީ ކަލިމައެއްގެ އެއްބައިވަންތަކަން. ޖަމާޢަތުގެ ވަޙްދަތާއި ސަފުތަކުގެ ވަޙްދަތު."
މާތް ﷲ ރުހިވޮޑިގަންނަވާ ތިންކަމަކީ އެކަލާންގެއަށް އަޅުކަންކުރުމާއި، އެކަލާންގެއާ އެހެން އެއްވެސް އެއްޗަކާ ޝަރީކު ނުކުރުމާއި، އެންމެން ﷲ ގެ ދީނުގައި ހިފެހެއްޓުމާއި، ވަކިވަކިވެ ނުގަތުމަށެވެ.
އަދި ރުހިވޮޑިނުގަންނަވާ ތިން ކަމަކީ، ޔޯލަ ވާހަކަ ދެއްކުމާއި، ބޭކާރު ސުވާލު ކުރުމާއި، މުދާ އިސްރާފުކުރުމެވެ.
މައުލޫމާތު: މިއަދުގެ ހުކުރު ޚުތުބާ
