ދުވަހަކަށްފަހު ދުވަހެއް، މަހަކަށްފަހު މަހެއް، އަހަރަކަށްފަހު އަހަރެއް ފާއިތުވަމުންދާއިރު އަޅުގަނޑުމެން މިތިބެނީ ޣާފިލުކަމުގެ ތަންމަތީގައި ނިދާފައެވެ. މި ނިދިން އަޅުގަނޑުމެން ހޭލާނީ ކޮން ދުވަހަކުންބާވައޭ ހިތަށް އަރައެވެ. ކޮންމެ ދުވަހަކުވެސް އިރުއަރައި އިރު އޮއްސެމުންދާތަން އަޅުގަނޑުމެންނަށް ފެނެއެވެ.
" ފާއިތުވެގެންދާ ކޮންމެ އަހަރަކީ އެއަހަރުތެރޭގައި އަޅުގަނޑުމެން ކުޅަ އަމަލުތަކާއިމެދު އަޅުގަނޑުމެންގެ މައްޗަށް ހެކިދޭ އަހަރެއް. އަދި އެކަނިމާއެކަނި ގަބުރުގައި އޮންނަންޖެހޭނެ ދުވަސް ގާތްވަމުންދާ ކަމުގެ ނިޝާނެއް. އާންމުގޮތެއްގައި ދުނިޔޭގައި ދިރިއުޅެވޭނީ ފަސްދޮޅަސް ނުވަތަ ހަތްދިހަވަރަކަށް އަހަރު. ނުވަތަ އެއަށްވުރެ މަދު ދުވަސްކޮޅެއްގައި. މިދުނިޔެއަށް އަލްވަދާއު ކިޔަންޖެހޭނެކަމީ ބުއްދި ސަލާމަތުންހުރި އެއްވެސް މީހަކު އިންކާރުކުރާނެ ކަމެއް ނޫން. އެމީހެއްގެ އުމުރުގެ ދުވަސްތައް ހެޔޮގޮތުގައި ހޭދަކޮށްފި މީހަކީ މާތް ﷲ ގެ އިރާދަފުޅުން އަބަދުގެ އަބަދަށް ސުވަރުގޭގެ ނިއުމަތުގައި ދެމިހުންނާނެ މީހެއް"
އަދި ހަރާމްކުރައްވާފައިވާ ކަންތައްތައް ކުރުމުގައި އެމީހެއްގެ އުމުރު ހޭދަކޮށްފި މީހަކީ ﷲ ގެ ކޯފާއާއި އަޒާބަށް ހުށަހެޅިގެންދާނެ މީހެކެވެ.
ގައުމެއްގައި ނުވަތަ މުޖުތަމައެއްގައި މުންކަރާތްތައް ހިނގަމުންދާނަމަ އެކަންކަން ހުއްޓުވުމަށް މަސައްކަތް ކުރަންޖެހެއެވެ. އެތަނެއްގައި މުންކަރާތްތައް މަނާނުކުރެވޭނަމަ އެއީ ﷲ ގެ ކޯފާ އެބައެއްގެ މައްޗަށް އައުން ގާތްވެގެންވާ ކަމެކެވެ.
ރަސޫލުﷲ ސައްލަﷲ ޢަލައިހި ވަސައްލަމް ހަދީސްކުރައްވާފައިވާ ބަސްފުޅެއްގެ މާނާގައިވެއެވެ. "އެބައެއްގެތެރޭގައި ފާފަތައް ކުރަމުންދާއިރު، އެބަޔަކަށް އެފަދަ ކަންތައްތައް ހުއްޓުވުމަށް ކުޅަދާނަވެފައި އެކަންތައްތައް ނުހުއްޓުވައިފިނަމަ، އެބައެއްގެ މައްޗަށް އާންމުވެގެންވާ ކޯފާއެއް ﷲ ފޮނުއްވުން ގާތެވެ.
އަދި އާޚިރަތަށްވުރެ ދުނިޔޭގެ އެދުންވެރިކަން އިސްކޮށް ދުނިޔަވީ ކަންތަކުގައި އެއްބަޔަކު އަނެއްބަޔަކަށްވުރެ ކުރިއަރާ ދިއުމަށް މަސައްކަތްކޮށް އެކަމުގައި ހައްދުފަހަނައަޅާ ދިއުމަކީ ގައުމުތައް ހަލާކުވުމަށް މެދުވެރިވާ ސަބަބެއްކަމުގައި ރަސޫލުﷲ ސައްލަﷲ ޢަލައިހި ވަސައްލަމްގެ ހަދީޘްފުޅުތަކުން އެނގެއެވެ.
ޣައިރު މުސްލިމުންގެ ޝިޢާރުތައް ފާޅުކޮށް، އެބައިމީހުންގެ ޢީދުތަކުގައި ބައިވެރިވުމަކީ، މުސްލިމުންނަށް ހުއްދަވެގެންވާ ކަންކަމެއް ނޫނެވެ. އެއީ އެބައިމީހުންގެ ކުފުރާއި ޝިރުކުގެ ޝިޢާރުތައް ފާޅުކޮށް އެފަދަ އަމަލުތައް ހިންގުމަށް ވާގިވެރިވެ އެހީތެރިވުމުގެ ތެރެއިންވާ ކަންކަމެވެ.
ނޯޓް: މައުލޫމާތު ނަގާފައިވަނީ މިއަދުގެ ހުކުރު ޚުތުބާ
