ދުވަސްތައް މާޒީވަމުން މިދަނީ ވަރަށް ގިނަގުނަ ފިލާވަޅުތަކާއި ޢިބުރަތްތަކެއް ދެމުންނެވެ. މީގެތެރޭގައި ހަނދާންކުރަންޖެހޭ ކަންތައްތަކާއި ލިބިގަންނަންޖެހޭ ފިލާވަޅުތައް އެބަހުއްޓެވެ. ހަނދާންކުރަންޖެހޭ އެއްކަމަކީ، ފާއިތުވެދާ އެއްވެސް ވަގުތަކީ، ދެން ހަޔާތަށް އެބުރި އަންނާނެ ވަގުތެއް ނޫންކަމެވެ.
"މިފުރުސަތުގައި ހަނދާން ކުރަންޖެހޭ އެންމެ މުހިންމު އަނެއް ކަމަކީ ﷲ ސުބުހާނަހޫ ވަތަޢާލާ އެއްލައްކަ ސައުވީސްހާސް ނަބިއްޔުން ފޮނުއްވި މަޤްސަދުގެ މަތިން ހަނދާން ކުރުން. އެއީ މާތް ﷲ ގެ އެއްކައުވަންތަކަން ބިންމަތީގައި ގާއިމުކުރުން. ހައްގުވެގެން އަޅުކަން ވެވޭނެ ފަރާތަކީ ހަމައެކަނި މާތް ﷲ ކަން ސާބިތުކުރުން"
ދިރިއުޅުމުގައި ކުރިމަތިވާ ކޮންމެ ކަމެއްގައިވެސް ކަންކުރަންވީ ގޮތުގެ ފުރިހަމަ ނަމޫނާ ލިބިގަންނަންޖެހެނީ ލޮބުވެތި ނަބިއްޔާ ޞައްލަﷲ ޢަލައިހި ވަޞައްލަމްގެ ހަޔާތްޕުޅުންނެވެ. އެއީ ކާމިޔާބުވުމުގެ އަސާސެވެ.
" ރެއާއި ދުވާލަކީ އިންސާނާ ގޮވައިގެން އޭނާގެ އަޖަލާ ދިމާލަށް ދަތުރުކުރާ އުޅަނދެކެވެ. ދުރުގައިވާ ކޮންމެ އެއްޗެއް ކައިރިކުރަމުން. އާ ކޮންމެ އެއްޗެއް ބާކުރަމުން. މުސްލިމުން ހަނދާންކުރަންޖެހޭ ކަންކަމުގެ ތެރޭގައި ލިބޭ ފުރުސަތުތަކުގެ ބޭނުން ހެޔޮގޮތުގައި ހިފުން ހިމެނޭ. ހެޔޮ އަމަލުތައް ގިނަކުރުމާއި ނުބައިކަންތަކުން ދުރުހެލިވުން"
ފަސްކަމެއް ކުރިމަތިވުމުގެ ކުރިން އެ ފަސްކަމުގެ ފައިދާ ހެޔޮގޮތުގައި ލިބިގަތުމަށް ވަނީ އިސްލާމްދީނުގައި ބާރު އަޅުއްވާފައެވެ. އެއީ މުސްކުޅިވުމުގެ ކުރިން ޒުވާންކަމުގެ ފައިދާ ހެޔޮގޮތުގައި ލިބިގަންނާށެވެ. ބަލިވުމުގެ ކުރިން ދުޅަހެޔޮކަމުގެ ފައިދާ ހެޔޮގޮތުގައި ލިބިގަންނާށެވެ. ފަގީރުވުމުގެ ކުރިން މުއްސަނދިކަމުގެ ފައިދާ ހެޔޮގޮތުގައި ލިބިގަންނާށެވެ. މަޝްޢޫލުވުމުގެ ކުރިން ހުސްވަގުތުގެ ފައިދާ ހެޔޮގޮތުގައި ލިބިގަންނާށެވެ. އަދި މަރުވުމުގެ ކުރިން ހަޔާތުގެ ފައިދާ ހެޔޮގޮތުގައި ލިބިގަންނާށެވެ.
ހަތަރުކަމަކާ ބެހޭގޮތުން ސުވާލު ކުރެއްވުމަށްފަހު މެނުވީ ގިޔާމަތްދުވަހު އަޅާގެ ފައި ހުރި ތަނުން ގުޑުވައި ނުލެވޭ ހުއްޓެވެ. އެއީ އޭނާގެ އުމުރު ހޭދަކުރީ ކިހިނެއްތޯ އާއި، އޭނާގެ ޒުވާން ދުވަސްވަރު ހޭދަކުރީ ކިހިނެއްތޯ އާއި، އޭނާ އޭނާއަށް ދެއްވި ޢިލްމަށް އަމަލުކުރީ ކޮން ގޮތަކަށްތޯ އާއި، އޭނާ މުދާ ހޯދި ގޮތާއި، ހޭދަކުރީ ކޮން ގޮތަކަށްތޯ އެވެ.
މައުލޫމާތު: ހުކުރު ޚުތުބާ
