ރިވެތި ސިފަތަކާއި މާތް އަޚްލާގުގެ ތެރޭގައި އެހެން މީހުންގެ ޢައިބުތަކާއި، އުނި ސިފަތައް ފޮރުވައި ވަންހަނާކުރުން ވެއެވެ. ﷲ ސުބުހާނަހޫ ވަތަޢާލާ އަކީ އެކަލާނގެ އަޅުތަކުންނަށް ކުރެވޭ ނުބައި ޢަމަލުތައް ވަންހަނާކޮށްދެއްވާ ރަސްކަލާނގެއެވެ. މިހެންވެ އިސްލާމް ދީން، މުސްލިމުންނަށް އެމީހުންގެ ޢައުރަ ނިވާކުރުމަށާއި، އެހެން މީހުންގެ ސިއްރުތައް ރައްކައުތެރިކޮށް ސިއްރުކޮށްދިނުމަށް ވަނީ ގޮވާލާފައެވެ.
"ކީރިތި ރަސޫލާ ޞައްލަﷲ ޢަލައިހި ވަޞައްލަމް އަޅުގަނޑުމެންނަށް އަމުރު ކުރައްވާފައިވަނީ އަޅުގަނޑުމެންނަށް އޮޅުމަކުން ކުރެވޭ ހަޑި ހުތުރު ޢަމަލުތައް ވެސް ވަންހަނާ ކުރުމަށް. ތިމާ އެފަދަ ކަންކަން ޢާއްމުކޮށް ފާޅު ނުކުރާހައި ހިނދަކު، މާތް ﷲ އިންސާނާގެ އެފަދަ ޢަމަލުތައް ބޭޒާރު ނުކުރައްވައި ވަންހަނާކޮށް ދެއްވާނެ"
ކުރެވޭ ކުށްފާފަތަކާއި، ހަޑި ހުތުރު ޢަމަލުތައް ވަންހަނާކުރުމަކީ ޤިޔާމަތް ދުވަހުން މާތް ﷲގެ ފުއްސެވުމާއި މަޣްފިރަތު ލިބޭނެ ކަމެކެވެ. ފޮރުވައި ވަންހަނާކޮށްދިނުމުގެ ތެރޭގައި އަޅުގަނޑުމެންގެ އަޚަކަށް ކުރެވޭ ނުބައި ކަމެއް ފެންނަހިނދު އޭނާއަށް ނަސޭހަތްދީ އޭނާގެ ކުށް ވަންހަނާކޮށްދިނުން ވެއެވެ.
މުސްލިމުންގެ ސިއްރުތައް ކަޝްފުކޮށް ހާމަކުރަން މަސައްކަތް ކުރާ މީހުންނަށް އިންޒާރު ދެއްވަމުން، ކީރިތި ރަސޫލާ ޞައްލަﷲ ޢަލައިހި ވަޞައްލަމް ޙަދީޘް ކުރައްވާފައިވެއެވެ. މާނައީ: "ދުލުކުރިން އީމާންވެ، އެ އީމާންކަން ހިތުގެތެރެއަށް އަދި ނުވަންނަ މީހުންނޭވެ. ތިޔަބައިމީހުން މުސްލިމުންގެ ޣީބަ ނުބުނާށެވެ. އަދި ތިޔަބައިމީހުން އެބައިމީހުންގެ އުނި ސިފަތަކާއި ސިއްރުތައް ހާމަނުކުރާށެވެ. ފަހެ ހަމަކަށަވަރުން އެމީހުންގެ ސިއްރުތަކާއި އުނި ސިފަތައް ހާމަކޮށްފި މީހާ، އޭނާގެ ގޭތެރޭގައި ފިލައި އޮތަސް މާތް ﷲ އޭނާ ފަޟީޙަތް ކުރައްވާނެތެވެ.
މީސްމީޑިއާގެ ވަސީލަތްތައް ބޭނުންކޮށްގެން ޚަބަރުތަކާއި ފޮޓޯތަކާއި، ވީޑިއޯތައް ފަތުރަން ފަސޭހަ މިފަދަ ޒަމާނެއްގައި މުސްލިމުން މިކަމަށް ވަރަށްބޮޑަށް ސަމާލުކަން ދޭންޖެހެއެވެ. އަތުގައި އޮންނަ ފޯނުން، މީހުންނަށް ނޭނގޭގޮތަށް ތަންތަނާއި މަންޒަރުތަކާއި އަޑުތައް ރެކޯޑްކޮށް، ފިތައިލާ ފިތަކުން އެ ސިއްރުތައް އާއްމުކޮށްލާ ހިނދު، އެފަދަ ކަންކަން ކުރާ ކޮންމެ މީހަކުވެސް ދީނުގައި އައިސްފައިވާ ވަޢީދުތަކާމެދު ވިސްނަންޖެހެއެވެ.
ފޮރުވައި ވަންހަނާކުރުމުގެ މާނައަކީ މުންކަރާތްތަކާ ދެކޮޅުހެދުން ދޫކޮށްލުމެއް ނޫނެވެ. މީހަކު މުންކަރާތަކަށް އަރައިގަންނަނަމަ އޭނާއަށް ނަސޭހަތް ދިނުން ވާޖިބުވާނެއެވެ. މާތް އަޚްލާޤުގެ ވެރިންނަށް ކުރެވޭ ކުށްތަކަށް މާފުކުރާށެވެ. ޙައްދުތައް މެނުވީއެވެ. އެހެންނަމަވެސް އެކުށްތައް އިޢުލާންކޮށް ފާޅުކުރާ މީހުންގެ މައްސަލަ ކަމާބެހޭ ފަރާތްތަކާއި ހަމައަށް ގެންދަންޖެހެއެވެ. އެއީ އެފަދަ ޢަމަލުތަކުން މުޖުތަމަޢު ރައްކާތެރިކުރުމަށްޓަކައެވެ.
މައުލޫމާތު: ހުކުރު ޚުތުބާ
