އަހަރެންނަކީ އުތުރުގެ ރަށަކަށް ނިސްބަތްވާ އާދައިގެ އާއިލާއެއްގައި ހުރި ހަމައެކަނި އަންހެންކުއްޖާއެވެ. މަންމަ އާއި ބައްޕައަކީ އެހާ ފޯރުންތެރި ބައެއް ނޫނެވެ. ދިރިއުޅެމުންދިޔައީ ބައްޕަކުރާ މަސައްކަތުން ލިބޭ އާމްދަނީއިންނެވެ. މައިންބަފައިން އަހަރެން ބަލާ ބޮޑުކުރީ ވަރަށް ލޯބިންނެވެ. އުމުރުގެ އެހެން ކުދިންނެކޭ އެއްގޮތަށް ބޭރަށް ކޮފީތަކަށް ގޮސް އުޅުމުގެ ހުއްދައެއް އަހަރެންނަށް ނޯވެއެވެ. އަހަރެން ގަބޫލުކުރިގޮތުގައި މަންމަމެން އެކަން ކުރީ އަހަރެންނާމެދު ވިސްނާތީއެވެ. ނުބައި މަގަކުން ދިޔަ ނުދިނުމުގެ ބޭނުމުގައި ކަމަށް ވެސް ވެދާނެއެވެ.

ރަށުން ކިޔެވެންހުރި މިންވަރަކަށް ކިޔެވީމެވެ. މާލެއަށް ފޮނުވައިގެން ކިޔަވައިދިނުމުގެ ފުރުސަތު މައިންބަފައިންނަށް ހޯދައިނުދެވޭނެތީ އެކަމާ ޝަކުވާ ނުކުރަމެވެ. އެއްވެސްކަމެއް ނެތި ގޭގައި ހުންނަންޖެހުމުން ފޫހިވެސްވިއެވެ. ދުވަސްތައް ދިޔައީ ފާއިތުވަމުންނެވެ. އާދުވަހަކަށް އިރުއަރައިގެން އައިއިރު އެއީ އަހަރެންގެ ހަޔާތަށް ބޮޑު ބަދަލެއް އަންނާނެ ދުވަހެއްކަމަށް ކުރިން ވިސްނިފައެއްވެސް ނެތެވެ.

" ދަރިފުޅާއި ކައިވެނިކުރަން ބޭނުންވާ ވަރަށް ރަނގަޅު މީހަކު އެބަހުރި. މަންމައާއި ބައްޕަ ބޭނުންވަނީ ދަރިފުޅުގެ ކައިވެނި އެ އަމީޒް އާއި ކޮށްދިނުމަށް" މައިންބަފައިންގެ މި ޖުމްލައިން އަހަރެންނަށް ފަސްޖެހޭ ގޮތްވިއެވެ. ނުދަންނަ މީހަކާއި ކައިވެނިކުރުމަކީ އަހަރެން އެއްގޮތަކަށްވެސް ބޭނުންވާކަމެއް ނޫނެވެ. ހަޔާތުގެ ބައިވެރިއަކަށް ހެދުމަށް ބޭނުންވަނީ އަހަރެންގެ މިޒާޖާއި ގުޅޭ މީހެކެވެ. އެހެންނަމަވެސް އަހަރެންނަށް ދެކޮޅުހެދޭކަށް ނެތެވެ. އެއީ ދުވަހަކުވެސް މައިންބަފައިންގެ އެދުމަކަށް ނޫނެކޭ ނުބުނާތީއެވެ. އެހެންނަމަވެސް ހިތްވަރާއެކު މަންމަ ކައިރީގައި އެނޫންގޮތެއް އޮތްތޯ އެހީމެވެ. މަންމަ ބުނީ އެއީ ބައްޕަގެ ފަހުގެ ނިންމުން ކަމަށެވެ.

Advertisement

ހިތާއި ދެކޮޅަށް ބައްޕަމެން ބޭނުންވިގޮތަށް އަމީޒު އާއި ކައިވެނި ކުރީމެވެ. އެކައިވެނިން އަހަރެންނަށް ހިތްހަމަޖެހުމެއް ނުލިބެއެވެ. އަބަދުވެސް ހުރެވެނީ ބޭނުންނުވެ ކުރި ކައިވެންޏާއިމެދު ހިތްދަތިވެފައެވެ. އަމީޒު މަސައްކަތްކުރަމުން ދިޔައީ ރަށުގެ ކައިރީގައި އޮންނަ ރިސޯޓެއްގައެވެ. އޮފް ދުވަހަށް ރަށަށް އާދެއެވެ. އަމީޒަކީ ކުރިންވެސް ކައިވެންޏެއް ކޮށްފައިވާ އަދި ދަރިއެއްވެސް ހުރި މީހެކެވެ. އެކަމަކު އުޅުން ރަނގަޅު މީހެއް ކަމަށް ބައްޕަމެން ގަބޫލުކުރެއެވެ. ހަގީގަތް އެނގޭނީ އެކީގައި އުޅޭ މީހަކަށެވެ.

އަމީޒުގެ ފުށުން އަހަރެން ބޭނުންވިފަދަ އަޅާލުމެއް ނުލިބެއެވެ. ގިނަވަގުތު ހޭދަކުރަނީ ފޯނާއި ކުޅުމުގައެވެ. ނޫނީ ރައްޓެހިންނާއެކު މަސްދަތުރު ދިޔުމުގައެވެ. މިއީ އޮފް ދުވަހެއްގައި ރަށަށް އައިއްސިއްޔާ އާންމުކޮށް އަމީޒުގެ އުޅުން ހުންނަގޮތެވެ. އެކަމަކާ ޝަކުވާއެއް ނުކުރަމެވެ. މަސައްކަތްކުރީ މައިންބަފައިންގެ ހިތްހަމަޖެހުމަށް އަމީޒުއާއިއެކު ދިރިއުޅެވޭތޯއެވެ.

ކައިވެންޏަށް އަހަރެއް ނުވަނީސް އަހަރެން ބަނޑުބޮޑުވެއްޖެއެވެ. އަމީޒު ކުރަންޖެހޭ ޚަރަދުތައް ކުރެއެވެ. އެހެންނަމަވެސް އެހާހިސާބުން ގޭގައި ވަގުތު ހޭދަކުރާ މިންވަރު ކުރިއަށްވުރެވެސް މަދުވެއްޖެއެވެ. އެއްރެއެއްގެ ދަންވަރެވެ. އަހަރެންނަށް ނިދާ ހޭލެވުނީ މީހަކު ފޯނުން ވާހަކަދައްކާ އަޑަށެވެ. އެއިރު އަހަރެން ހުރީ ވިހަން ކައިރިވެފައެވެ. މަޑުމަޑުން އަޑު އަންނަ ދިމާލަށް ދިޔައީމެވެ. އެއީ އަމީޒުގެ އަޑެވެ. ކޮޓަރީގެ ދޮރުކައިރީގައި ހުރެގެން އެވާހަކަ ދައްކަނީ އަންހެނަކާކަން ދެއްކިވާހަކައިން ޔަގީންވިއެވެ. އަދި އެމީހަކަށް ވިސްނަދެވޭތޯ މަސައްކަތްކުރާކަންވެސް އެނގުނެވެ.

އަހަރެން ވަރަށް ހިތުގައިޖެހުނެވެ. ލޯބިނުވިއަސް ބަނޑުގައި އޮތް ދަރިފުޅުގެ ހައްގުގައިވެސް އުންމީދުކޮށްގެން ހުރީ އަމީޒުއާއެކު ދިރިއުޅުން ކާމިޔާބު ކުރެވޭނެ ކަމަށެވެ. އެއްފުޅަށްމަތިން ފުންމާލި ބަކަރި އަނެއް ފުޅަށްމަތިން ފުންމާލާނޭ ބުނާފަދައިން އަމީޒަކީވެސް ހަމަ އޭގެ މީހެއްތާއެވެ. ފުރަތަމަ އަނބިމީހާ ވެސް އެވަރިކުރީ ކުއްޖަކު ލިބުނީމައެވެ. އަދި އަހަރެން ވިހަން ކައިރިވެފައިވަނިކޮށް އެހެން އަންހެނަކާ އެގުޅުން ބާއްވަނީއެވެ. މިކަން އެނގިއްޖެނަމަ އަހަރެންގެ މައިންބަފައިން ދެރަވާނެވަރު ވިސްނީމެވެ.

އާއިލާއަކީ ތަނަވަސް އާއިލާއަކަށް ނުވާތީ އަމީޒުގެ އެހީތެރިކަމެއް ނެތި ބަނޑުގައި އޮތް ދަރިފުޅު ބެލުމުގެ ގާބިލްކަމެއް އަހަރެންގެ ނެތެވެ. ވިސްނީމެވެ. ހިތަށްއެރިއެވެ. މިފަދަ ފިރިއަކާއެކު އުޅުމަށްވުރެ އަމިއްލައަށް އުޅެވޭނެ ގޮތެއް އޮތްތޯ ބެލުން މާރަނގަޅުވާނެއެވެ.

ބަނޑުގައި ރިއްސާތީ އަހަރެން ހޮސްޕިޓަލަށް ގެންދެވުނެވެ. ޗުއްޓީ ދުވަސްވަރަށްވާތީ ކައިރީގައި އަމީޒު ހުއްޓެވެ. މާތް ﷲ ގެ އިރާދަފުޅުން ސިއްހަތު ރަނގަޅު ކުއްޖަކު ލިބުނެވެ. ދަރިފުޅު ފެނުމުން ވަރަށް އުފާވިއެވެ. އެއުފާވެރިކަމުގެ ތެރޭގައި އަމީޒާއި އެއްވެސް ސުވާލެއް ކުރަން ބޭނުންނުވިއެވެ. ވިހައި ގަދަވަންދެން އެނގޭކަމަށްވެސް ނަހަދާ ހުރީމެވެ.

އަމީޒު ފޯނުގައި ހޭދަކުރާ ވަގުތު ގިނަވެ ދަރިފުޅަށްދޭ ސަމާލުކަންވެސް ކުޑަވިއެވެ. އަދި ރިސޯޓުގައި ވަޒީފާ އަދާކުރުމަށްފަހު އޮފް ދުވަހަށް ރަށަށް އަންނަ މިންވަރު މަދުވާން ފަށައިފިއެވެ. ސުވާލުކުރުމުން ބުނަނީ މާ މަސައްކަތް ބުރައީ ކަމަށެވެ. އޭގެ ދުވަސްކޮޅެއް ފަހުން ރަހުމަތްތެރިއެއްގެ ފަރާތުން އަހަރެންނަށް އެނގުނީ އަމީޒު އެހެން މީހަކާއި ކައިވެނިކޮށްގެން އުޅޭކަމެވެ. އަދި އެއަންހެން މީހާއާއެކު އަމީޒު ނަގާފައިވާ ފޮޓޯތަކެއްވެސް ސޯޝަލް މީޑިއާއިން އަހަރެންނަށް ދެއްކިއެވެ. އެއީ އެ އަންހެންމީހާ ލާފަހުރި ފޮޓޯތަކެކެވެ. އަހަރެންނާއި ކައިވެނިކުރުމުގެ ބޭނުމަކީ، އަމީޒު އަކީ އަހަރެންގެ ރަށު މީހަކަށްވުމާއެކު އުމުރުން ދުވަސްވީ އޭނާގެ މަންމަ ބެލުމުގެ ޒިންމާ އަހަރެންނާއި ހަވާލުކުރުމެވެ. ކައިވެންޏަށްފަހު އަހަރެން ދިރިއުޅެމުންދިޔައީ އޭނާގެ ގޭގައެވެ. އެގޭގައި ދިރިއުޅެމުން އަންނަނީ އޭނާގެ މަންމައާއި އަހަރެމެން ދެމަފިރިންނާއި ދަރިފުޅެވެ. ދެންތިބި އާއިލާގެ މެންބަރުންވީ މާލޭގައެވެ.

އެންމެ ދެރަވީ ކުއްޖަކު ލިބުނުފަހުން އަމީޒުގެ މަގްސަދު އެނގުނީމައެވެ. އުފަލެއް ނެތް ދިރިއުޅުމެއްގައި އުޅެން ބޭނުންނުވާތީ އެނބުރި މައިންބަފައިންގެ ގެއަށް ބަދަލުވީމެވެ. އެކަމަކު ވަރަށް ކައިރިން އަމީޒުގެ މަންމަގެ ހާލު ދިޔައީ ބަލަމުންނެވެ. އަމީޒަށް އަހަރެން އެގެއިން ނުކުތްކަން އެނގުމުން ވަރިކުރިއެވެ.

މިއަދު އަހަރެންނަކީ އެކަނިވެރި މައެކެވެ. އެކަނިވެރިމައަކަށް ލިބޭ އެލަވަންސްގެ އިތުރަށް ދެން ލިބެނީ އަމީޒު ދޭ 2000 ރުފިޔާއެވެ. ބައެއް މަސްމަހު އޮންނަނީ އެރުފިޔާ ހަމައަށް ނުލިބިފައެވެ. ރަށުގައި ދިރިއުޅޭތީ އިތުރަށް އާމްދަނީ ހޯދުމަށް ދިޔައީ ހެދިކާ ވިއްކަމުންނެވެ. ދަރިފުޅުގޮވައިގެން އުޅެވޭވަރުވެއެވެ. މައިންބަފައިންގެ އެދުމުގެމަތިން ކުރި ކައިވެނިން ދިމާވި ހިތްދަތި ހާދިސާއިން އަހަރެންގެ މައިންބަފައިން ތިބީ ވަރަށް ދެރަވެފައެވެ. އެފަހުން އިތުރު ކައިވެންޏެއް ކުރާކަށް އަހަރެން ނުވިސްނަމެވެ. އަދި އާއިލާއިން ވެސް އެކަމަކަށް ބާރެއް ނައަޅައެވެ. ބޭނުންވަނީ ދަރިފުޅަށް އުފާވެރި މުސްތަގުބަލެއް ހޯދައިދިނުމަށް ކުރެވެންހުރި މަސައްކަތެއް ކުރާށެވެ.   

- ފާއިޒާ -

ނޯޓް: މިއީ ހަގީގީ ހާދިސާއެއްގެ މައްޗަށް ބިނާކޮށް ލިޔެފައިވާ ލިޔުމެކެވެ.