ފިނެކް އިންސްޓިޓިއުޓް ފޮރ ޑިވެލޮޕްމެންޓަލް ސްޓަޑީސް (ފިޑްސް) އަކީ، ދިވެހި ރާއްޖޭގައި ރަޖިސްޓްރީކޮށްފައިވާ ކުންފުންޏެއްކަމަށްވާ ފިނެކް އާއި މާލީދާއިރާގައި ކިޔަވައިދިނުމުގެ މަސައްކަތްކުރާ ބައެއް ފަރާތްތަކުން އެކުވެގެން އުފައްދާފައިވާ ސްޓްރެޓެޖިކް ބިޒްނަސް ޔުނިޓެކެވެ. މިނިސްޓްރީ އޮފް ހަޔަރ އެޑިޔުކޭޝަންގައި 2021 ވަނަ އަހަރުގެ ނޮވެންބަރު މަހުގެ 1 ވަނަ ދުވަހު ރަޖިސްޓްރީ ކުރެވުނު މި އިންސްޓިޓިއުޓަކީ ދިވެހިރާއްޖޭގެ ފައިނޭންސް ސެކްޓަރ އަށް ޕްރޮފެޝަނަލް ގޮތެއްގައި ކުރިއެރުންތައް ހޯދައިދިނުމަށް ބޭނުންވާ ތަމްރީނުތައް ދިނުމުގެ މަޤްސަދުގައި އުފައްދާފައިވާ އިންސްޓިޓިއުޓެކެވެ.
ޕަބްލިކް ސެކްޓަރގެ ފައިނޭންސް ދާއިރާގެ މުވައްޒަފުންނަށް ބޭނުންވާ މުހިންމު ތަމްރީންތަކާއި، އިންސާނީ ވަޞީލަތް ތަރައްޤީކުރުމާއި، މިންތީގެ ހަމަތައް ދެމެހެއްޓުމުގައި ގެންގުޅެންޖެހޭ އުޞޫލުތައް ހިމެނޭ ގިނަ ޕްރޮގްރާމްތަކެއް ހިންގުމަށް މި އިންސްޓިޓިއުޓް އިން މަސައްކަތް ކުރުމަށް ރާވާފައިވެއެވެ. މިގޮތުން މި އިންސްޓިޓިއުޓުން މި ޖެނުއަރީގައިވެސް ކޯޕަރޭޓް ޓްރެއިނިންގ ތަކެއް ހިންގުމަށް ތައްޔާރުވެފައިވާއިރު، ދިވެހިރާއްޖޭގެ ގައުމީ ސަނަދުގެ އޮނިގަނޑުގެ ލެވެލް 5 އަދި 6ގެ ގިނަ ޕްރޮގްރާމްތަކެއް ރާވައި ހިންގުމަށް މޯލްޑިވްސް ކޮލިފިކޭޝަން އޮތޯރިޓީއަށް ހުށެޅުމުގެ މަސައްކަތް ކުރަމުންދާކަމަށް ވަނީ މައުލޫމާތުދީފައެވެ.
" ސެމިނާތަކާއި ވޯކްޝޮޕްތަކާއި ތަމްރީން ޕްރޮގްރާމްތައް ފަރުމާކޮށް ހިންގާ ކޯޑިނޭޓް ކުރުމާއި ފައިނޭންސްގެ ދާއިރާއިން ޕްރައިވެޓް އަދި ޕަބްލިކް ސެކްޓަރގައި ހިމެނޭ ފަރާތްތަކަށް ކޮންސަލްޓެންސީގެ ޚިދުމަތް ދިނުން ހިމެނޭ. އަދި މި އިންސްޓިޓިއުޓްގެ ފަރާތުން އިސްނަގައިގެން ފައިނޭންސް ދާއިރާއާ ގުޅުންހުރި ލިޔުންތައް ޕަބްލިޝް ކުރުމަކީވެސް ކުރިއަށް ގެންދިއުމަށް ރާވާފައިވާ ބައެއް ކަންކަން" ފިޑްސް އިން މައުލޫމާތު ދީފައިވެއެވެ.
ފައިނޭންސް އިންޑަސްޓްރީގެ ކުރިއެރުންތަކާއި އާ ހޯދުންތަކާއި ގުޅޭގޮތުން ދިރާސާކުރުމާއި ރާއްޖެއާއި ދެކުނު އޭޝިއާ ސަރަހައްދުގެ ފައިނޭންޝަލް އިންޑަސްޓްރީ އަށް ކުރިއެރުންތައް ގެނެސްދޭ ރިސާޗްތައް ޕަބްލިޝްކުރުމަށްވެސް ފިޑްސް އިން ވަނީ ނިންމާފައެވެ. ބުކްލެޓް، ގައިޑް ފަދަ ލިޔުންތައް އިލެކްޓްރޯނިކް ނުވަތަ ޕްރިންޓް މީޑިއަމް މެދުވެރިކޮށް ޕަބްލިޝް ކުރުމަށްވެސް ފިޑްސްއިން ވަނީ ނިންމާފައެވެ.
ހިންގުމަށް ހަމަޖެހިފައިވާ ބައެއް ކޯސްތަކުގެ ތެރޭގައި ޕްރޮފެޝަނަލް ސެޓްފިކެޓް އިން ފައިނޭންޝަލް ޖާރނަލިޒަމް، ސެޓިފިކެޓް 3 އިން ޕްރޮކިއުމަންޓް މެނޭޖްމަންޓް، ސެޓްފިކެޓް 3 އިން ސެކްރެޓޭރިއަލް ސާރވިސަސް، ޗާޓަޑް އިންސްޓިޓިއުޓް އޮފް ޕަބްލިކް ފައިނޭންޝަލް އެކައުންޓިންގ ހިމެނެއެވެ.
ޕަބްލިކް އަދި ޕްރައިވެޓް ސެކްޓަރގެ ގިނަ މުވައްޒަފުން ޕްރޮފެޝަނަލް މިންގަނޑުތަކަށް ތަމްރީންކުރުވުކީ މި އިސްޓިޓިއުޓްގެ މުއައްސިސުންގެ އެންމެ މުހިންމު އުއްމީދެވެ.
