މިއަހަރުގެ ޖެނުއަރީމަހު ރާއްޖެއަށް ޒިޔާރަތްކުރި ފަތުރުވެރިންގެ އަދަދު ލައްކައަކަށްވުރެ އިތުރެވެ. ޖެނުއަރީ 1 އިން 29 އާއި ހަމައަށް ރާއްޖެއަށް ޒިޔާރަތްކޮށްފައިވަނީ 122،575 ފަތުރުވެރިންނެވެ. ޖެނުއަރީމަހު އެންމެ ގިނައިން ރާއްޖެއަށް އައީ ރަޝިއާގެ ފަތުރުވެރިންނެވެ. ދެވަނައަށް އެންމެ ގިނަ ފަތުރުވެރިން ޒިޔާރަތް ކުރީ އިނގިރޭސިވިލާތުންނެވެ.
" ތިންވަނައަށް އެންމެގިނަ ފަތުރުވެރިން ޒިޔާރަތްކުރީ އިންޑިއާއިން. ހަތަރުވަނައަށް އިޓަލީން. ފަސްވަނައަށް ޖާމަނީ އިން. ހަވަނައަށް ޔުކްރެއިން. ހަތްވަނައަށް ފްރާންސުން. އަށްވަނައަށް އެންމެ ގިނަ ފަތުރުވެރިން އެމެރިކާއިން އައިއިރު ނުވަވަނައަށް ސައުދީ އަރަބިއްޔާއިން. ދިހަވަނައަށް އެންމެގިނަ ފަތުރުވެރިން އައީ އޮސްޓްރިއާ އިން".
ފަތުރުވެރިން ޒިޔާރަތްކުރާ މިންވަރުގެ ތަފާސްހިސާބުތަކަށް ބަލާއިރު 2021 ވަނަ އަހަރުގެ ޖެނުއަރީމަހު ރާއްޖެއައި ފަތުރުވެރިންގެ އަދަށްވުރެ 2022 ޖެނުއަރީގައި ރާއްޖެއައި ފަތުރުވެރިންގެ އަދަދު ވަނީ 30،472 އިތުރުވެފައެވެ. 2021 ވަނަ އަހަރުގެ ޖެނުއަރީގައި ރާއްޖެ އައީ 90،103 ފަތުރުވެރިންނެވެ.
މިދިޔަ އަހަރު ރާއްޖެއަށް ޒިޔާރަތްކުރީ 1،321،932 (އެއްމިލިއަން ތިން ލައްކަ އެކާވީސްހާސް ނުވަސަތޭކަ ތިރީސް ދޭއް) ފަތުރުވެރިންނެވެ. ކޮވިޑް-19 ޕެންޑަމިކާއި ގުޅިގެން ގައުމުތަކުގެ ބޯޑަރުތައް އެންމެ ގިނައިން ބަންދުކުރަން ޖެހުނު 2020 ގައި ރާއްޖެއަށް ޒިޔާރަތް ކުރީ 555،494 ފަތުރުވެރިންނެވެ. 2020 ވަނަ އަހަރު ރާއްޖޭގެ ބޯޑަރު ބަންދުކުރީ އެޕްރީލް، މޭ އަދި ޖޫންގައެވެ. އެހެންނަމަވެސް 2019 ގައި 1،702،887 ފަތުރުވެރިން ރާއްޖެއަށް ޒިޔާރަތް ކުރިއެވެ.
ކޮވިޑްގެ ކުރިން 2019 ވަނަ އަހަރު ރާއްޖެއަށް އެންމެގިނަ ފަތުރުވެރިން ޒިޔާރަތްކުރީ ޗައިނާއިންނެވެ. އެހެންނަމަވެސް ޗައިނާގައި ކޮރޯނާވައިރަސް ފެތުރި ހާލަތު ގޯސްވި ހިސާބުން ފެށިގެން ރާއްޖެއަށް ޒިޔާރަތްކުރާ ޗައިނާ ފަތުރުވެރިންގެ އަދަދު ވަނީ ވަރަށްބޮޑަށް ދަށަށް ގޮސްފައެވެ. 2019 ވަނަ އަހަރު ދެވަނައަށް އެންމެގިނަ ފަތުރުވެރިން ރާއްޖެއަށް ޒިޔާރަތްކުރީ އިންޑިއާއިންނެވެ. ތިންވަނައަށް އެންމެ ގިނަ ފަތުރުވެރިން ޒިޔާރަތްކުރީ އިޓަލީންނެވެ.
ޖެނުއަރީ 29 ގެ ނިޔަލަށް ފަތުރުވެރިންނަށް ޚިދުމަތްދޭ ތަންތަނުގެ ގޮތުގައި ރާއްޖޭގައި 1،143 ތަން އެބަހުއްޓެވެ. އޭގެތެރޭގައި ހިމެނެނީ ރިސޯޓް/މެރީނާ ގެ ގޮތުގައި ތަރައްޤީކޮށްފައިވާ 167 ފެސިލިޓީ އާއި 805 ގެސްޓްހައުސް އާއި ހޯމްސްޓޭ އަށް ޚާއްސަ އެއް ފެސިލިޓީ އާއި 157 ސަފާރީ އާއި 13 ހޮޓަލެވެ. ކޮންމެ އަހަރެއްގެ ޑިސެމްބަރު އަދި ޖެނުއަރީ އަކީ ކްރިސްމަސް ފާހަގަ ކުރުމަށާއި އާ އަހަރު ފާހަގަ ކުރުމަށް ގިނަ އަދަދެއްގެ ފަތުރުވެރިން ރާއްޖެއަށް ޒިޔާރަތްކުރާ ދުވަސްވަރެވެ.
ގޫގުލް ސާޗް ޑާޓާއަށް ބަލައިގެން 2021 ވަނަ އަހަރު ކުލަބު މެޑުން ކޮށްފައިވާ ސާވޭއަކުން ދައްކާގޮތުން އެންމެ ދާން ބޭނުންވާ 10 މަންޒިލުގެ ރޭންކިންގައި ރާއްޖެ ހިމެނެނީ އެއްވަނައިގައެވެ. ރާއްޖެއަށް ފަތުރުވެރިން ޒިޔާރަތް ކުރަނީ ހުދު ދޮންވެލި ގަނޑާއި އެކު އުފެދިފައިވާ ހޫނު އަވިދޭ ރީތި ގޮނޑުދޮށްތަކާއި ރީތި މުރަކައިގެ ބަގީޗާތަކުން ޗާލުކަން ލިބިފައިވާ ފަރުތައް ދެކިލުމުގެ ބޭނުގައެވެ.
މިއަހަރަކީ ރާއްޖޭގެ ފަތުރުވެރިކަމަށް 50 އަހަރު ފުރޭ ފަތުރުވެރިކަމުގެ ރަންޔޫބީލް އަހަރެވެ. އެހެންކަމުން ރާއްޖޭގެ ޓޫރިޒަމް ސެކްޓަރއިން މިއަހަރު ފާހަގަ ކުރަނީ "ގޯލްޑަން އިޔާ–ޓޫރިޒަމް 2022' ގެ ނަމުގައެވެ.
2022 ވަނަ އަހަރަކީ، ފަތުރުވެރިކަމުގެ ރަންޔޫބީލް ފާހަގަކުރާ އަހަރު ކަމަށްވާތީ، މިއަހަރު ކުލަގަދަ ގޮތެއްގައި ފާހަގަކުރުމަށް ގިނަ ހަރަކާތްތަކެއް ރޭވިފައިވާއިރު ރާއްޖޭގެ ފަތުރުވެރިކަމުގެ ސިނާޢަތު ރަމްޒުވާ ސިފަތައް ހިމަނައިގެންވަނީ ރަންޔޫބީލް އަހަރަށް ޚާއްސަ ލޯގޯއެއްވެސް މިހާރު ބޭނުން ކުރަން ފަށާފައެވެ. ރާއްޖޭގެ ފަތުރުވެރިކަން އިޝްތިހާރުކުރުމުގައި އަދި ރާއްޖެއިން ބޭރުގައި އޮންނަ އެކިއެކި ފެއަރތަކާއި ބައްދަލުވުންތަކުގައި މި ލޯގޯ ބޭނުންކުރާ ގޮތަށް ވެސް ވަނީ ހަމަޖައްސާފައެވެ.
ދުނިޔޭގެ ފަތުރުވެރިންގެ މެދުގައި އެންމެ މަޤްބޫލު އެއް ސަރަހައްދަކަށް ރާއްޖެ ވެފައިވާއިރު ރާއްޖޭގެ ފަތުރުވެރިކަން އިތުރު ހަރުފަތަކަށް ގެންދިއުމަށް ރިސޯޓްތަކާއި ކައިރި ރަށްރަށުގައި ހުންނަ އެއަރޕޯޓްތައްވެސް އިތުރަށް ތަރައްގީ ކުރުމުގެ މަސައްކަތާއި އިތުރު ސަރަހައްދުތަކުގައި އެއާޕޯޓް އެޅުމުގެ މަސައްކަތް ދަނީ ކުރެވެމުންނެވެ.
