އިސްލާމް ދީނުގައި ރިވެތި އަޚްލާގީ ސިފަތަކަކީ، ދެދުނިޔޭގެ ބާއްޖަވެރިކަން ލިބޭ، މަންފާހުރި، ސިފަތަކަކަށް ވީއިރު ބައެއް މުސްލިމުންގެ އުޅުމުން އެމާތް ސިފަތައް އެކަށީގެންވާ މިންވަރަށް ނުފެނެއެވެ.
ރިވެތި އަޚްލާގުގެ ސިފަތަކުގެތެރެއިން ކެތްތެރިކަމަކީ، ވަރަށްގިނަ އުނި ސިފަތަކުން ސަލާމަތްކޮށްދޭ ސިފައެކެވެ. ކެތްތެރިވުމަށް ކީރިތި ޤުރުއާނުގައި ވަރަށް ބޮޑަށް ބާރުއަޅުއްވާފައި ވެއެވެ.
ދުނިޔަވީ ހަޔާތަކީ އަބަދު އެއްގޮތަކަށް އޮންނަ އެއްޗެއް ނޫނެވެ. ބައެއް ފަހަރު ސިއްހަތު ސަލާމަތުން ހުންނައިރު، އަނެއްބައި ފަހަރު ބަލިމަޑުކަމާ ކުރިމަތިވެއެވެ. ބައެއްފަހަރު އަތްމަތި ތަނަވަސްކޮށް އުޅޭއިރު، އަނެއްބައި ފަހަރު ދަތިހާލުގައި އުޅެންޖެހެއެވެ.
ބައެއް ފަހަރު އަހަރެމެން ލޯބިކުރާ މުދަލާއި، ދަނޑުބިންތަކާއި ދަރިން އަހަރެމެންގެ ލޯމަތީގައި ސަލާމަތުން ހުންނައިރު، އަނެއްބައި ފަހަރު ދިމާވާ ކުއްލި ހާދިސާއެއްގައި ކުޑަ ހިނދުކޮޅެއްގެ ތެރޭގައި މި ހުރިހައި އެއްޗެއް ނެތި ފަނާވެދެއެވެ. ބައެއްފަހަރު ނުހަނު އަމާންކަމުގައި އުޅޭއިރު، އަނެއްބައި ފަހަރު ބިރުވެރިކަމާއި ނާމާންކަން ވެރިވެދެއެވެ.
" މިއިން ކޮންމެ ކަމަކީ، އަހަރެމެންނާ ކުރިމަތިވާ އިމްތިހާނެއް. އަހަރެމެންޖެހޭނީ އިމްތިހާނުތަކުން ފާސްވޭތޯ މަސައްކަތް ކުރަން. އެއީ އެކަންކަމަށް ކެތްތެރިވުން. މިފަދަކަމެއް ދިމާވާ ކޮންމެފަހަރަކު، އެއީ ކޮންމެވެސް މީހެއްގެ ފަރާތުން އައި ބަދުނަސީބެއް ކަމުގައި ހީކޮށް، އެ ފަރާތްތަކާ ދޭތެރޭގައި ހިތް ނުބައި ކުރުމަކީ، ރީތި އަދި ރަނގަޅު ގޮތެއް ނޫން".
އެކި ގޮތްގޮތަށް އަހަރެމެން އިމްތިހާނު ކުރައްވާނެކަމަށް ﷲ ތަޢާލާ އަންގަވާފައިވެއެވެ. އަދި އެގޮތުން އިމްތިހާނުކުރެވޭ މީހުން ކުރެ، ކެތްތެރިންނަށް އުފާވެރިކަމުގެ ޚަބަރު ދެއްވާފައިވެއެވެ. މުއުމިނުންނަކީ، މިދުނިޔޭގައި އެކިއެކި ދަތިތަކާ ކުރިމަތިކުރައްވައި، އިމްތިހާނު ކުރެއްވޭނެ ބައެކެވެ.
" ކެތްތެރިކަމާއެކީ އިއްފަތްތެރިވާން ވެސް ޖެހޭނެ. އަތްމަތި ދަތިވާ ވަގުތު ނުވަތަ ބަނޑުހައިހޫނުކަމެއް ކުރިމަތިވާ ކޮންމެ ފަހަރަކު، ތިމާގެ ބަސް މޮށުންތެރިކަމުގެ ކުޅަދާނަކަމާއި، ދައްކާ ހުއްޖަތުގެ ވަރުގަދަކަމުން އެހެން މީހުން، ނުހަނު ބުރަ މަސައްކަތުން ހޯދާފައި ހުންނަ ހަލާލު މުދާ ފޭރިގަނެ އަތުލުމަކީ، ނުވަތަ ވަގަށް ނެގުމަކީ، ހުއްދަވާނެ ކަމެއް ނޫން".
އިސްލާމް ދީނަކީ އެންމެ މާތް ދީންކަމުގައި އަހަރެމެން ބުނަމުން ގެންދާއިރު، އިސްލާމީ މުޖުތަމައުތަކުން މިއަދު މިފެންނަ އަޚްލާގީ މިންގަނޑުން ދަށް، ނޭދެވޭ ސިފަތަކަކީ، އިސްލާމް ދީނާ މެދު އެހެން މީހުން ޝައްކުގެ ނަޒަރަކުން ދުށުމަށް މަގުފަހިކުރުވައިފާނެ ކަންކަމެވެ. އެފަދަ ކަންކަން މި އިސްލާމީ މުޖުތަމައުގައި ހިނގިޔަ ދީގެން ނުވާނެއެވެ.
މައުލޫމާތު: ހުކުރު ޚުތުބާ
