ދުނިޔޭގެ މަޝްހޫރު ފެޝަން ބްރޭންޑްތަކަށް ބަލާލާއިރު، މަޝްހޫރު ޒާރާ ބްރޭންޑްގެ ނަން ބުނުމުން ނޭނގޭނެ މީހެއް މަދުވާނެއެވެ. ޒާރާ ބްރޭންޑަކީ މަދުން އާމްދަނީ ލިބޭ މީހާއަށް ގަންނަން އެންމެ އެކަށީގެންވާ ބްރޭންޑަކަށް ނުވި ނަމަވެސް، މިހާރަކަށް އައިސް މިބްރޭންޑް ބޭނުންކުރާ މީހުން ވަކި މަދެއްނޫނެވެ. ޒާރާއަކީ އަންހެން، ފިރިހެން އަދި ކުޑަކުދިންގެ ތަފާތު ވައްތަރުތައް ލިބެން ހުންނަ ބްރޭންޑެކެވެ. އަންނައުނާއި ފައިވާން ބޫޓް އަދި އަތްދަބަސްވެސް ހިމެނެއެވެ. ޒާރާ ބްރޭންޑަކަށްވެ ބާޒާރަށް ނެރުނުގޮތާއި ބެހޭ މައުލޫމާތު ކޮޅެއް މިލިޔުމުގައި ހިމަނާލާނަމެވެ.
ޒާރާ ބްރޭންޑަކީ ދުނިޔޭގެ އެންމެ ބޮޑު އަންނައުނު ރީޓެއިލް ކުރާ 'އިންޓިޑެކްސް'ގެ މައި ކުންފުނީގެ ގޮތްޕެކެވެ. ޒާރާއަކީ ސްޕެއިންގެ މަޝްހޫރު ބިލިއަނަރު އަދި ދުނިޔޭގައި 4 ވަނައަށް އެންމެ މުއްސަދި ވިޔަފާރިވެރިޔާ އަމަންސިއޯ އޯޓެގާގެ ބްރޭންޑެކެވެ. ޒާރާއަކީ 1963 ވަނަ އަހަރު ހެދުން ފެހުމަށްޓަކައި އުފެއްދި ފެކްޓްރީއިން އުފެދުނު ބްރޭންޑެކެވެ. އެންމެ 30 ޔޫރޯ ޚަރަދުކޮށްގެން ހުޅުވި ކުޑަކުޑަ ފިހާރައަށް ނަންދީފައިވަނީ 'ޒޯބާ އިން ލާ ކޮރުނާ' ގެ ނަމުންނެވެ.
ކުޑަ ދުވަސްކޮޅެއް ފަހުން މިތަނުގެ ނަން ޒާރާގެ ނަމަށް ބަދަލު ކުރެވުނެވެ. އޭރުގައި ނަން ބަދަލުކުރީ ބްރޭންޑަކަށް ހެދުމަކަށް ޚިޔާލުކޮށްގެނެއް ނޫނެވެ. އަދި މާބޮޑު ޕްލޭންއެއްވެސް އޮވެގެނެއްނޫނެވެ.
އެހެންނަމަވެސް މިވިޔަފާރި މަޑުމަޑުން ފުޅާވަމުންގޮސް އެހެން ގައުމުތަކުގެ މެދުގައި މަގުބޫލުވާން ފެށިއެވެ. އެންމެފުރަތަމަ ޕޯޗްގަލްއަށެވެ. ދެން އެއަށްފަހު 1990 ވަނަ އަހަރު އެމެރިކާގައި މިބްރޭންޑްގެ މަގުބޫލުކަން އިތުރުވެގެންގޮސް މުޅި ޔޫރަޕުގައި ވިދާލިއެވެ. މިއަދު މުޅި ދުނިޔޭގެ ހުރިހާ ގައުމަކަށް ބަލާލާއިރު 88 ގައުމެއްގައި 6500 ސްޓޯރު އެބަހުއްޓެވެ.
ޒާރާ ބްރޭންޑް މީހުންގެ މެދުގައި އެހާ މަޤްބޫލުވަނީ ކީއްވެ؟
ކޮންމެ މީހަކުވެސް ބޭނުންވާނީ ގަޔަށް ފަސޭހަ އަދި ގަޔަށް އަރާމު ފޮތީގެ ހެދުމެވެ. ހެދުމެއް ގަންނައިރު ގިނަ މީހުން ބަލާނީ ރީތިކަމާއި ފޮތީގެ އަރާމު ކަމަށެވެ. މިދެކަމަށް ބަލައިފިނަމަ ޒާރާއަކީ އެފަދަ ދެވަނައެއްނުވާ މިދެކަމަށްވެސް އެއްވަނައިގެ ބްރޭންޑެކެވެ. އަގުގެ ގޮތުން ބަލާނަމަ މެދު މިންވަރެއްގައި ހެދުމުގެ އަގު ހުންނަ އަދި ހެދުމުގެ ކޮލިޓީ އެހާމެ ރަނގަޅު ގިނަ ދުވަހަށް ގެންގުޅެވޭ އެއް ބްރޭންޑަށްވެސް ޒާރާ ވާނެ ކަމީ ޝައްކެއްވެސް އޮތްކަމެއް ނޫނެވެ.
މިބްރޭންޑަށް ލޯބި ޖެހިއްޖެ މީހަކީ މިބްރޭންޑް ދޫކޮށް އެހެން ބްރޭންޑަކަށް ބަދަލުވާން ބޭނުން ނުވާހާވަރަށް މިބްރޭންޑް ދެކެ ލޯބިވާ ބައެކެވެ. އެފަދަ މީހަކު ނަމަ ހެދުމެއް ހޯދަން ބޭނުންވެއްޖެނަމަ އެހެންތަނެއް ބެލުމެއްވެސް ނެތި ޒާރާއަށް ގޮސް އެލާން ބޭނުންވާ ހެދުން ގަނެލައެވެ. ޒާރާއަކީ ކޮންމެ އުމުރުފުރާއަކަށްވެސް ޑިޒައިންތައް ތައްޔާރުކޮށްފައި ހުންނަ އެއްތަނަކުން ފަސޭހައިން ވިޔަފާރިކޮށްލެވޭ ގޮތަށް ހަދާފައިވާ ތަނެކެވެ. އެކި ކުލަތަކާއި ތަފާތު ގިނަ ޑިޒައިންތަކުން ފުރާލާފައި އޮންނަ ޒާރާއަށް ވަދެލުމުންވެސް ލިބޭ ހިތްހަމަޖެހުން އޮންނަ ކަމަށް މިބްރޭންޑަށް ލޯބިކުރާ ގިނަ މީހުން ބުނެއެވެ.
ޒާރާ ބްރޭންޑްގެ ފަހަތުގައި ފޮރުވިފައިވާ ސިއްރާއި ކާމިޔާބީ:
މިބްރޭންޑްގެ އެންމެބޮޑު ކާމިޔާބީއެއްގެ ގޮތުގައި ފާހަގަކުރެވެނީ، ހަފްތާއަކު އެއްފަހަރު ނުވަތަ ދެހަފްތާއިން އެއްހަފްތާ އަބަދުވެސް ފެޝަނަށް ބަދަލު އަންނަކަމެވެ. މިއާއި ޚިލާފަށް އެހެން ބްރޭންޑްތަކުން އައު ފެޝަންތައް ނެރެނީ އަހަރަކު އެއްފަހަރު ނުވަތަ ދެފަހަރުއެވެ. ޒާރާގެ އަނެއް ކާމިޔާބީއަކީ ސްޓޯރުގައި އެހާބައިވަރު ނުބަހައްޓައި އެއްޗެހި ވިއްކުމެވެ. އަލަށް ނިކުންނަ ކޮންމެ ފެޝަނެއްވެސް 4 ހަފްތާއަށްވުރެ ގިނަ ދުވަހަށް ދެމިގެންދާނީ މަދުފަހަރަކުއެވެ.
ކަސްޓަމަރުން އަބަދުވެސް ތިބޭނީ އައު ފެޝަނެއް ނެރޭނެ ކަމުގެ އިންތިޒާރުގައެވެ. އަދި ހަމަ ނެރުމާއިއެކު އެގަންނަޖެހޭ ސަބަބެއްވެސް އޮވެއެވެ. އެއީ، އެވަގުތު ލިބެންހުންނަ ސްޓޮކް ފަހުން ނުލިބިދާނެތީއެވެ. ސްޓޯރކުރަންދާ ޚަދަރު ކުޑަކޮށް އަބަދުވެސް އައު ފެޝަންތަކަށް އިސްކަންދީގެން ކުރިއަރައިފައިވާ ޒާރާގެ ތަފާތު ކަމަކީ މިއެވެ.
ޒާރާގެ އުފެއްދުންތައް އަބަދުވެސް އުފައްދަނީ ކަސްޓަމަރުންގެ ރަހަތަކާއި އެއްގޮތަށެވެ. ކަސްޓަމަރުންގެ ޚިޔާލާއި އެމީހުންގެ ފަރާތުން ލިބޭ މައުލޫމާތުގެ މައްޗަށް ބިނާކޮށް އުފައްދައިގެން ކުރިއަށް ދިއުމަށް ލޯބިކުރެއެވެ. ކަސްޓަމަރުން ބޭނުންވާ ކަހަލަ ސްޓައިލްތަކަށް ޑިޒައިން ތައްޔާރުކުރަން ބޭނުންވާބަޔަކަށް ވުމުން ލިބޭ ހިތްހަމަޖެހުމާއި ފައިދާވެސް ބޮޑެވެ. އިޝްތިހާރުކުރުމަށްދާ ޚަރަދުވެސް ކުޑައެވެ. ސަބަބެއްވެސް ނެތިއެއް ނޫނެވެ. ކަސްޓަމަރުންގެ ހިތްއަތުލައި ލޯބި ހޯދުމަށްފަހު އުފެއްދުންތައް އުފައްދައިގެން އެކަކު އަނެކެއްގެ އަނގައިންގޮސް އެއޮތީ އިޝްތިހާރުވެސް ކުރެވިފައެވެ. މިއަށްވުރެ ފަސޭހަ ޚަރަދުކުޑަގޮތެއް ހަމަގައިމުވެސް ނެތެވެ. މިބްރޭންޑަކީ ދުނިޔޭގައި އެއްވަނައަށް އެންމެ ބޮޑު ފެޝަން ރީޓެއިލާއެވެ. މިބްރޭންޑުގެ ފައުންޑަރއަކީ ދުނިޔޭގެ ފެންވަރުގައި ފާހަގަކޮށްލެވޭ ކުޅަދާނަ ބޭފުޅެެކެވެ.
މައުލޫމާތު: މީޑިއަމް ޑޮޓްކޮމް
