ބުނެދޭގޮތުގައި އަވަށްޓެހިންނަކީ އެޒަމާނުގައި ބައެއްކަހަލަ ކަންވެރިން ނުވަތަ ކުޅަދާނަ މީހުން ގެންގުޅުނު އެމީހުންގެ ގާތް ބައެކެވެ. މިފަދަ އަވަށްޓެހިން އުޅޭ ނުވަތަ ގެންގުޅޭ ގޭގޭގައި ރޭގަނޑު ވަކިދަމެއްގެ ފަހުން ތަޅަންމަތިފަރާތަށް ކޮންމެ ކޮންމެ މީހަކަށް ނުދެވޭނެއެވެ. އެގެއެއްގެ ވެރިފަރާތުން އޮންނާނީ އެކަން މަނާކޮށްފައެވެ.
ބުނެފައި އޮންނަނީ އެވަގުތުތަކުގައި އެފަރާތުގައި އަވަށްޓެހި ކުއްޖާ ނުވަތަ މީހާ އުޅޭނެކަމަށާއި އެފަރާތަށް ނުކުމެއްޖެނަމަ ރުޅިއައިސްގެން ކޮންމެފަދަ ގެއްލުމެއްވެސް ދީފާނެ ކަމުގައެވެ. ނަތީޖާއެއްގެ ގޮތުން އެފަދަ ގޭގޭގައި އެއްވެސް މީހަކު އެއަމުރާއި ޚިލާފެއް ނުވާނެއެވެ. ގަންނާކުރައްވާ ބިރުން އެފަރާތަށް ނުކުމެހަދާކަށް ނުވެސްކެރޭނެއެވެ.
އެކަކު އޭނާގެ މުނިކާފަ އަވަށްޓެއްސެއް ގެންގުޅުނުކަމުގައި ކިޔައިދިނެވެ. އޭނާ ކިޔައިދިންގޮތުގައި އޭނާގެ އުމުރުން އަށެއް ނުވައެއް ހާތާނގައި މުނިކާފާގެ އެވާހަކަތައް ވަނީ އަޑުއިވިފައެވެ. ރޭގަނޑު ތަޅަންމަތިފަރާތަށް އެގޭ އެކަކުވެސް ނުނިކުންނަކަމަށާއި އެގޭ ބަދިގެފަރާތުގެ ބައެއް މަސައްކަތްތައް އިރުއަރާއިރު ހުންނަނީ ކޮށްނިމިފައި ކަމަށް ބުންޏެވެ.
މިފަދަ ކަންކަމުގެ ތެރޭގައި ހިމެނެނީ ކޮންކަމެއްތޯ އަހާލުމުން ބުނީ މަސްވެސް ގެނެސް ބަދިގޭގައި ބާއްވާފައި އޮންނަނީ ކަމަށާއި ދެން ރޭގަނޑު އަށެއް ނުވައެއް ޖަހާލީމަ އެންމެން ނިދަން އުޅޭއިރު މުނިކާފަ އެފަރާތަށް ނުކުމެ "އެމަސް ކައްކާލައްޗޭ" ބުނެލާކަމަށެވެ. ބައެއް ރޭރޭ އެފަރާތަށް ނުނިކުމެ އެވާހަކަ އިވޭވަރަށް ގޮވާލާކަމަށްވެސް ބުންޏެވެ. ދެން ގޭތެރޭ ތިބޭއިރު ބަދިގެފަރާތުގައި އެމަސައްކަތް ކުރާއަޑުވެސް އިވޭކަމަށް އޭނަ ބުންޏެވެ. މަސްގޮނޑިމަތީގައި މަސްކަނޑާ އަޑާއި ވަޅުން ފެންނަގައިގެން ތެއްޔަށް އަޅާ އޮއްސާ ހަދާއަޑު އޭނާ އަހާ ކަމަށް ކިޔައިދިނެވެ. ހެނދުނު ވާއިރު ހުންނަނީ ގަރުދިޔަކައްކާ ދީފަޔޯލައެވެ.
ފާހަގަކުރެވޭ އެއްކަމަކީ މަހުގެ ކަށިފަތި ނޯންނަކަން ކަމުގައި ބުންޏެވެ. އޭނާ ބުނަނީ މުނިކާފަ ބުނާގޮތުގައި އަވަށްޓެހިމީހާ އެ ކަށިފަތި ގެންދަނީއެވެ. ހަނދާން ހުންނަންފެށި އިރުއްސުރެ އެގޭގައި ކަންތައް ހުރީ އެހެންކަމުގައި ބުނެއެވެ. ބައެއް އެހެންކަހަލަ ކަންކަންވެސް މުނިކާފަ އެއަވަށްޓެހި މީހާ ލައްވާ ކުރުވާކަމަށް އޭނާ ބުނެއެވެ. ގަހެއް ވެއްޓި، އެކަހަލަ ކަމެއްވިޔަސް އެގަހެއް ނަގާ އެތަން ސާފުކޮށްދޭކަމަށް ބުންޏެވެ.
ކޮންމެކަމެއްވެސް ކުރަން ބުނާނީ މުނިކާފަ ކަމަށާއި އެހެން އެއްވެސް މީހަކު އަވަށްޓެހި މީހާ އާއި ވާހަކަދައްކާ ހަދާކަށް ނުއުޅޭނެއޭ ބުނެއެވެ. ދެން މުނިކާފަ ނިޔާވުމުން އޭނާގެ ބައްޕަ އެކަންކުރަން އުޅުނު ކަމަށާއި އެކަމަކު އެއްވެސް ކަމެއް އެގޮތަކަށް ނުވިކަމަށް ކިޔައިދިނެވެ. އެކަމަކުވެސް އެތައް ދުވަހެއްވަންދެން އެފަރާތަށް ރޭގަނޑު އެކަކަށްވެސް ނުކުންނަން ނުކެރި ތިބިކަމަށް ބުންޏެވެ. މުނިކާފަ ނިޔާވިފަހުން ދުވަސްކޮޅެއްވަންދެން ރޭގަނޑު އެގަޑީގައި ތަޅަންމަތިފަރާތުން ބައެއްކަހަލަ އަޑުއަޑު އިވުނުކަމަށާއި އެހެން އެއްވެސް ކަހަލަ އުނދަގުލެއް ކަމެއް ނުވާ ކަމުގައި ކިޔައިދިނެވެ. ކޮންމެއަކަސް އަވަށްޓެހިންނަކީ އުޅުނު ބައެއް ކަމުގައި އޭނާގެ ބަހުން ސާބިތު ކޮށްދިނެވެ.
މިކަހަލަ ކަންކަމުގައި ވާހަކަދައްކާ ގޮތްކިޔާހަދާ ބައެއް މީހުން ބުނާގޮތުގައި:
އޭނާގެ އެވާހަކައަކީ ކަނޑައެޅިގެން ދޮގެކޭ ބުނެވޭކަށްނެތެވެ. ސަބަބަކީ ޖިންނީންގެ ބައެއް ވައްތަރަކީ އެގޮތަށް ގޭގޭގައި އުޅޭއެއްޗެއް ކަމަށް ވާތީއެވެ. އަދި އެކިކަހަލަ ކަންކަން ދިމާވެ ބައެއް މީސްމީހުންނާއި ވަކިކަހަލަ ގުޅުން އުފެދިފައި ވުމަކީވެސް ނުވާކަމެއް ނޫނެވެ. އަދި އެފަދަ އެއްޗިއްސަކީ އަނދިރިކަމާއި ފަޅުކަމަށް ލޯބިކުރާ އެއްޗެތިކަމުގައިވާތީ އެޒަމާނުގައި އެފަދަ ފުރުސަތުތައް ތަނަވަސްވެފައި އޮވެދާނެއެވެ. ދެން އޮތް އަނެއްގޮތަކީ އޭނާގެ އެ މުނިކާފަ ފަދަ މީސްމީހުންނަކީ އެޒަމާނުގައި ތިބި ވިސްނުންތޫނު ކުޅަދާނަ މީހުންކަމުގައި ވުމެވެ.
ނަތީޖާއެއްގެ ގޮތުން އެމީހުން ބޭނުންވާ ބައެއްކަހަލަ ކަންކަން ކޮށްލުމުގައި މޮޅެތި އުކުޅުތަކުގެ ބޭނުންކުރަނީއެވެ. އެގޮތުން އަވަށްޓެހިންނަކީ ހަމަ އިންސާނުންކަމުގައި ވުމަކީވެސް އެކަށީގެންވާ ކަމެކެވެ. ވަކިން ޚާއްސަކޮށް އަނބިމީހާ އަށް ނާންގާ ސިއްރުން ގެންގުޅޭ އެހެން އަންހެނަކަށް ވުމަކީވެސް ދުރުކަމެއް ނޫނެވެ. އެހެންކަމުގައިވާނަމަ ތަޅަންމަތިފަރާތަށް އެހެން އެއްވެސް މީހަކު ނުކުމެ ނޫޅެވޭފަދަ ބިރުވެރި އެހެނަސް ތަފާތުކަމެއް އުފައްދާފައި އެއަށް އަވަށްޓެހިންގެ ނަންދީފައި އޮތުމަކީވެސް ވަރަށް ގާތް ކަމެކެވެ.
އެފަދަ ބައެއް އެހެން މީހުންގެ ނަޒަރުގައި އަވަށްޓެހިންގެ ވާހަކައަކީ ވެސް އިހުޒަމާނުގެ ފުލޯކު ދޮގު ވާހަކަތަކުގެ ތެރޭގައި ހިމެނޭ ވާހަކަތަކެކެވެ. އޭގައި އެއްވެސް އަސްލެއް އުރަތްޕެއް ނެތް ކިޔައިދިނުންތަކެކެވެ. އެއީވެސް 'ރަންނަމާރި' އާއި 'ބާއޮކަލޯ' ވާހަކަފަދަ ވާހަކަތަކުގެތެރޭގައި ހަނދާންނައްތާލަންޖެހޭ އެއްޗެކެވެ.
ކޮންމެއަކަސް އިހުގައި ކިޔައި އުޅުނު މިފަދަ ވާހަކަތަކަކީ އޭގައި ކޮންމެވެސް ކަހަލަ އަސްލުތަކެއްވެސް އެކުލެވިފައިވާ ވާހަކަތަކެއް ކަމުގައި ނޫނީ ގަބޫލުކުރަން ފަސޭހައެއް ނޫނެވެ. ސައިންސަށް ވެސް ނުފެންނަ ސިކުނޑިތަކަށް ވިސްނައިގަތުން ދަތި އެތައްއެތައް ކަމެއް މިދުނިޔޭގައި އެބަވާކަން ޔަގީންކުރެވޭއިރު މިފަދަ ވާހަކަތަކަކީ ކަނޑައެޅިގެން ދޮގޭ ބުނެލުމަކީ ކޮށްގެންވާނެކަމެކޭ ބުނާނެ ޖާގައެއް ނެތެވެ.
ނޯޓް: މިއީ ކަނީރު އަބުދުއްރަހީމް ލިޔުއްވައިފައިވާ ވާހަކައެކެވެ. އަސްލު ނުގެއްލޭގޮތަށް ކުދިކުދި ބަދަލުގެނެވިފައިވާނެއެވެ.
ކިޔުންތެރިންގެ ހިޔާލު
ތިޔައީ ވަގަށް ގެއަށް ދަންވަރު އަންހެންކުދިން ގެނެސް ….. ޖަހާފަ ހުންނަ މަޅި މޮޅު ވާހަކަ ދައްކައިގެން… ހުސް ރަންނަމާރި ޒާތުގެ ވާހަކަ..
ކޮމެންޓްސް ބަންދުކުރެވިފައި