މިއީ، މީގެ 24 އަހަރު ކުރިން ހިނގާފައިވާ ހާދިސާއެކެވެ. މިހާދިސާގައި ބޭނުންކޮށްފައިވާ ނަންތަކަކީ އަސްލު ނަމެއް ނޫނެވެ. ދެ ކޮއްކޮއާއިއެކު އެއްކޮޓަރިއެއްގައި އައިޝާ އޮތީ ނިދާފައެވެ. އައިޝާގެ އެނދު ހުރީ ގޭގެ އެތެރެއަށްވާ ގޮތަށް ހުރި ކުޑަދޮރު ކައިރީގައެވެ. އަނެއް ދެކޮއްކޮ ނިދާފަތިބީ ކޮޓަރީގައި ދެންހުރި ދެ އެނދުގައެވެ.
އައިޝާގެ އެނދު ކައިރީގައި ހުރި ކުޑަދޮރުގައި ދޮރުފަތެއް ނުހުރެއެވެ. ހުންނަނީ ހަމައެކަނި ތޭރި ޖެހުމަށްފަހު ދޮރުފޮތި ދަމާފައެވެ. ގަދަނިދީގައި ނިދާފައި އޮތް އައިޝާއަށް ސިއްސައިގެން ގޮސް ހޭލެވުނެވެ. ހޭލެވުނުއިރު ކުޑަދޮރުގެ ދޮރުފޮތިގަނޑު ހުރީ ކުޑަކޮށް އެއްފަރާތަށް ކެހިފައެވެ. އެވަގުތު ގޭތެރެއިން ކުޑަދޮރު ކައިރިއަށް ވާގޮތަށްހުރި ކަޅު ބިޔަ މީީހެއްގެ ހިޔަންޏެއް އައިޝާއަށް ފެނުނެވެ.
ބާރަށް ހަޅޭއް ލަވައިގަންނަން ކުރި މަސައްކަތް ވީ ބޭކާރެވެ. ގަނެފަހުރި ބިރެއްގެ ސަބަބުން އައިޝާ އަށް ދުވެފަ ކޮޓަރިން ނުކުމެވުނު ގޮތެއްވެސް ނޭނގުނެވެ. ދުވެފަގޮސް ޖެހިގަނެވުނީ އައިޝާގެ މަންމަ ނިދާފަ އޮތް ކޮޓަރީގެ ދޮރުގައެވެ. އެވަގުތު މަންމަ ނިދާފައޮތް ކޮޓަރީގެ ބޮކިތަޅައިގެން ދިޔައެވެ. ބޮކި ހަރުކޮށްފަހުރީ އެކޮޓަރީގެ ދޮރާއި ދިމާލަށް މަތީގައެވެ. އައިޝާގެ މަންމަ އެވަގުތު ދޮރު ހުޅުވިއެވެ. އަދި ވެގެންއުޅޭގޮތް ބިރުންހުރި އައިޝާ މަންމައަށް ކިޔައިދިނެވެ. މިއަދާއި ހަމައަށްވެސް މިހާދިސާ އައިޝާގެ ހިތުން ފިލައިގެން ނުދެއެވެ. އަދި އަދަށްދާންދެން ވެސް އެކަނި ރޭގަނޑު ބޭރުގައި އުޅެންވެސް އައިޝާ ބިރުގަންނަ ކަމަށްވެއެވެ.
