ދުލުގެ އާފާތްތަކުގެ ތެރޭގައި ދޮގު ހެކި ދިނުމާއި ދޮގު ހުވާ ކުރުން ހިމެނެއެވެ. ﷲ ގެ ހަޟްރަތުން އެމީހަކަށް ލިބިފައިވާ ހެކި ވަންހަނާކޮށްފި މީހަކަށްވުރެން އަނިޔާވެރިކަން ބޮޑު މީހަކު ނުވެއެވެ. ކީރިތި ރަސޫލާ ﷺ އެކަލޭގެފާނުގެ ސަހާބީންގެ އަރިހުގައި އިންނަވާފައި ޙަދީޘް ކުރެއްވި ބަސްފުޅެއްގެ މާނައިގައިވެއެވެ. " ބޮޑެތި ފާފަތަކަކީ ކޮބައިކަން ތިޔަބައި މީހުންނަށް ތިމަންކަލޭގެފާނު ބަޔާންކޮށްދެއްވަން ހެއްޔެވެ؟" މިހެން އެކަލޭގެފާނު ތިން ފަހަރު ޙަދީޘް ކުރެއްވިއެވެ.
ސަޙާބީން ދެންނެވިއެވެ. އާދޭހެވެ. އޭ ﷲ ގެ ރަސޫލާއެވެ. ވިދާޅުވެދެއްވާށެވެ. ރަސޫލާ ﷺ " މާތް ﷲ އާ ޝަރީކު ކުރުމާއި، މައިންބަފައިންނަށް އުރެދުމެވެ". (އެހެން އެކަލޭގެފާނު ޙަދީޘް ކުރެއްވިއިރު) އިންނެވީ ލެނގިވަޑައިގެންނެވެ. ދެން ރަނގަޅަށް އިށީނދެ ވަޑައިގަތުމަށްފަހު ރަސޫލާ ﷺ ޙަދީޘް ކުރެއްވިއެވެ. " ދޮގު ވާހަކަ ދެއްކުމާއި، ދޮގު ހެކި ދިނުމެވެ". ކީރިތި ރަސޫލާ ﷺ އެބަސް ތަކުރާރުކޮށް ވިދާޅުވަމުން ގެންދެވިއެވެ. އެއީ އަހަރެމެން އެކަލޭގެފާނު އެބަސްފުޅު ވިދާޅުވުން ހުއްޓަވާލައްވާނޭނަމަ، ރަނގަޅޭ ހިތަށް އަރައްޖައުމަށް ދާންދެނެވެ.
ދޮގު ހެކި ދިނުމުގެ ސަބަބުން ފޫނުބެއްދޭ ފަދަ ބޮޑެތި ގެއްލުންތައް ލިބެއެވެ. އެކަންތައްތަކުގެ ތެރޭގައި ޤާޟީއަށް ޙައްޤު އޮޅި ބާޠިލަކީ ޙައްޤުކަމުގައި ހީވުމާއި، އޭގެ ސަބަބުން އެހެން މީހުންގެ ޙައްޤުތައް ގެއްލިގެން ދިއުމާއި، މުޖުރިމުން ކުށުން ބަރީއަވުމާއި، ކުށެއް ނެތް މީހުންނަށް ޙައްޤަކާނުލައި އަނިޔާ ލިބުން ހިމެނެއެވެ. މާތް ﷲ ގެ ޙުރުމަތްތަކަށް އަރައިގަނެވި ދީނާ މެދު ޙައްޤު ނޫން ބަސްތައް ބުނެވެއެވެ.
ދުލުގެ އާފާތްތަކުން ރައްކާތެރިވުމަށް ބާރު އަޅުއްވައި، ކީރިތި ރަސޫލާ ﷺ ގެ އަރިހުން އަބޫ ހުރައިރާ ރަޟިޔަﷲ ޢަންހު ރިވާ ކުރައްވާފައިވާ ބަސްފުޅެއްގެ މާނައިގައިވެއެވެ. " ތިޔަބައިމީހުން ޙަސަދަވެރި ނުވާށެވެ! ތިޔަބައި މީހުން މަކަރު ހަދައި އޮޅުވައި ނުލާށެވެ! އަދި ރުޅި ނާންނާށެވެ! އަދި ފުރަގަސް ނުދޭށެވެ! އަދި ތިބާގެ އަޚާގެ ވިޔަފާރިއަށް ގެއްލުންވާ ގޮތަށް ވިޔަފާރި ނުކުރާށެވެ! އަދި މާތް ﷲ އަށްޓަކައި ތިޔަބައިމީހުން އަޚުންތަކެއް ކަމުގައި ވާށެވެ! އެއް މުސްލިމަކީ އަނެއް މުސްލިމެއްގެ އަޚެކެވެ. އޭނާ އޭނާގެ އަޚާއަށް އަނިޔާވެރިއެއް ނުވާނެއެވެ. އަދި ދެރަކޮށް ނިކަމެތިކޮށެއް ނުލާނެއެވެ. ތަޤްވާވެރިކަން ވަނީ މިތާނގައެވެ. މިހެން ތިން ފަހަރު ޙަދީޘް ކުރައްވައި އެކަލޭގެފާނުގެ މޭފުޅާ ދިމާލަށް އިޝާރާތް ކުރެއްވިއެވެ".
