މާތް ﷲ އަށްޓަކައި މުސްލިމުން އަދާކުރަންޖެހޭ އަޅުކަން ސައްހަވަނީ ދެޙަދަޘުން ޠާހިރުވެ ސާފުތާހިރުކަންމަތީ ހުރެ އެއަޅުކަން އަދާ ކުރުމުންނެވެ. ސާފުތާހިރު ތަނެއްގައި ހުރެ އެއަޅުކަން އަދާކުރުމުންނެވެ. ސާފުތާހިރު ފޭރާމެއްގައި އެ އަޅުކަން އަދާ ކުރުމުންނެވެ. ސާފުތާހިރު ކަމަކީ އީމާންކަމުގެ އެއްބައެވެ.
ކީރިތި ރަސޫލާ ﷺ ސުންނަތުގައި ސާފުތާހިރުކަމަށް ވަރަށް ބޮޑަށް ބާރު އަޅުއްވާފައިވެއެވެ. އިންސާނާ ސާފުތާހިރު ވުމަށްޓަކައި ސާފު ރީތި ފޭރާންލުމަކީ މުހިންމު ކަމެކެވެ. އެހެންނަމަވެސް އެފޭރާމުގެ ސަބަބުން އޭނާ ކަންދެއްކުމާއި ބޮޑާކަމުގެ ޝިކާރައަކަށް ވެގެންނެއް ނުވާނެއެވެ. މާތް ނަބިއްޔާ ﷺ ޙަދީޘް ކުރައްވާފައިވެއެވެ. މާނައީ: " އެމީހެއްގެ ހިތުގައި ބޮޑާކަމުގެ ޒައްރެއްގެ މިންވަރުވެސް ވާ މީހާ ސުވަރުގެ ނުވަންނާނެއެވެ".
މުސްލިމުން މާތް ﷲ އަށްޓަކައި، އަދާކުރަންޖެހޭ އަޅުކަމުގައި ސާފުތާހިރުވެ ހުރުމަކީ، ޝަރުތު ކުރެވިގެންވާ ކަމެކެވެ. އަޅުކަމަކީ އިންސާނާއަށް ރޫޙާނީ ސާފުތާހިރުކަމެއް ގެނެސްދޭ ކަމެކެވެ. އަދި ބޭރުފުށުން އޭނާގެ ހަށިގަނޑާއި ފޭރާމާއި، އަޅުކަންކުރާ ތަން ނަޖިހުން ތާހިރުކޮށް، އަޅުކަންކުރުމަކީ، ލާޒިމުވެގެންވާ ކަމެކެވެ. އަޅުކަން ކުރާ ތަންތަނަށް ވަންނަ އިރުގައްޔާއި އަޅުކަމުގައި ސާފުތާހިރުވުމަކީ ކީރިތި ޤުރުއާނުގައި އަމުރު ކުރައްވާފައިވާ ކަމެކެވެ. އަޅުކަންކުރުމުގައި ކަނޑައަޅުއްވާފައިވާ ކަންކަމުގެ ތެރޭގައި ޖުނުބުވެރިކަމުން ތާހިރުވެ ހިނައިގަތުމާއި، ވުޟޫ ކުރުން ހިމެނެއެވެ.
ފަރުދީ ސާފުތާހިރުކަން، ނުވަތަ ޝަޚުޞީ ސާފުތާހިރު ކަމަކީވެސް އިސްލާމްދީން ވަރަށް ބޮޑަށް ބާރު އަޅުއްވާފައިވާ ކަމެކެވެ. މިގޮތުން ނިޔަފަތި ކެނޑުމާއި، ކިހިލި ފަށްދަށުން އިސްތަށި އުފުރުމާއި، މަތިމަސް ކުރު ކުރުން ފަދަ ކަންކަމަކީ ޝަޚުޞީ ސާފުތާހިރުކަމުގެ ތެރޭގައިވާ ކަންކަމެވެ.
ކުޑަކަމުދާ ހިނދު ގަޔަށް ބުރައިގެންނުދާ ގޮތަށް ކަޑަކަމު ދިއުމާއި، ކުޑަކަމު ދިއުމަށްފަހު ތާހިރުވުމަށް އިސްލާމް ދީން އަމުރު ކުރައްވާފައިވެއެވެ. އަދި ކުޑަކަމު ދިއުމަށްފަހު ރަނގަޅަށް ތާހިރުނުވާ މީހުންނަށް ކަށްވަޅުގެ ޢަޛާބު ލިބޭނެކަން ކީރިތި ރަސޫލާ ﷺ ޙަދީޘް ކުރައްވާފައިވެއެވެ. ހުރިހާ ހާލަތެއްގައިވެސް ސާފުތާހިރުކަމަށް ސަމާލުކަން ދިނުމަކީ އިސްލާމީ ޘަޤާފަތުގެ ތެރެއިންވާ ކަމެކެވެ. މަގުމައްޗަށާއި، ހިޔާލިބޭ ގަސްގަހުގެ ދަށަށާއި، މީހުން ހިނގާ ބިނގާވެ އުޅޭ ތަންތަނަށް ކުޑަކަމު ދިއުމާއި، ޤަޟާޙާޖަތް ކުރުމާއި ކުޅު ޖެހުންފަދަ ކަންކަމަކީ އިސްލާމްދީނުގައި ނަހީ ކުރައްވާފައިވާ ކަންކަމެވެ.
ތިމާގެ ހަށިގަނޑާއި ފޭރާމާއި، ދިރިއުޅޭ ވެށީގެ ސާފުތާހިރުކަމަކީ އަޅުކަން ޤަބޫލުވުމާއި، މާތް ﷲ ގެ ރުއްސެވުމާއި، އެކިއެކި ބަލިމަޑުކަމުން ރައްކާތެރިވުމުގެ ވަސީލަތެކެވެ. އަދި ސާފުތާހިރުވުމަކީ، މާތް ﷲ އާއި އެކަލާނގެ ރަސޫލާ ﷺ އަމުރުކުރައްވާފައިވާކަމެކެވެ.
ފެން ނުލިބިގެން ނުވަތަ އެހެން ސަބަބަކާހުރެ ވިޔަސް، ހިނައިގަތުމަށާއި، ވުޟޫ ކުރުމަށް ފެން ބޭނުންކުރުމަށް ނުކުޅެދިގެންވާ މީހުން ވެސް ނަމާދު ކުރުމާއި ޠަވާފުކުރުމަށް ޠާހިރުވުމަށް އިސްލާމް ދީނުގައި އަންގަވާފައިވެއެވެ. އެއީ ތަޔައްމުމު ކުރުމެވެ. މިކަމުން ދޭހަވަނީ އިސްލާމް ދީނުގައި ސާފުތާހިރުކަމަށް ދެއްވާފައިވާ މުހިއްމުކަމެވެ.
މައުލޫމާތު: ހުކުރު ޚުތުބާ
