ކުރިއަށް މިއޮތް ހަފްތާގެ ތެރޭގައި، އިސްލާމީ އުއްމަތް ހިޖުރީ އައު އަހަރަކާ އިސްތިޤްބާލު ކުރާނެއެވެ. މިކަން ގުޅެނީ ކީރިތި ރަސޫލާ ﷺ މައްކާއިން މަދީނާއަށް ކުރެއްވި ހިޖުރައިގެ ހާދިޘާއާއެވެ. އެ ހިޖުރައިގެ ސަބަބުން އިސްލާމީ ދަޢުވަތު އައު ފަތިހަކަށް އަލިވިލުނެވެ. މުސްލިމުން، މަދު މީސްކޮޅަކުން ބޮޑު އުއްމަތަކަށް ބަދަލުވިއެވެ. އެއުރެންނީ ޤަދަރުވެރި ޢިއްޒަތްތެރި ބަޔަކަށް ވިއެވެ. މައްކާގައި އަމާންކަމެއް މިނިވަންކަމެއް ނެތި ތިބުމަށްފަހު ﷲ ނޫން އެހެން ފަރާތެއް ދެކެ ބިރު ނުގަނެ އަޅުކަން ކުރުމުގެ މިނިވަންކަމާއި އަމާންކަން، މަދީނާގައި ލިބުނެވެ. އަމިއްލަ ނަފްސު ހިމާޔަތް ކުރެވޭނެ ގޮތެއް ނެތިފައި ތިބުމަށްފަހު އެމީހުންނަށް ގޮންޖަހާ ކޮންމެ ބާރަކާ ކުރިމަތިލުމުގެ ޤާބިލުކަން ލިބުނެވެ.
ހިޖުރައަކީ އިސްލާމީ ދައުލަތުގެ ފެށުމެވެ. މުސްލިމުންނަށް ނަސްރާއި ނަޞީބު ލިބެން ފެށީ، މަދީނާގައި މުސްލިމުންނަށް ހަމަޖެހުން ލިބުމުންނެވެ. ހިޖުރައިގެ ވާހަކައަކީ މުނިފޫހިފިލުވުމަށްޓަކައި ކިޔާލަން ޖެހޭ ވާހަކައެއް ނޫނެވެ. އެހެނަސް އެއީ ޖާހިލުކަމާއި، ކުފުރުގެ ރާޅުތަކުން އުދަ އަރަމުން ދިޔަ ސަހަރާއެއްގެ މެދުތެރޭގައި މުސްލިމުންނަށް ވަޠަނެއް ޤާއިމުކޮށްދިން ހާދިޘާއެވެ.
" ހިޖުރައަކީ ހަނަފަސް ބިމެއްގައި، ކާބޯތަކެތީގެ ދަތިކަމާ ހުރެ، މޮޅު ބިމެއް އޮތް ރަށަކަށް މީހަކު ކުރި ދަތުރެއް ނޫން. ނަބަވީ ހިޖުރައަކީ ޙައްޤާއި ބާޠިލުގެ އިންފާރު. އަނިޔާވެރިކަމާއި، ޢަދުލުވެރިކަމުގެ އިން. ޙައްދުފަހަނައަޅައި ދިޔުމާއި ސަމާޙަތު ވަކިކޮށްދިން ރޮނގު. އެއީ ވަރުގަދަ ޢަޒްމަށާއި ޤުރުބާނީއަށާއި ހޭދަކުރުމަށް ހުޅުވާލެވުނު ދޮރެއް. ހިޖުރައަކީ ރަސޫލާ ﷺ އާއި އެކަލޭގެފާނުގެ މާތް ޞަޙާބީން މި ދީނަށްޓަކައި ވެވަޑައިގެންނެވި ބޮޑު ޤުރުބާނީއެއް. އެބޭކަލުންގެ ޢަޤީދާގެ މިނިވަންކަމަށްޓަކައި ގޮވަތިގެދޮރާއި މުދަލާއި އަނބިދަރީން ޤުރުބާން ކުރެއްވި".
ކީރިތި ރަސޫލާ ﷺ ގެ ހިޖްރައަކީ ފިލާވަޅުތަކާއި ޢިބްރަތްތަކުން ފުރިގެންވާ ހާދިޘާއެކެވެ. މި ހާދިޘާއިން ފެންނަ ކޮންމެ މީހަކީ ވަރުގަދަ ބަޠަލެކެވެ. މާތް ރަސޫލާ ﷺ ގެ ނަބަވީ ހިޖްރައަކީ ފިކުރީ އަދި ސުލޫކީ މަދްރަސާއެކެވެ. ދުނިޔޭގެ ތާރީޚަށް ބިނާކުރަނިވި އިންޤިލާބެއް ގެނައި މި ޙާދިޘާއަށް ފުންކޮށް ދިރާސާކުރަން ވަނީ ޖެހިފައެވެ. މި ދީނުގެ ރިސާލަތު ރަނގަޅަށް ދޭހަކުރުމަށްޓަކައެވެ. ހަޔާތުގައި މިރިސާލަތުގެ ދައުރު ދެނެގަތުމަށްޓަކައެވެ. ނަބަވީ ހިޖްރައިގެ ޙާދިޘާއިން ފެންނަނީ މާތް ﷲ އަށް ފުރިހަމައަށް އިތުބާރު ކުރާ އުޖާލާ ކުރިމަގަކަށް އިންތިޒާރުކުރާ އުއްމީދުން ފުރިގެންވާ މުއުމިނުންގެ މަލަތަކެވެ.
ހިޖުރައިގެ މަދަރުސާއިން ކިޔަވަންޖެހޭ މާއްދާތަކުން ލިބޭ ތަމްރީނުތަކަކީ އަހަރެމެންގެ ދަރިންނަށް އެމީހުންގެ މަސްއޫލިއްޔަތަކީ ކޮބައިކަން ދަސްކޮށްދޭ ތަމްރީނު ތަކެކެވެ. އެއްވެސް މަޝްރޫޢެއް ކާމިޔާބު ކުރެވޭނީ އެ މަޝްރޫޢުގައި ހިމެނޭ ކަންތައްތައް ބެލެހެއްޓުމާއި ހަވާލުކުރެވޭ ފަރާތްތަކުގެ ދައުރު ފުރިހަމައަށް އަދާކޮށްގެންނެވެ.
ކީރިތި ރަސޫލާ ﷺ ގެ ހިޖުރައިން އެނގުނީ ޙައްޤަށް ނަސްރުދޭނެ ބަޔަކު އަބަދުވެސް އުޅޭނެ ކަމެވެ. ޙައްޤަށް ހުރަސްއެޅުމަށް، ބާޠިލު ޢަޤީދާގެ ބަޔަކު އަބަދުވެސް މަސައްކަތް ކުރާނެކަމެވެ. ހިޖުރައިން ލިބިދޭ އެހެން ފިލާވަޅަކީ ޤައުމު ބިނާކުރުމުގައި ފިރިހެނުންނާ އެއްގޮތަށް އަންހެނުން ވެސް ބައިވެރިވާން ޖެހޭނެކަމެވެ. އެމީހުން ބާކީކޮށްގެން ނުވާނެކަމެވެ. އަހަރުމެންނަށް ހިޖުރައިގެ ދަތުރުފުޅުގައި ފެންނަ ބަޠަލާއަކީ އަބޫބަކުރުގެފާނުގެ ދަރިކަނބަލުން އަސްމާ އެވެ. އެކަމަނާގެ މަސައްކަތްޕުޅަކަށްވީ ރަސޫލާ ﷺ އާއި އެކަމަނާގެ ބައްޕާފުޅު ޘައުރު ފަރުބަދައިގެ ހޮހަޅައިގައި ތިއްބެވި ދުވަސްކޮޅު، އެ ދެ ބޭކަލުންނަށް ފަރީއްކޮޅު އެރުއްވުމެވެ.
އެންމެ މަތިވެރި ހިޖުރައަކީ ނުބައި ކަންތައްތައް ދޫކޮށް ރަނގަޅު ކަންތައްތަކަށް ހިޖުރަކުރުމެވެ. ޝިރުކުގެ އަނދިރިކަން ދޫކޮށް ތައުޙީދުގެ އަލިކަމަށް ހިޖުރަ ކުރުމެވެ. އަނިޔާވެރިވުން ދޫކޮށް އިންސާފަށް ހިޖުރަ ކުރުމެވެ.
މައުލޫމާތު: ހުކުރު ޚުތުބާ
