ރަޙިމުގެ ގުޅުން ދެމެހެއްޓުމަކީ ގާތްތިމާގެ މީހުންނަށް އިޙްސާންތެރިވުމެވެ. އެމީހުންނަށް ޒިޔާރަތްކޮށް، އެމީހުންގެ ހާލުއަހުވާލު ބަލައި އެމީހުންނަށް ހެޔޮ ފޯރުވުމެވެ. އެމީހުންނަށް ޒިޔާރަތްކުރެވެން ނެތް ހާލަތެއްގައި ފޯނުން ގުޅައި، ހާލުއަހުވާލު ބަލައި މުނާސަބަތުތަކުގައި ތަހުނިޔާ ބަދަލުކުރެވިދާނެއެވެ.
ބައެއް މީހުންނަށް އެމީހުންގެ ގާތްތިމާގެ މީހުންނާއި، ރަހިމުގެ ގޮތުން ގުޅިފައިވާ މީހުންނަކީ ކޮބައިކަން ނޭނގި ދާނެއެވެ. ބައެއް މީހުންނަށް އެއީ ކޮންބައެއްކަން އެނގުނުކަމުގައި ވިޔަސް، އެ މީހުންނަށް ޒިޔާރަތްކުރުމާއި، ބަލިވުމުން ގޮވައިލަންދިޔުން، އެ މީހުންގެ ދަރިންނަށް މަނާ ކުރެއެވެ. މިއީ މައިންބަފައިން އެމީހުންގެ ދަރީންނަށް ރަހިމުގެ ގުޅުން ކެނޑުމަށް ގޮވައިލާ ގޮވައިލުމެކެވެ. ހިތާމަހުރި ކަމެކެވެ.
ރަސޫލާ ﷺ ޙަދީޘް ކުރައްވާފައިވެއެވެ. މާނައީ: "ރަހިމުގެ ގުޅުންތައް ދެމެހެއްޓުމަށްޓަކައި، ތިޔަބައިމީހުންގެ ނަސަބުތައް ދަސްކުރާށެވެ. ފަހެ ހަމަކަށަވަރުން ރަހިމުގެ ގުޅުން ދެމެހެއްޓުމަކީ، ގާތްތިމާގެ މީހުންގެ މެދުގައި، ލޯބި ދެމެހެއްޓޭނެ ކަމެކެވެ. އަތްމަތި ތަނަވަސްކޮށްދޭނެ ކަމެކެވެ. އަދި އުމުރު ދިގުކޮށްދޭނެ ކަމެކެވެ".
ރަޙިމުގެ ގުޅުން ދެމެހެއްޓުމަކީ، މާތް ﷲ ގެ ޙަޟްރަތާ ތިމާ ކުއްތަންކޮށްދޭނެ ހެޔޮ އަމަލެކެވެ. ޢަމްރު ބިން ދީނާރު ވިދާޅުވެފައި ވެއެވެ. "ފަރްޟެއް އަދާކުރުމަށް ފަހު ކުރެވޭ އެންމެ ބޮޑު ހެޔޮކަމަކީ، ރަޙިމުގެ ގުޅުން ދެމެހެއްޓުމެވެ".
ރަޙިމުގެ ގުޅުން ދެމެހެއްޓުމަކީ، ސުވަރުގެ ވަނުމުގެ ސަބަބުތަކުގެ ތެރޭގައި ހިމެނޭ ކަމެކެވެ. ރަޙިމުގެ ގުޅުން ދެމެހެއްޓުމަކީ، އީމާންކަމުގެ އަލާމާތްތަކުގެ ތެރޭގައި ހިމެނޭ ކަމެކެވެ. އަދި ރަޙިމުގެ ގުޅުން ދެމެހެއްޓުމަކީ، ޢުމުރު ދިގުކޮށްދެއްވައި ރިޒްޤު ތަނަވަސްކޮށްދެއްވައި، ނުބައި މަރަކުން މަރުވެދިޔުމާ ދުރުހެލި ކުރައްވާނޭ ކަމެކެވެ.
ރަޙިމުގެ ގުޅުން ދެމެހެއްޓުމަކީ، ﷲ ގެ ރުހިވޮޑިގަތުން ލިބޭނޭ ކަމެކެވެ. އެއީ ދުނިޔެއާއި އާޚިރަތުގެ ކާމިޔާބީ ލިބޭނެ ކަމެކެވެ. އަދި ފާފަ ފުއްސަވާ ކަމެކެވެ.
ރަޙިމުގެ ގުޅުން ކަނޑާ މީހުންގެ ޢަމަލުތައް މާތް ﷲ ޤަބޫލު ނުކުރައްވާނެކަމަށް ވާރިދުވެފައި ވެއެވެ. ރަސޫލާ ﷺ ޙަދީޘް ކުރައްވާފައިވެއެވެ. މާނައީ: " ހަމަކަށަވަރުން އާދަމުގެ ދަރީން ކުރާ އަމަލުތައް ކޮންމެ ހުކުރު ވިލޭރެއަކު މާތް ﷲ ގެ ޙަޟްރަތަށް ހުށަހެޅޭނެތެވެ. ފަހެ ރަޙިމުގެ ގުޅުން ކަނޑާފައިވާ މީހާގެ ޢަމަލުތައް ޤަބޫލު ނުކުރައްވާނެތެވެ".
ރަޙިމުގެ ގުޅުން ކެނޑުމުގެ ސަބަބުން އާޚިރަތް ދުވަހުން ލިބޭ ޢަޛާބުގެ އިތުރުން، ދުނިޔެމަތީގައި ވެސް ޢުޤޫބާތް ލިބޭނޭކަން އަންގަވައި، މާތް ނަބިއްޔާ ﷺ ޙަދީޘް ކުރައްވާފައިވާ ބަސްފުޅެއްގެ މާނާގައި ވެއެވެ. " ފާފަތަކުގެ ތެރެއިން އަނިޔާ ކުރުމާއި، މައިންބަފައިންނަށް ނުކިޔަމަންތެރިވުމާއި، ގާތްތިމާގެ ކަމުގެ ގުޅުން ކަނޑައިލުން ފިޔަވައި، އެންމެހައި ފާފަތަކުގެ ޖަޒާ ޤިޔާމަތާ ހަމައަށް މާތް ﷲ ފަސްކުރައްވަތެވެ. ނަމަވެސް މި ތިން ކަމުގެ ޖަޒާ މަރުވުމުގެ ކުރިން، ދުނިޔެމަތީގައި ވެސް މާތް ﷲ ދެއްވަތެވެ".
މައުލޫމާތު: ހުކުރު ޚުޠުބާ
